Expo 26: Minisitiri Prof Ngabitsinze yavuze udushya tuyigaragaramo (Amafoto)

  • Imvaho Nshya
  • Nyakanga 31, 2023
  • Hashize amezi 10
Image

Ubwo yatangizaga ku mugaragaro Imurikagurisha mpuzamahanga kuri uyu wa Mbere tariki 31 Nyakanga 2023, Minisitiri w’Ubucuruzi n’Inganda Prof Jean Chrysostome Ngabitsinze yasabye abaryitabira kubyaza umusaruro udushya turigaragaramo.

Yagize ati “Njyewe nibuka ko bwa mbere njya mu imurikagurisha ntiryabereye aha ariko ayo nagiyemo sinajyaga mbona Polisi, Urwego rw’Ubugenzacyaha rwigisha Abanyarwanda, ako ni agashya gakomeye cyane.

Sinajyaga mbona urubyiruko rwinshi rufite ibishya byinshi. Nabonyemo abantu bakora inkweto, kera wasangaga harimo cyane aho kunywera naho kurira”.

Iri murikagurisha mpuzamahanga ririmo kuba ku nshuro ya 26 i Gikondo, Urugaga rw’Abikorera mu Rwanda (PSF) rwatangaje ko ryitabiriwe n’abamurika 403 barimo abanyamahanga 118 bavuye mu bihugu 21.

Gutangiza ku mugaragaro Expo byanitabiriwe n’Umuvugizi wa Polisi CP J.B Kabera, Perezida w’agateganyo wa PSF Jeanne F. Mubiligi, Umuyobozi Nshingwabikorwa w’Akarere ka Kicukiro Mutsinzi Antoine n’izindi nzego z’umutekano.

Minisitiri Prof Ngabitsinze avuga ko ari ubwa mbere abonye Polisi y’Igihugu y’u Rwanda, Urwego rw’Ubugenzacyaha (RIB) bitabira imurikagurisha mpuzamahanga.

Minisiteri y’Ubucuruzi n’Inganda (MINICOM) isaba abacuruzi kudashyiraho ibiciro by’umurengera mu rwego rwo guhenda ababagana.

Umuvugizi wa Polisi CP John Bosco Kabera we avuga ko abantu bakwiye kwishima ariko bakirinda icyabangamira umutekano harimo no kunywa ibisindisha bakarenza urugero.

Yagize ati “Nunywa gakeya ugatwara ikinyabiziga ugahura n’umupolisi azagupima arebe ko ka gakeya kangana n’urugero ruri mu mategeko 0.80.

Niba gakeya karenza ahongaho birumvikana ko umupolisi azagufata”.

CP Kabera ashimangira ko nta miyaga izajyamo ngo nuko habaye Expo yibutsa abayitabira kunywa gakeya.

Ati “Aha rero bumve ko ibyo ari byo byose haba hano muri Expo, haba abahaza, ibikorwa ibyo ari byo byose bigomba kugendera ku mategeko”.

Perezida w’Agateganyo wa PSF Jeanne F Mubiligi yashimiye MINICOM uburyo iba hafi y’abacuruzi mu buzima bwa buri munsi ndetse no mu gutegura imurikagurisha mpuzamahanga.

Yanditswe na KAYITARE JEAN PAUL

  • Imvaho Nshya
  • Nyakanga 31, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE