Hamas yagabye igitero i Yeruzalemu gihitana batatu

  • NYIRANEZA JUDITH
  • Ugushyingo 30, 2023
  • Hashize amezi 6
Image

Hamas yagabye igitero cyahitanye abantu batatu i Yeruzalemu kuri uyu wa Kane tariki ya 30 Ugushyingo 2023 ku munsi wa karindwi w’agahenge. Ni mu gihe amasezerano yo guhagarika imirwano hagati ya Isiraheli na Hamas yongereweho umunsi umwe, bivuze kugeza ku wa Gatanu tariki ya 1 Ukuboza 2023.

Qatar yemeje ko ayo masezerano yongerewe kugeza mu gitondo cy’ejo ku wa Gatanu. Iminota mike mbere yuko guhagarika imirwano byari byumvikanywe byari biteganyijwe kurangira ku wa Kane tariki ya 30 Ugushyingo saa kumi n’imwe ku gihe ngengamasaha.

Abanyatayilane 17 barekuwe bageze ku kibuga cy’indege cya Bangkok ku ya 30 Ugushyingo 2023

Abantu batatu bapfuye abandi benshi barakomereka i Yeruzalemu mu gitero cyo ku wa Kane mu gitondo cyagabwe kuri bisi n’Abanyapalestine babiri bafitanye isano na Hamas kandi yigambye ko ari yo nyirabayazana w’icyo gitero.

Inzego z’ubutabazi za Isiraheli zivuga ko umwe mu bantu bapfuye ari umukobwa w’imyaka 24. Igitero cyabereye mu gace k’Abayahudi batuye Ramot, mu burasirazuba bwa Yeruzalemu yigaruriwe na Isiraheli. Hakomeretse abasirikare babiri ba Isiraheli ku buryo bworoheje.

Ingabo za Isiraheli zasohoye itangazo ryerekana ko guhagarika ibikorwa bizakomeza, ukurikije imbaraga z’abahuza kugira ngo bakomeze inzira yo kurekura abafashwe bugwate bafungiye i Gaza.

Itsinda rishya ry’abantu icumi b’Abisiraheli bari bafashwe bugwate bashyikirijwe Umuryango utabara imbabare Croix-Rouge, barimo abenegihugu batanu. Hamas kandi yarekuye Abanyarusiya babiri bafashwe bugwate na bane b’Abanyatayilande. Mu guhererekanya, Isiraheli yarekuye imfungwa 30 z’Abanyapalestina.

Guhera ku itariki ya 24 hamaze kurekurwa Abisiraheli bari barafashwe bugwate 70 n’abanyamahanga 27, bose hamwe bakaba 97 barekuwe na Hamas, mu gihe Isiraheli yo yarekuiye infungwa z’Abanyapalisitina 210.

  • NYIRANEZA JUDITH
  • Ugushyingo 30, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE