Gakenke: Minisitiri Uwizeye yasabye Meya guteza imbere imibereho y’abaturage

  • NYIRANEZA JUDITH
  • Ukuboza 12, 2023
  • Hashize amezi 5
Image

Minisitiri muri Perezidansi ya Repubulika, Uwizeye Judith yasabye Umuyobozi mushya w’Akarere ka Gakenke Mukandayisenga Vestine kuzita ku iterambere ry’imibereho y’abaturage.

Ni ubutumwa bwatanzwe kuri uyu wa Kabiri tariki ya 12 Ukuboza 2023 mu muhango w’ihererekanyabubasha hagati y’uwari Umuyobozi w’Akarere w’Agateganyo Aime Francois Niyonsenga n’Umuyobozi mushya w’Akarere ka Gakenke Madamu Mukandayisenga Vestine.

Mu ijambo rye, Minisitiri Uwizeye yasabye Umuyobozi mushya w’Akarere ka Gakenke guteza imbere abaturage.

Yagize ati: “Nk’Umuyobozi muharanire kubakira ku musingi usanze, urushaho guteza imbere imibereho y’abaturage b’aka Karere”.

Ibindi yamusabye kuzibandaho harimo gukemura ikibazo cy’imirire mibi n’igwingira, gukemura ikibazo cy’abana bata ishuri bakajya mu bucukuzi bw’amabuye y’agaciro, gukangurira abaturage gukora cyane bakivana mu bukene, kwimakaza umuco w’imikoranire myiza n’abo bakorana barushaho guhana amakuru, kubahana no gushyira hamwe.

Kwirinda amatiku n’inzangano, kwirinda amarangamutima mu byemezo afata, kwirinda abamujya mu matwi, kwirinda abamuca intege, kutarebera ikibi n’amakosa y’abakozi, kwirinda ruswa no kuyirwanya yivuye inyuma, n’ibindi.

Nyuma yo kugaragariza Umuyobozi mushya wa Gakenke ko Akarere ajemo gasanzwe kitwara neza muri gahunda za Leta, Guverineri w’Intara y’Amajyaruguru Mugabowagahunde Maurice yamusabye kuzashyira imbere imiyoborere myiza ishyira umuturage ku isonga, irangwa no gusubiza no gukemura ibibazo bye ku gihe.

Uyu muhango uretse kuba witabiriwe na Minisitiri muri Perezidansi ya Repubulika Uwizeye Judith, Guverineri w’Intara y’Amajyaruguru Mugabowagahunde Maurice, hari n’abagize Inama Njyanama y’Akarere, Vice w’Akarere ushinzwe imibereho myiza y’abaturage ASOC, Inzego z’Umutekano mu Karere ka Gakenke, Umunyamabanga Nshingwabikorwa w’Akarere, Abanyamabanga Nshingwabikorwa b’Imirenge n’abakozi bakorera ku Biro by’Akarere.

Mu byo Umuyobozi mushya w’Akarere ka Gakenke azibandaho, yavuzemo kwimakamaza imikorere myiza igamije guca akarengane, guha umuturage serivisi nziza, gukemura ibibazo by’abaturage no gushyira imbaraga mu rubyiruko.

Umuyobozi w’Akarere ka Gakenke Mukandayisenga Vestine yatowe ku ya 7 Ukuboza 2023, yari asanzwe akora muri DUHAMIC ADRI ashinzwe ibikorwa by’ubugenzuzi.

  • NYIRANEZA JUDITH
  • Ukuboza 12, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE