Haragenzurwa ko  nta virusi zitera imbasa zihishe mu Rwanda

  • NTAWITONDA JEAN CLAUDE
  • Ukwakira 28, 2022
  • Hashize umwaka 1
Image

Hashize imyaka 29 indwara y’imbasa itagaragara mu Rwanda, ariko ibyo ntibyakuyeho ingamba  zo kuyikumira zirimo izo  gukingira abana ndetse kuri ubu hakaba harimo gukorwa ubushakashatsi harebwa niba ntahashobora kuba hari virusi ziyitera ikaba yakongera kwaduka.

Byagarutsweho  uyu munsi ku wa 28 Ukwakira 2022, u Rwanda rwizihijeho  Umunsi Mpuzamahanga wo kurwanya indwara y’imbasa  mu Karere ka Kicukiro, ku Kigo Nderabuzima cya Gahanga.

Sibonama Hassan Umuyobozi w’agateganyo ushinzwe ubuzima bw’umubyeyi n’umwana mu Kigo cy’Igihugu gishinzwe Ubuzima (RBC), mu kiganiro n’itangazamakuru yavuze ko mu ngamba Igihugu gifite harimo gukomeza gukingira hakaboneka umubare munini w’abana bakingiwe kandi hagenda hashyirwaho n’ibindi bigamije gukumira iyi ndwara.

Yagize ati: “Muri iyi minsi harimo n’ibishyashya turimo kuzana; ntabwo turimo gupima imbasa ngo dupime abana bashobora kuba bayikekwaho gusa ahubwo twateye n’indi ntambwe aho dupima amazi yanduye aturuka hirya no hino mu ngo kugira ngo turebe niba hadashobora kuba harimo virusi kugira ngo dutangire gufata ingamba hakiri kare. Turamutse tuzibonye byatuma tugira ukundi twitwara tukarushaho gukingira abana tuvuga ngo iki kibazo nta bwo kiri mu bantu ariko kiri mu bidukikije”.

Yongeyeho ati: “Muzabona abakozi b’ibigo nderabuzima bagenda bafata ibipimo mu myanda hirya no hino”. 

Buri byumweru bibiri ibipimo byafashwe byoherezwa muri Laboratwari bigapimwa.

Ubu bugenzuzi burakorwa mu gihe hari ibihugu bimwe byo  mu majyepfo y’Afurika byongeye kugaragaramo iyi ndwara guhera muri  Gashyantare 2022 birimo  Malawi na  Mozambique, ndetse ikaba ikigaragara no muri Pakistan na Afghanistan muri Aziya.

Sibonama yagize ati: “Ni ibintu byo kwitaho cyane kuko izi virusi nta mupaka zigira iyo hari igihugu cyagaragayemo ubu burwayi biba byoroshye, bishoboka ko bwajya n’ahandi”.

Yavuze ko ari ikintu gikomeye kuba u Rwanda rwarabashije  guhashya iyi ndwara y’imbasa, kandi gukingira abana bikaba  bigenda neza byitabirwa ku gipimo kiri hejuru ya 90%, ariko ntihagomba kubaho kwirara.

Sibonama Hassan Umuyobozi w’agateganyo ushinzwe ubuzima bw’umubyeyi n’umwana muri RBC atanga urukingo rw’imbasa

Ati: “Tukaba dushishikariza ababyeyi kuri uyu munsi kugira ngo bakomeze bakurikirane abana, niba hari ikintu cyahindutse ku mubiri bajye babimenya kandi by’umwihariko bitabire gukingiza abana. Iyo tuvuga abana bashobora kurwara imbasa tuba tugira ngo abantu bibande ku bafite imyaka 15, ni bo bakunda kugaragaza ibimenyetso”.

Dr Nahimana Rosette umuganga ushinzwe Porogaramu y’ikingira mu Ishami ry’Umuryango w’Abibumbye ryita ku Buzima ku Isi (OMS) mu Rwanda, na we yasabye Abanyarwanda gukomeza kwitabira gukingiza abana bakumira iriya ndwara kuko mu gihe hari ibihugu ikigaragaramo biba bivuze ko itararandurwa burundu.

Ati: “ Kugira ngo tuzajye gufata umwanzuro wo kuvuga  ngo imbasa twayiranduye burundu ni uko nta hantu na hamwe ku Isi, haba mu bantu haba no mu bidukikije, hazaba hakigaragara virusi y’imbasa”. 

Yongeyeho ati: “Muri iyi myaka itanu iri imbere turi muri gahunda yo kuvuga ngo nta mwana n’umwe ugomba gusigara atabonye urukingo, turashaka kugera  ku 100%. Inkingo zirahari, zitangirwa ubuntu nibakomeze bakingize”.

Uyu munsi waranzwe no gukingira abana imbasa

Bamwe mu babyeyi bakingije abana bagaragaje ko bamaze gusobanukirwa akamaro ko gukingiza.

Nyirabavakure Christine utuye mu Mudugudu wa Kiyanja, mu Kagari ka Kagasa mu Murenge wa Gahanga ati: “Gukingiza umwana ni ngombwa kuko inkingo zabereyeho kugira ngo ziturinde ibyorezo  bishobora kwangiza ubuzima bwacu, ni ngombwa gukingiza umwana kugira ngo abone ubudahangarwa bw’umubiri”.

Nzabarankize Sylvain wo mu Mudugudu wa Rwinanga, mu Kagari ka Gahanga, ateruye umwana we yaje gukingiza yagaragaje ko gukingiza umwana bitareba umugore gusa n’umugabo yabikora umwana ntacikanwe n’inkingo.

Ati: “Ndishimye cyane kuba nkingije umwana, nk’umugabo bimpaye ishema cyane, nashishikariza abagabo bagenzi banjye ko gukingiza umwana nta pfunwe riba ririmo, kandi bituma umwana agira ubudahangarwa, byongera n’urukundo rw’umwana n’umubyeyi, umwana abyiruka avuga ati mfite papa[…], imbasa nzi ko yica abantu iyo utayikingije kare”.

Umwana ukivuka, mu nkingo za mbere ahabwa harimo n’ urw’imbasa, rutangwa mu buryo bubiri; urushinge ndetse n’ibitonyanga. Yongera gukingirwa afite ukwezi kumwe n’igice, agize amezi abiri n’igice, afite amezi atatu n’igice akazongera gukingirwa afite amezi 9.

Nk’uko Sibonama Hassan Umuyobozi w’agateganyo ushinzwe ubuzima bw’umubyeyi n’umwana muri RBC yabisobanuye, imbasa ni indwara itera ubumuga, kugira ngo umenye ko umwana ashobora kuba ayirwaye agira uburema bushya mu buryo butunguranye.

Ibyo bimenyetso bishobora kugaragara ku kaguru kamwe cyangwa yombi, ku kaboko kamwe cyangwa yombi. Ni indwara idakira ishobora no guhitana uwayirwaye cyangwa ikamusigira ubumuga budakira.

Umunsi wo kurwanya imbasa ubusanzwe wizihizwa buri mwaka ku itariki 24 Ukwakira, washyizweho n’Umuryango Mpuzamahanga witwa “Rotary International”, mu rwego rwo kwizihiza isabukuru y’amavuko y’umushakashatsi witwa Jonas Salk wayoboye itsinda ryavumbuye urukingo rw’imbasa  mu mwaka wa 1960.

Watangiye kwizihizwa ku Isi mu 2012, mu Rwanda ni  ukuva mu mwaka wa 2014. Insanganyamatsiko y’uyu mwaka igira iti: “Duharanire u Rwanda ruzira imbasa dukingiza abana bacu”.

Nzabarankize Sylvain amaze gukingiza umwana
  • NTAWITONDA JEAN CLAUDE
  • Ukwakira 28, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE