Gasabo: Hateguwe igiterane cyo gukura urubyiruko mu biyobyabwenge

  • NTAWITONDA JEAN CLAUDE
  • Ugushyingo 4, 2022
  • Hashize umwaka 1
Image

Itorero rya ADEPR n’Ubuyobozi bw’Umurenge wa Remera mu Karere ka Gasabo mu Mujyi wa Kigali bateguye igiterane kigamije gukura urubyiruko mu biyobyabwenge, mu buraya no mu zindi ngeso mbi. 

Byagarutsweho mu kiganiro n’abanyamakuru ku mugoroba wo kuri uyu wa Kane taliki 03 Ugushyingo 2022. 

Pasiteri Justin Gatanazi, Umushumba wa Paruwasi ADEPR Remera, agaragaza ko mu gace ka Nyabisindu mu Murenge wa Remera, hari abantu bakora umwuga w’uburaya, abafata ibiyobyabwenge, abakuramo inda n’inzererezi.

Ati “Nk’abapasiteri ni ibintu bidukomeretsa kandi ni n’ikibazo gikomeye cyane kuko umuntu umeze gutyo ntashobora gutera imbere. Igiterane kizabera Nyabisindu kigamije ko ubugingo bw’abantu buhinduka”. 

Pasiteri Gatanazi avuga ko bisaba gufatanya kuko ngo ukijijwe hagomba kumenyekana uko abayeho kugira ngo afashwe bityo hirindwe ko yagaruka mu ngeso mbi. 

Aha ni ho ahera avuga ko mu giterane hazakusanywa inkunga yo kwishyurira Mituweli abaturage batishoboye. 

Umunyamabanga Nshingwabikorwa w’Umurenge wa Remera, Deo Rugabirwa, avuga ko gufatanya n’imiryango ishingiye ku myemerere hari impinduka zabayeho. 

Ashimingira ko abana 21 babonye ibikoresho by’ishuri bitanzwe na Grace Room Ministry. Ni mu gihe kandi ngo mu giterane giherutse gutegurwa na Grace Room Ministry cyagaragayemo abantu 35 bakijijwe bava mu buraya no mu biyobyabwenge.

Rugabirwa avuga ko ubuyobozi busabwa gukorana n’amadini n’amatorero kugira ngo bishyire umuturage ku isonga.

Ati “Ubufatanye bw’amadini n’amatorero bigamije iterambere ariko no kureba ibibazo abaturage bafite”.

Yakomoje ku babaswe n’ibiyobyabwenge ndetse n’uburaya. Ati “Ababayeho batyo ntibitabira gahunda za Leta ariko icyo dukora nk’ubuyobozi ni uko iyo baje mu miganda tubashishikariza kureka izo ngeso mbi”.

Ubuyobozi bw’Umurenge wa Remera bwemeza ko hakigaraga abishora mu biyobyabwenge, uburaya, ubujura, gukubita no gukomeretsa n’ibindi.

Bunagaragaza umusaruro uva mu biterane bafatanyamo n’amadini ndetse n’amatorero. Bugira buti “Umusaruro twiteze ni uko ibiterane nk’ibi bidufasha kugabanya ibyaha”. 

Igiterane kigamije kurwanya ibiyobyabwenge giteganijwe kuri uyu wa Gatandatu tariki 05 Ugushyingo 2022 kikazabera mu Murenge wa Remera mu Kagari ka Nyabisindu.

Icyo giterane kizitabirwa n’abahanzi ndetse n’amakorali atandukanye.

  • NTAWITONDA JEAN CLAUDE
  • Ugushyingo 4, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE