Dr. Biruta yongeye kugirirwa icyizere muri PSD

  • NTAWITONDA JEAN CLAUDE
  • Gashyantare 28, 2022
  • Hashize imyaka 2
Image

Dr. Biruta Vincent wari umaze igihe ari Perezida w’Ishyaka Riharanira Demukarasi n’Imibereho Myiza y’Abaturage “PSD” yongeye gutorerwa izi nshingano mu myaka itanu iri imbere.

Ni mu matora yabaye ku Cyumweru taliki 27 Gashyantare 2022, muri Kongere y’Igihugu ya Gatandatu ya PSD. Abatowe basimbuye abari baratowe muri Gicurasi 2016.

Dr. Biruta wari usanzwe ari Umuyobozi w’iri shyaka kuva mu 2003 yongeye kugirirwa icyizere atorerwa kuriyobora mu myaka itanu iri imbere.

Ni mu gihe Muhakwa Valens yatorewe kuba Visi Perezida wa Mbere asimbuye Amb Nduhungirehe Olivier wari umaze imyaka itanu kuri uwo mwanya.

Depite Muhakwa Valens watowe ku mwanya wa Visi Perezida wa mbere asimbuye Amb. Nduhungirehe Olivier

Ku mwanya wa Visi Perezida wa kabiri hongeye gutorwa Nyirahirwa Veneranda.

Depite Nyirahirwa Veneranda niwe wongeye gutorerwa umwanya wa Visi Perezida wa kabiri wa PSD

Dr Ngabitsinze Jean Chrysostome yongeye gutorerwa kuba Umunyamabanga Mukuru wa PSD mu gihe uwatowe ku mwanya w’Umunyamabanga Mukuru Wungirije ushinzwe uburinganire ari Uwanyirigira Gloriose.

Uwanyirigira Gloriose yatorewe umwanya w’Umunyamabanga Mukuru Wungirije ushinzwe uburinganire

Abandi batowe barimo Umunyamabanga Mukuru Wungirije ushinzwe Urubyiruko, Uwamahoro Pascaline n’ Umubitsi Mukuru, Muzana Alice.

Dr. Biruta wakoze mu myanya itandukanye muri Guverinoma y’u Rwanda kuri ubu akaba ari Minisitiri w’Ububanyi n’Amahanga n’Ubutwererane, yagiye muri PSD mu 1991.

Yavuze ko mu myaka itanu iri imbere ashaka gukomeza gufatanya n’abarwanashyaka mu kubaka ubushobozi bwa PSD mu bijyanye na politiki ndetse n’ubukungu.

Ati: “Ntabwo nshidikanya ko muri iyi myaka itanu iri imbere ishyaka ryacu rizakomeza kugira uruhare mu iterambere ry’igihugu cyacu dufatanyije n’abandi.”

Mu mpanuro yahaye abatorewe kuyobora iri shyaka, Dr. Iyamuremye Augustin, Perezida wa Sena y’u Rwanda akaba n’umwe mu bamaze igihe ari abayoboke b’iri shyaka yavuze ko abahawe inshingano abizeyemo ubushobozi bwo kuzakomeza guteza imbere PSD.

Ati: “PSD yubakiye ku bintu bitatu bikomeye, PSD ishingiye ku gihugu cyose, abaturage bose, urubyiruko, abari hagati n’abakuze. PSD ifite abaturage benshi bayiri inyuma kandi ifatanya n’indi mitwe ya politiki.”

Dr. Iyamuremye yibukije abatowe gukomeza gushyira mu bikorwa imirongo migari ya PSD no kugira uruhare mu kubaka igihugu.

PSD yatangije ikigo cy’ishoramari

Muri kongere yo kuri iki Cyumweru, ubuyobozi bwa PSD bwagaragaje ko nyuma yo gusanga imisanzu itangwa n’abarwanashyaka itabasha gukora ibikorwa byose by’ishyaka, hatekerejwe uburyo rishobora gukora imishinga ibyara inyungu.

Umunyamabanga Mukuru wa PSD, Dr. Ngabitsinze Jean Chrysostome yavuze ko mu 2016 biturutse ku mafaranga bari bavanye mu nzu bafite ikodeshwa Kimihurura baguzemo ikibanza cya metero kare ibihumbi 14.

Ni ikibanza cyaguzwe miliyoni 200Frw, aho ubuyobozi bwahise butangira gukora inyingo y’uburyo cyabyazwa umusaruro cyangwa se hakubakwamo inyubako yagirwa icyicaro cya PSD.

Dr. Ngabitsinze yavuze ko muri uko gutekereza, haje kuboneka umushoramari ushaka kuguraho igice kimwe, aza kumvikana n’ubuyobozi bwa PSD aho yaguzeho metero kare ibihumbi bitatu kuri miliyoni 250Frw.

Dr. Ngabitsinze ati : “Ndagira ngo aha ngaha mpasubiremo neza, kugura ikibanza cya miliyoni 200Frw, hanyuma ukagurishaho igice kimwe cya metero kare ibihumbi bitatu ukavanamo miliyoni 50Frw zirenga z’inyungu.”

Yakomeje agira ati : “Aho ngaho ndumva twarahisemo neza nka biro politiki kugira ngo dukore icyo gikorwa. Ubu rero hasigaye ubuso bugera kuri metero kare ibihumbi 10, [burenga hegitari imwe].”

Ubuso busigaye kuri ubu bufite agaciro k’arenga miliyari 1Frw.

Dr. Ngabitsinze yavuze ko ayo mafaranga miliyoni 250Frw yakoreshejwe mu kugura inzu y’ibyumba birenga umunani iherereye mu Kagarama, Akarere ka Kicukiro, ikaba yaraguzwe miliyoni 230Frw.

Umunyamabanga Mukuru wa PSD, Dr. Ngabitsinze Jean Chrysostome

Ati : “Ubu iyo nzu itwinjiriza miliyoni 1.7Frw buri kwezi. Kandi turabona ko ari inyungu ikomeye urebye aho isoko rigana muri kariya gace ka Kagarama, mu minsi mike tuzongera guhura yarabyaye inyungu nyinshi kandi dusangiye twese nk’abayoboke.”

Muri Kongere iheruka, Abarwanashyaka ba PSD bari basabye ko batangiza ikigo gikora ishoramari, ndetse kuri ubu ngo ibisabwa byose byarabonetse ndetse yamaze kwandikishwa mu Rwego rw’Iterambere “RDB”, kikaba cyarahawe izina rya TOP Investment Limited.

Dr. Ngabitsinze ati : “Impamvu y’iyo kompanyi kwari ukugira ngo dutandukanye ibikorwa tubamo twe nk’abanyepolitiki nk’ishyaka kugira ngo tunubahirize amategeko atandukanye ajyanye no gushora imari.”

Ni ikigo kizaba gishinzwe kugenzura umunsi ku munsi ibikorwa bibyara inyungu bya PSD, ndetse kikanafasha mu bijyanye no gucunga umutungo.

Ati : “Icyo kigo ni 100% PSD, kandi abafitemo imigabane nitwe PSD kandi n’ubuyobozi bwacyo burimo bamwe muri twe abarwanashyaka.”

Abanyamuryango ba PSD by’umwihariko abitabiriye kongere, bamurikiwe abagize Inama y’Ubutegetsi ya TOP Investment Ltd ndetse n’abayobozi bayo.

Barimo Mukunde Angelique, De Bonheur Jeanne d’Arc ndetse na Uhagaze Charles. Ni mu gihe Umuyobozi Nshingwabikorwa wa TOP Investment Ltd ni Rindiro Jean Chrysostome.

Ubuyobozi bw’Ihuriro ry’Imitwe ya Politiki mu Rwanda « NFPO » nabwo bwashimye iki gitekerezo cya PSD cyo gutangiza ikigo gikora ishoramari.

Umuvugizi Wungirije wa NFPO, Uwimanimpaye Jeanne D’Arc akaba ari umunyamuryango wa FPR Inkotanyi yavuze ko mu nshingano z’imitwe ya politiki harimo uguharanira iterambere ry’abayoboke.

Ishyaka Riharanira Demokarasi n’Imibereho Myiza y’Abaturage « PSD » ryatangiye gukorera mu Rwanda muri Nyakanga 1991. Intego nyamukuru y’iri shyaka ni uguharanira ubutabera, ubwisungane n’amajyambere.

  • NTAWITONDA JEAN CLAUDE
  • Gashyantare 28, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE