Gakenke: Bababazwa n’inyubako z’ishuri zimaze imyaka 16 zidakora

  • Imvaho Nshya
  • Nzeri 28, 2023
  • Hashize amezi 8
Image

Abaturiye mu Mirenge inyuranye yo mu Karere ka Gakenke, cyane cyane abo mu Murenge wa Janja, basaba Leta kubyaza umusaruro inyubako z’ishuri ryitwaga “College Nkunduburezi”, zahindutse umusaka kubera ko zimaze imyaka isaga 16 zidakorerwamo.

Kuba izi nyubako zitabyazwa umusaruro biterwa n’uko amashuri yahagaritswe kuva mu mwaka wa 2007; abo baturage bavuga ko babona zipfa ubusa kandi zarubatswe n’abenegihugu.

Iryo shuri ryigenga ryafunze imiryango nyuma y’uko Leta igabanyije amafaranga y’ishuri maze ababyeyi bakajyana abana babo mu mashuri ya Leta.

Urubyiruko n’abashabitsi basaba Leta kuba yashaka ibisubizo byatuma ziriya nyubako zibyazwa umusaruro zikaba azashyirwamo imyuga maze urubyiruko rukahabonera ubumenyi ngiro.

Nzabahimana Egide w’imyaka 21 y’amavuko yagize ati: “Bamwe mu banyeshuri hano iyo bagiye kwiga imyuga bakora ingendo ndende bajya kwiga mu zindi ntara, nyamara hano hari ibigo by’amashuri bipfa ubusa nk’ahahoze College Nkunduburezi, uwahashyira ishuri ry’imyuga, ni ahantu heza hari ubutaka bunini n’inyubako nyinshi kandi nziza, turasaba ubuyobozi ko bwatekereza kuri iki kintu, abana bakajya bigira hafi imyuga”.

Ndindabahizi Fabien we ni umubyeyi usaba ko ziriya nyubako  zashyirwamo abanyeshuri bavuka hafi aho.

Yagize ati: “Hari abana bakizamuka imisozi bajya kwiga ndifuza ko ingo zituriye hano abana bavuka hafi hano bahigira, aho kugira ngo inyubako nka ziriya zavuye mu maboko y’abenegihugu, ugira ngo mbese twahombye uburezi gusa? Oya! Kuko kuri iki kigo twahazanaga ibiribwa, inkwi n’ibindi tukabona amafaranga adufasha, mbese umusaruro wacu wari warahawe agaciro none ubu twahuye n’igihombo”.

Bahati Alphred ukora ubushabitsi, avuga ko kuva ishuri ryafunga imiryango yahuye n’igihombo.

Yagize ati: “Turifuza ko Leta yadufasha rwose igakora gahunda nziza ituma ziriya nyubako zongera gukora kuko nkanjye nagemuriraga ririya shuri ibiribwa n’ibindi bikenerwa mu buzima bwa buri munsi, ariko kuva cyafunga nakubwira ko nasubiye inyuma, kiriya kigo rero buriya mbona ubuyobozi bwaracyirengangije mu myaka 16”.

Bahati akomeza avuga ko bikwiye ko kiriya kigo gifite isambu nini cyahabwa amashyirahamwe y’urubyiruko akakibyaza umusaruro, cyangwa hagashyirwa agakiriro cyangwa se isambu ihari ikaba yanahingwa ikabyazwa umusaruro.

Kuri iyi ngingo yo kuba Leta yagoboka abaturage mu rwego rwo kubyaza umusaruro ziriya nyubako za College Nkunduburezi, Umuyobozi w’agateganyo w’Akarere ka Gakenke Niyonsenga Aime Francois, avuga hari ibiganiro birimo gukorwa.

Yagize ati: “Kugeza ubu ziriya nyubako ziracyari mu maboko y’abanyamuryango, Akarere karabegeye ngo kayahe Akarere kayabyaze umusaruro baranze, numva ngo hari abantu bari mu nzira bashaka kuyakodesha ngo nyuma bakazakoreramo ibikorwa by’uburezi.

Gusa turakomeza kuganira na bo turebe uburyo habyazwa umusaruro, kuko natwe twumva inyubako nka ziriya koko ari ngombwa ko zibyazwa umusaruro uretse no kuba zari zifitiye inyungu ba nyirazo, ariko nanone ni inyungu ku gihugu niba hari abajyanagayo ibicuruzwa, abandi bakahabona imirimo, abandi bakigira hafi urumva ko ari inyungu kuri benshi.”

Collège Nkunduburezi yashinzwe n’Umuryango Nkunduburezi amateka wavutse mu mwaka wa 1983, ushinzwe n’ababyeyi bo mu byahoze ari Komini Ndusu na Gatonde bishyize hamwe bagamije kugira uruhare mu guteza imbere uburezi mu mashuri yisumbuye mu Rwanda, maze itegeko rya Minisitiri nomero 1219 ryo ku wa 12/09/1986 riyemerera gukora ku mugaragaro n’ubwo ibikorwa by’uburezi byo byari byaratangiye mu 1983.

Ibyo bikorwa byatangiriye mu nyubako z’icyahoze ari CCDFP (Centre Communal de Developement et de Formation Permanente), cyakoreraga ku Mubuga ahahoze ibiro bya Komini Ndusu.

Iryo shuri ryisumbuye ryantangiranye ishami ry’ubutegetsi n’amategeko (Droit et Administration), nyuma gato mu 1985 ritangiza irindi shami ry’Inderabarezi (Normale Primaire) ari nay o yahabaga kugeza mu 2007.

NGABOYABAHIZI PROTAIS

  • Imvaho Nshya
  • Nzeri 28, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE