Handball: Imikino y’Afurika mu batarengeje imyaka 20  igeze muri ½

Taliki 26-08-2022

Umwanya wa 7-8

Rwanda-Congo Brazzaville (BK Arena-13h00)

Umwanya wa 5-6

Maroc-Libiya (BK Arena -15h00)

Imikino ya ½

Tunisia-Algeria (17h00)

Misiri-Angola (19h00)

Imikino y’Afurika mu batarengeje imyaka 20 mu mukino wa Handball “U-20 African Men’s Handball Championship Rwanda 2022” igeze muri ½ cy’irangiza aho iteganyijwe kuba kuri uyu wa Gatanu taliki 26 Kanama 2022.

Ku wa Kane taliki 25 Kanama 2022 habaye umukino wa nyuma mu itsinda wahuje ikipe ya Tunisia na Maroc ziri mu itsinda A. Ikipe ya Tunisia yitwaye neza itsinda Maroc ibitego 31 kuri 18.

Nyuma y’imikino yo mu matsinda, ikipe ya Tunisia yasoje iyoboye itsinda A n’amanota 6 ikurikiwe na Angola (4), Maroc (2) n’u Rwanda (0). Mu itsinda B ikipe ya Misiri yazamutse iyoboye n’amanota 6 ikurikiwe na Algeria (4), Libiya (2) na Congo Brazzaville (0).

Kuri uyu wa Gatanu taliki 26 Kanama 2022 nibwo hateganyijwe imikino ya ½ cy’irangiza ariko ikaza kubimburirwa n’imikino yo guhatanira imyanya.

Umukino ugomba kubimburira iyindi urahuza ikipe y’u Rwanda na Congo Brazzaville (13h00). Uyu mukino ni uwo guhatanira umwanya wa 7. Ikipe itsinda irafata uyu mwanya itsinzwe ifate umwanya wa 8.

Umukino wo guhatanira umwanya 5  urahuza ikipe ya Maroc na Libiya (15h00) aha naho ikipe itsinda irafata umwanya wa 5 itsinzwe isoreze ku mwanya wa 6.

Imikino ya ½ iteganyijwe, ikipe ya Tunisia irakina na Algeria (17h00) naho ikipe ya Misiri ikine na Angola (19h00). Amakipe yitwara neza agatsinda ni yo azakina umukino wa nyuma mu gihe atsindwa agomba guhatanira umwanya wa 3, imikino ikaba iteganyijwe ku wa Gatandatu taliki 27 Kanama 2022.

Aya makipe agiye gukina imikino ya ½ akaba yaramaze no gukatisha itike yo kuzaserukira Afurika mu mikino y’igikombe cy’Isi “IHF Men’s Junior World  Handball Championship 2023” izabera mu Budage no mu Bugereki.