Gasabo: Ikoranabuhanga ryagaragaje abafite ubumuga bahishwaga mu mazu 

  • NTAWITONDA JEAN CLAUDE
  • Ukwakira 27, 2022
  • Hashize umwaka 1
Image

Igeragezwa ry’umushinga w’Inama y’Igihugu y’Abantu bafite Ubumuga (NCPD)  wo kubarura abafite ubumuga hifashishijwe ikoranabuhanga ryakorewe mu Karere ka Gasabo, ryagaragaje ko hari abafite ubumuga bahishwaga mu nzu, batabashaga kujya ahagaragara.

Byagarutsweho mu nama yabereye i Kigali, ubwo imiryango nyarwanda y’abantu bafite ubumuga yamurikirwaga imibare yavuye muri ririya barura kugira ngo imenye abo ikorera ubuvugizi, no kugaragariza Abanyarwanda muri rusange ingaruka zo guhisha ufite ubumuga. 

Abafite ubumuga bamaze kubarurwa mu Karere ka Gasabo ni  3845.

Mu kiganiro n’itangazamakuru, Tuyizere Oswald umukozi wa  NCPD ushinze Porogaramu ishinzwe abana bafite ubumuga, yagarutse ku musaruro wabonetse mu ibarura agira ati: “Byatanze umusaruro, uretse kuba byarakozwe n’abafite ubumuga bagenzi babo mu Mirenge bikabaha akazi ariko byanagaragaje ko hari abantu bafite ubumuga benshi bari bahishwe mu nzu batabasha kugaragara, ubu twarababonye”. 

Ikindi cyagaragaye ni uko hari abajyaga bahisha ko bafite ubumuga bitewe n’uburyo ibibazo babazwaga mbere  byabaga biteye.

Ati: “Mbere barazaga bakakubaza ngo mbese waba uri impumyi, uri igipfamatwi, ku muntu rero wiha agaciro ntiyabashaga kubivuga ahubwo yarabarekaga bakagenda. Ubu ni ukubaza ngo waba ufite inzitizi mu kugenda n’ubwo waba ufite inyunganirangingo? Waba ufite inzitizi mu kureba n’ubwo waba wambaye amadarubindi? Ibyo bidufasha kubona umubare w’abantu benshi baduha amakuru bikadufasha mu igenamigambi”.

Ikindi gishya kirimo ni uko mu Ibarura Rusange ry’abaturage n’imiturire abana bari munsi y’imyaka 5 batabaruwe bitewe n’amabwiriza avuga ko baba bakiri batoya igihe kizagera ubumuga bwabo bugakira, ariko muri ubu buryo bw’ikoranabuhanga bose bazabarurwa.

Tuyizere ati: “[…] tuzagaragaza ngo abana bari munsi y’imyaka 18 uramutse ubamenye, ukabitaho bakiri batoya ubumuga bwakira”. 

Nsengumuremyi Diogene Umuyobozi w’Umuryango Collectif Tubakunde wita ku bafite ubumuga bwo mu mutwe barimo abana n’urubyiruko, yagarutse  ku nyungu biteze kuri iri koranabuhanga, avuga ko rigiye gutuma bagira imibare nyayo.

Ati: “Hari abana benshi bahishe, badasohoka ngo bamenyekane, ariko ubu buryo bugiye kuzakoreshwa; kubera ko bazajya bajya mu rugo ku rundi bizatuma abana benshi bari bahishe basohoka bamenyekane”.

Muhoracyeye Pelagie afite ubumuga bwo kutumva no kutavuga, na we yagize ati: “Cyane cyane mu cyaro, ababyeyi kubyumva biba bigoye cyane, baba batekereza  ko ufite ubumuga nta kintu amaze ariko iyo  bitaweho bagafashwa mu miryango inyuranye na bo bashobora kumva kandi bakiga neza; guhera ku mwana uvutse uko akura ukamwitaho”.  

Ubu buryo bwo kubarura hakoreshejwe ikoranabuhanga (DMIS)  bufasha mu kumenya abafite ubumuga, aho baherereye n’ ibibazo bafite kugira ngo bishingirweho mu kubakorera ubuvugizi.

Butandukanye n’ubwakoreshwaga mbere; nko muri 2015 abafite ubumuga bashyirwaga mu byiciro bikozwe n’abaganga 4 muri buri karere, bahuriraga ku muntu umwe  ufite ubumuga bakamusuzuma barebye ubumuga afite.

Nk’uko NCPD ibisobanura,  ubu hakoreshwa uburyo bwo kureba ahantu umuntu afite inzitizi yaba izishingiye ku mubiri, ku kubura amahirwe, ndetse hakabazwa  ibibazo bijyanye n’uburenganzira bwa muntu; ntihagaragazwe imbogamizi  umuntu afite ku giti cye ahubwo hakagaragazwa ibibazo afite bijyanye n’ubumuga ariko binajyanye n’aho atuye, aho akora n’aho agenda n’ibyo akeneye kugira ngo akurirweho izo nzitizi.

Nyuma yo kurebera hamwe ibyavuye mu mbanzirizamushinga, hakomeje inzira yo kugeza uyu mushinga mu turere twose tw’Igihugu, gusa ntiharatangazwa igihe  ntakuka  ibarura ry’abantu bafite ubumuga rizatangirira.

  • NTAWITONDA JEAN CLAUDE
  • Ukwakira 27, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE