Dr. Habineza Frank asanga abimukira ba UK bazabera u Rwanda umutwaro

  • KAMALIZA AGNES
  • Mutarama 31, 2024
  • Hashize amezi 4
Image

Icyemezo cy’u Rwanda cyo kwagira impunzi n’abimukira bagihungiramo bakabona amahoro n’umutekano, gishobora kutumvikana mu maso ya bamwe ariko gishingiye ku mateka y’Abanyarwanda. Ni yo mpamvu rwemeye kwakira abimukira bava mu bice bitandukanye by’Isi barimo n’abava mu Bwongereza.

Icyo cyemezo kibonwa nk’ubutwari kuri benshi, hari abatacyakira na yombi barimo na Dr. Frank Habineza, Umuyobozi Mukuru w’ishyaka riharanira Demokarasi no kurengera Ibidukikije (Democratic Republic Green Party Rwanda) wemeza ko adashyigikiye u Rwanda rwiteguye kwakira abimukira bazava mu Bwongereza.

Dr. Habineza avuga ko ishyaka abereye Umuyobozi ryarwanyije rugikubita icyemezo cy’umutima utabara u Rwanda rwagize ku bimukira barohama mu mu mazi y’ahitwa Channel berekeza mu Bwongereza mu buryo bunyuranyije n’amategeko.

Abenshi muri abo bimukira bimukira ni Abanyafurika baba baranarokotse impanuka zibera mu Nyanja ya Mediterranee, bagera ahitwa i Calais mu Bufaransa bakishyuzwa amafaranga y’urugendo rwo mu bwato buke bukunze gukora impanuka muri ayo mazi y’ahitwa Channel bamwe bakahasiga ubuzima.

Abimukira bisanze bahurira muri ako gace gaherereye mu Majyaruguru y’u Bufaransa guhera mu myaka ya 1990. Aho kugeza n’uyu munsi iyo nkambi itagihaba kandi bongerera umutwaro ibihugu byo ku Mugabane w’u Burayi.

Mu gihe icyo kibazo cyasaga nk’icyaburiwe igisubizo, u Bwongereza bwegereye u Rwanda, na rwo rwemera kwakira by’agateganyo abimukira bafatiwe muri icyo gihugu batuyemo binyuze mu nzira zitubahirije amategeko.

U Rwanda rwemeye kwakira by’agateganyo abo bimukira kugira ngo u Bwongereza bufate umwanya wo kwiga ku busabe bwabo ariko bafite ahantu hatekanye bacumbikiwe ari na ko babona amahirwe abahindurira ubuzima.

Dr. Habineza yavuze ko ishyaka rye ritishimiye icyo gitekerezo rugikubita, agaragaza ko abo bimukira bazaba baje kuba umutwaro ku Rwanda.

Yagize ati: “Twabivuze rugikubita, igihe Minisitiri w’u Bwongereza yazaga mu Rwanda gusinya amasezarano jyanye n’abimukira bazakurwa mu Bwongereza. Ishyaka ryacu ntabwo ryabyishimiye ko u Bwongereza bwafata inshingano zabwo zo gufata abimukira babahungiyeho ngo bubahe u Rwanda abe ari rwo rubafasha.”

Ikibazo cy’abimukira gikomeje kuba ingorabahizi mu Bwongereza

Yagaragaje impungenge z’uko u Rwanda byarangiye ari rwo rwikoreye umutwaro wo kwita ku bimukira u Bwongereza bwananiwe kwitaho kuko mu ngingo z’ayo masezerano yamenye harimo ivuga ko hari bamwe batazasubira mu Bwongereza ahubwo bakaguma mu Rwanda.

Ati: “Nubwo u Bwongereza buzatanga amafaranga ariko bazaba umutwaro ku Rwanda…”

Avuga ko u Rwanda atari igihugu gikize cyangwa kibonekamo amahirwe yo kubona akazi kurusha u Bwongereza, ari yo mpamvu aba bimukira bakwiye kuguma mu Bwongereza.

Ati: “Mu by’ukuri twebwe nk’ishyaka ntitubishyigikiye kubera ko ntabwo twavuga ngo turi igihugu gikize kurusha u Bwongereza, ntanubwo turi igihugu kinini kurusha u Bwongereza. Ntidufite akazi kenshi cyangwa amahirwe yo kubona akazi kurusha u Bwongereza, tukavuga duti ‘u Bwongereza ni igihugu umuntu yirukankiramo kuko ashobora kubona akazi, n’ako wakwita agasuzuguritse mu Bwongereza gashobora kugutunga.”

Dr. Habineza yongeyeho ko amahirwe yagahawe abo bimukira akwiye guhabwa urubyiruko rw’u Rwanda aho kugira ngo bazisange bahanganye na bo ku isoko ry’umurimo.  

Avuga ko ibijyanye n’amategeko, ibihugu byose byasinye amasezerano mpuzamahanga yo kwakira impunzi, ko uwo impunzi ihungiyeho bwa mbere ari we uyakira ariko kandi ishyaka rye ngo ryemera ko u Rwanda rwakira impunzi zaruhungiyeho bwa mbere.

Ati: “Impunzi iguhungiyeho bwa mbere ni wowe ufite uburenganzira bwo kuyakira, niba umuntu yahungiye mu Bwongereza ari ho yakandagiye bwa mbere bafite inshingano zo kumwakira ntabwo inshingano ar’i uzu Rwanda.

Natwe nk’ishyaka dushyigikiye ko u Rwanda rwacu rwakira impunzi izo ari zo zose zahungira mu Rwanda zava muri Congo, zava mu Burundi n’ahandi dushyigikiye ko zakirwa zikabona ibyangombwa, ariko izitarahungiye iwacu ntabwo ari izacu. Ibyo bitekerezo by’ishyaka tubihagazeho ntabwo tuzabivaho rwose.”

Ku wa 17 Mutarama 2024, abagize Inteko Ishinga Amategeko y’u Bwongereza, bongeye gutora bashyigikiye gahunda yo kohereza abimukira mu Rwanda.

Mu bari muri iri tora, 320 batoye bemera iyi gahunda abandi 276 biganjemo abo mu ishyaka ‘Labour’ ritavuga rumwe na Leta barayanga.

Mu kwezi k’Ukuboza 2023, Guverinoma y’u Rwanda n’iy’u Bwongereza, basinyanye amasezerano avuguruye ajyanye no gukemura ikibazo cy’abimukira binjira mu Bwongereza mu buryo bunyuranyije n’amategeko, yavugururaga aya mbere yasinywe muri Mata mu 2022.

Aya masezerano yongeye gusinywa bundi bushya kugira ngo asubize ibibazo byagaragajwe n’Urukiko rw’Ikirenga rw’u Bwongereza, rwayanenze mu kwezi k’Ugushyingo 2023, ko adakurikije amategeko.

Urukiko rwari rwavuze ko kohereza abimukira mu Rwanda bishobora kunyuranya n’amasezerano n’amahame y’iyubahirizwa ry’uburenganzira bwa muntu yo ku rwego rw’igihugu na mpuzamahanga.

Urukiko rwagaragaje n’impungenge ko abimukira bazoherezwa mu Rwanda bashobora kuzajya basubizwa mu bihugu bavuyemo, ariko Minisitiri w’Intebe mu Bwongereza Rishi Sunak yagaragaje ko u Rwanda ari yo mahirwe ya nyuma bafite mu guhangana n’iki kibazo kimaze imyaka n’imyaka.

Minisitiri w’Intebe Rishi Sunak asanga u Rwanda ari yo mahirwe ya nyuma ku kibazo u Bwongereza buhanganye na cyo
  • KAMALIZA AGNES
  • Mutarama 31, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE