Gakenke: Babangamiwe n’amazi avanze n’amayezi baterwa n’ibagiro

  • KAMALIZA AGNES
  • Mutarama 30, 2024
  • Hashize amezi 4
Image

Bamwe mu batuye mu Murenge wa Gakenke, Akarere ka Gakenke babangamiwe n’amazi avanze n’amayezi yuzuye umunuko aturuka mu ibagiro ry’Akarere rya Gakenke ayoborwa mu muyoboro uyageza mu mugezi wa Base.

Abo baturage barimo abahinga ndetse bagashakira ubwatsi bw’amatungo hafi y’iryo bagiro, bavuga ko banukirwa n’ayo mayezi avanze n’amase n’ibindi bisigazwa by’amatungo yabazwe, bakaba bafite impungenge ku buzima bwabo kuko bitembera mu mugezi wa Base aho bamwe bakoresha amazi yawo mu bikorwa bitandukanye.

Abaganiriye n’Imvaho Nshya bavuga ko nubwo uyu munuko utongora cyane mu gihe cy’izuba bigira ingaruka ku bantu benshi.

Ntawuhana Fidele Imvaho Nshya yasanze yahira ubwatsi bw’amatungo hafi y’aho ayo mayezi atembera, yagize ati “Ntihabura kunuka kubera amase, urabona ko iyi myanda iri kumanuka ari ibizi bibi. Nubwo aya mazi twe tutayakoresha ariko hari abayakoresha. Mu mvura nta kibazo tugira ariko ku izuba ni bwo aguma hamwe ugasanga harimo umunuko urumva ni ikibazo.”

Nizeyimana Jean Damascene na we ati: “Iyi myanda iva mu ibagiro barayirekura ikamanuka hano muri Base ntibagira ahantu bayividurira, kandi  bigira umunuko byangiza umwuka kandi ntibyabura no gutera indwara.”

Aba baturage basaba ko imyanda y’iri bagiro yagira aho imenwa habugenewe mu buryo butababangamiye.

Nubwo bo bavuga ko atari rimwe cyangwa kabiri iyi myanda yoherezwa mu mugezi wa Base Gakwavu Mariko, Umuyobozi w’Ibagiro rya Gakenke, avuga ko bafite ibyobo bijugunywamo imyanda ari ikosa ry’abakozi ryabaye rimwe  kandi bitazongera.

Ati: “Dufite aho imyanda igomba kujya yose haba iyoroshye ndetse n’ikomeye icyo twakora ni uguhwitura abakozi kuko iriya migende ni iy’amazi y’imvura si iy’imyanda nubwo abakozi bashobora gukora ibyoroshye ariko si byo.”

Remy Norbert, Umuyobozi w’Ishami rishinzwe gukurikirana no kugenzura ubwiza n’ingano y’amazi, mu kigo cy’Igihugu gishinzwe Umutungo kamere w’Amazi (Rwanda water Resources Board) avuga ko imyanda ituruka ku bikorwa bya muntu yanduza amazi, igira ingaruka ku buzima bw’abantu n’ibindi binyabuzima, bityo amazi agahinduka nk’uburozi bitewe n’ibinyabutabire biba byayinjiyemo.

Ati: “Ibipimo by’ubuziranenge bigenderwaho haba mu Rwanda ndetse no ku rwego mpuzamahanga (standards) bigaragaza uko amazi agomba kuba ameze kugira ngo atagira ingaruka mbi ku binyabuzima byose biyakenera, byaba ibiyabamo n’ibitayabamo ariko biyakoresha.

Imyanda ituruka ku bikorwa bya muntu rero ihindura ubwiza bw’amazi izanamo ibindi binyabutabire bitagenewe kuba mu mazi bityo akaba uburozi ku binyabuzima aho kubifasha kubaho.”

Yongeyeho ko ibi bikorwa bishobora no gutera indwara zirimo korela, impiswi n’izindi zituruka ku gukoresha amazi yanduye.

Remy agaragaza ko ibikorwa by’ubugenzuzi bikorwa n’iki kigo   bigaragaza ko akenshi ubwiza bw’amazi bwangizwa n’ibikorwa bya muntu byaba iby’inganda, ubucukuzi bw’amabuye y’agaciro, ubuhinzi, ibikorwa byo mu ngo, mu masoko, mu mahoteli, amabagiro n’ahandi.

Ubushakashatsi bwa RWB bugaragaza ko ikibazo cyo kwanduza amazi kigenda cyiyongera uko n’ibikorwa by’iterambere na byo bigenda byiyongera, cyane cyane ko ari na byo biturukamo iyo myanda n’ibindi bihumanya amazi.

Aboneraho gukangurira abantu bose bakoresha amazi kubanza kuyatunganya mbere yo yohereza mu migezi, ibiyaga, ibishanga, mu byobo  byabugenewe n’ahandi hose bayohereza nyuma yo gukoreshwa.

Abaturage bavuga ko babangamirwa cyane n’aya mazi ava mu ibagiro akoherezwa mu Mugezi wa Base
  • KAMALIZA AGNES
  • Mutarama 30, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE