Hakim Sahabo yavuze impamvu yahisemo gukinira u Rwanda

  • SHEMA IVAN
  • Gashyantare 28, 2024
  • Hashize amezi 2
Image

Umukinnyi mpuzamahanga w’Umunyarwanda Hakim Sahabo ukinira Standard de Liège yo mu Cyiciro cya Mbere mu Bubiligi, yavuze ko impamvu atakiniye iki gihugu yavukiyemo agahitamo u Rwanda, ari uko yashakaga kwitura nyina watumye aba uwo ari we uyu munsi.

Sahabo yatangiye gukinira u Rwanda mu 2022, kugeza ubu ni umwe mu bakinnyi beza Amavubi afite muri iyi minsi.

Ibi yabagarutseho mu kuganiro n’Umuyoboro wa YouTube w’ikipe ye, yavuze ko impamvu yahisemo gukinira u Rwanda kandi yarashoboraga kubona amahirwe yo gukinira u Bubiligi, byari ukugira ngo yiture nyina.

Ati: “Nari mfite amahitamo yo gutegereza u Bubiligi cyangwa nkahitamo igihugu cya Mama wanjye. Nahisemo iki gihugu kuko nashakaga kwitura Mama wanjye wankoreye buri kimwe, witanze, akahaba buri gihe ku bwanjye.”

“[…] Byari ukwitura Mama, kumuhesha icyubahiro. Kuri njye, nahisemo iki gihugu ku bushake kuko byari ku bwa Mama kandi sinzigera nicuza ayo mahitamo hejuru y’u Bubiligi bwari kumpamagara cyangwa ntibumpamagare.”

Yakomeje agira ati: “Nashoboraga gukinira u Bubiligi cyangwa simbukinire, ariko nkinira u Rwanda kandi ntewe ishema na rwo. Kuri njye ni ubunararibonye navuze nti nubwo nkiri muto kuki ntajyayo, kandi narahisanze.”

Abajijwe uko bimera gukinira u Rwanda, Hakim Sahabo yavuze ko bimushimisha cyane iyo abona abafana bose bamushyigikiye ndetse kuri ubu yifuza gukina indi mikino myinshi mu Ikipe y’Igihugu “Amavubi”.

Ati: “Ni iby’agaciro, ubona abaturage benshi bakuri inyuma. Ntekereza ko bigutera imbaraga zo gukomeza guhagararira iki gihugu no kugiha byose. Kuri njye, narabikunze. Nakinnye amajonjora ya CAN, mperuka gukina ayo gushaka itike y’Igikombe cy’Isi. Nzashimishwa no kubakinira indi mikino.”

Hakim Sahabo wari uvuye muri Lille y’Abatarengeje imyaka 19, yerekeje muri Standard de Liège yo mu Cyiciro cya Mbere mu Bubiligi muri Kamena 2023, asinya amasezerano y’imyaka itatu ishobora kongerwa.

Nyuma yo gutangirira mu ikipe yayo ya kabiri, muri Mutarama uyu mwaka ni bwo Sahabo yatangiye guhabwa umwanya mu ikipe ya mbere ndetse yatowe nk’umukinnyi wayo mwiza wa Mutarama 2024.

Uyu musore ukiri muto ukuzwe n’Abanyarwanda benshi kubera uburyo akina neza hagati mu kibuga, by’umwihariko ku mipira aha barutahizamu, yatangiye gukinira Amavubi mu Ugushyingo 2022 ubwo u Rwanda rwakinaga na Sudani imikino ibiri ya gicuti kuri Kigali Pele Stadium.

  • SHEMA IVAN
  • Gashyantare 28, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE