Handball: Hamenyekanye uko amakipe azahura mu mikino y’Afurika  izabera mu Rwanda

  • Imvaho Nshya
  • Nyakanga 23, 2022
  • Hashize imyaka 2
Image

Kuva taliki 20 Kanama kugeza 06 Nzeri 2022 mu Rwanda hazabera imikino y’Afurika mu mukino wa Handball mu batarengeje imyaka 20 ndetse na 18 mu bahungu. Ikazabera muri BK Arena.

 Mu Gushyingo 2021, ni bwo Impuzamashyirahamwe y’umukino wa Handball muri Afurika “CAHB” yahaye u Rwanda uburenganzira bwo gutegura no kwakira aya marushanwa abiri y’Afurika mu cyiciro cy’abakiri bato.

Ku wa Gatanu taliki 22 Nyakanga 2022 ni bwo habaye tombola y’uko amakipe azahura muri iyi mikino y’Afurika.

Imikino y’Afurika mu batarengeje imyaka 20 izitabirwa n’amakipe 9

Irushanwa rizabanza ni iry’abatarengeje imyaka 20 rigiye kuba ku nshuro ya 29   “U-20 African Men’s Handball Championship Rwanda 2022”. Imikino izatangira taliki 20 isozwe 27 Kanama 2022. Amakipe agomba kuba yageze mu Rwanda taliki 18 atahe taliki 28 Kanama 2022.

Iyi mikino izitabirwa n’amakipe 9 aho yashyizwe mu  matsinda abiri. Itsinda  A rigizwe n’u Rwanda, Tunisia, Maroc, Angola na Central Africa Republic na ho itsinda B rigizwe na Misiri, Algeria, Congo Brazzaville na Libya.

Abakinnyi bazitabira iri rushanwa bagomba kuba baravutse hagati y’umwaka wa 2002 na 2004.

Uko irushanwa rizagenda, amakipe azakina imikino y’amajonjora mu matsinda hanyuma  amakipe abiri ya mbere muri  buri tsinda akomeze muri ½  kugera ku mukino wa nyuma. Hazanakinwa kandi imikino yo guhatanira imyanya.

Imikino y’Afurika iheruka yabereye muri Maroc muri Nzeri 2018, igikombe cyegukanwa na Misiri, Tunisia iba iya kabiri naho Nigeria isoreza ku mwanya wa 3.

Biteganyijwe ko amakipe 6 ya mbere azabona itike yo kuzaserukira Afurika mu mikino y’igikombe cy’Isi “IHF Men’s Junior World  Handball Championship 2023”, imikino izaba ibaye ku nshuro ya 24 ikazabera mu Budage no mu Bugereki kuva taliki 20 kugeza 02 Nyakanga 2023.

Iyi mikino y’igikombe cy’Isi yaherukaga kuba muri 2019  aho yabereye muri Espagne. Ikipe y’u Bufaransa ni yo yegukanye igikombe itsinda ku mukino wa nyuma ikipe ya Croatia ibitego 28 kuri 23. Ikipe ya Misiri yegukanye umwanya wa 3. Ikipe ya Tunisia yasoreje ku mwanya wa 7 naho Nigeria isoreza ku mwanya wa 19 mu makipe 24 yose yari yitabiriye.

Mu rwego rwo gutegura ikipe y’igihugu y’u Rwanda, ishyirahamwe ry’umukino wa Handball mu Rwanda “FERWAHAND” ryamaze gushyiraho abatoza  b’ikipe mu batarengeje imyaka 20 ari bo Ntabanganyimana Antoine nk’umutoza mukuru aho yungirijwe na Mudaharishema Sylvestre.

Mu batarengeje imyaka 18, ikipe y’u Rwanda iri mu itsinda B

Nyuma y’imikino y’Afurika mu batarengeje imyaka 20 hazakurikiraho imikino y’Afurika mu batarengeje imyaka 18 izaba ibaye ku nshuro ya 18  “U-18 African Men’s Handball Championship Rwanda 2022”. Imikino izatangira taliki 30 Kanama  isozwe taliki 06 Nzeri 2022. Amakipe agomba kuba yageze mu Rwanda taliki 28 Kanama  atahe taliki 07 Nzeri  2022.

Muri iki cyiciro  naho hazitabira amakipe 9  aho yashyizwe mu matsinda  abiri. Itsinda A ririmo Maroc, Congo Brazzaville, Libya na Uganda naho itsinda B rigizwe n’u Rwanda, Misiri, Algeria, Madagascar n’u Burundi.

Abakinnyi bemerewe gukina  iri rushanwa bagomba kuba baravutse hagati y’umwaka wa 2004 na 2005.

Biteganyijwe ko amakipe azakina imikino y’amajonjora mu matsinda hanyuma  amakipe abiri ya mbere muri  buri tsinda akomeze mur ½  kugera ku mukino wa nyuma. Hazanakinwa kandi imikino yo guhatanira imyanya.

Ikipe y’u Rwanda yaherukaga kwitabira iyi mikino muri 2016 ubwo yaberaga muri Mali. Ikipe y’u Rwanda yasoreje ku mwanya wa 7 mu makipe 8 yari yitabiriye.

Iri rushanwa rizatanga itike ku makipe 5 azaserukira Afurika mu mikino y’igikombe cy’Isi mu batarengeje imyaka 19 “IHF Men’s Youth World Championship 2023”. Iyi mikino izaba ibaye ku nshuro ya 10 izabera muri Croatia muri 2023.

Imikino y’igikombe cy’Isi yaherukaga  kuba muri 2019 ubwo yaberaga muri North Macedonia . Ikipe ya Misiri yari ifite igikombe cy’Afurika yegukanye muri 2018 ni yo yegukanye igikombe cy’Isi itsinze ku mukino wa nyuma u Budage ibitego 32 kuri 28.  Ku mwanya wa 3 hasoreje Denmark. Ikipe ya  Tunisia yasoreje ku mwanya wa 16 naho Nigeria isoreza ku mwanya 23 mu makipe 24 yitabiriye.

Ku bijyanye n’imyiteguro y’ikipe y’igihugu, FERWAHAND yamaze gushyiraho abatoza b’ikipe y’igihugu aho umutoza mukuru yagizwe Bagirishya Anaclet akaba  yungirijwe na Ngarambe François-Xavier.

Perezida wa FERWAHAND, Twahirwa Alfred atangaza ko imyiteguro irimo kugenda neza  aho barimo gufatanya n’inzego zitandukanye zirimo Minisiteri ya Siporo “MINISPORTS”, BK Arena, Hoteli zizakira amakipe n’abandi bazagira uruhare mu migendekere myiza y’iri rushanwa.

Perezida wa FERWAHAND, Twahirwa Alfred

Akomeza avuga ko iri rushanwa ari ubwa mbere rigiye kwitabirwa n’ amakipe menshi mu byiciro byombi  akaba yizera ko rizerekana ishusho y’umukino wa Handball muri Afurika.

Mu rwego rwo kwitegura iyi mikino kandi  taliki 04 kugeza 15 Mata 2022 muri ES Kigoma mu Karere ka Ruhango habereye umwiherero wari ugamije gutoranya abazajya mu makipe y’igihugu yombi ahari abakinnyi 42 barimo 21 batarengeje imyaka 18 ndetse na 21 batarengeje imyaka 20.

  • Imvaho Nshya
  • Nyakanga 23, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE