Dore icyatumye Perezida Kagame yihaniza  urubyiruko “ruramya ubukene”

  • NTAWITONDA JEAN CLAUDE
  • Kanama 27, 2023
  • Hashize amezi 9
Image

Impanuro za Perezida wa Repubulika y’u Rwanda Paul Kagame yihaniza urubyiruko rwagenze iminsi irenga itatu rujya “kuramya ubukene” zakwirakwiye mu bitangazamakuru, ariko hari bimwe bikorera mu mahanga byabisobanuye  mu buryo budahwitse kuko byatubuye inkuru y’ibitavuzwe. 

Nyuma yo kumva ko urwo rubyiruko rwagiye ahantu habonekeye, bamwe mu banditsi bahise babisamira hejuru babihuza n’umutambagiro mutagatifu ukorerwa i Kibeho, ariko ibisobanuro byatanzwe na Minisitiri w’Urubyiruko Dr. Jean Nepo Abdallah Utumatwishima bigaragaza ko ahavugwaga hatandukanye n’i Kibeho. 

Aho Umukuru w’Igihugu yakomoje ni ku Murwa wa Bikira Mariya “Umubyeyi w’Abakene” uherereye ku Musozi wa Crête Congo Nil mu Mudugudu wa Nduba, Akagari ka Congo Nil, mu Murenge wa Gihango mu Karere ka Rutsiro.

Uwo murwa ugizwe n’ibice bitatu, ari byo Ingoro y’Umubyeyi Bikira Mariya, Paruwasi ya Crête Congo Nil n’Umusozi wa Karuvariyo, abakirisitu gatolika baterera bagamije kongera kwiyuzuza n’Imana.

Ubwo yagezaga ubutumwa ku rubyiruko rusaga 2000 rw’abayobozi rwitabiriye Ihuriro ry’Urubyiruko rizwi nka “Youth Connekt” rwishimira imyaka 10 rimaze rihindura ubuzima n’imibereho y’urubyiruko rw’u Rwanda, Perezida Kagame yavuze ko bidakwiye ko abantu baramya ubukene cyangwa icyagira abantu abakene. 

Imihango ngarukamwaka ikorerwa ku Murwa wa Bikiramariya, harimo kuba abakirisitu bamara iminsi itatu baterera Umusozi Karuvariyo bambaza uwo Nyina wa Yezu ufatwa nk’Umubyeyi w’Abakene ari na we watuwe Diyosezi Gatolika ya Nyundo yigeze kwibasirwa n’ubukene bukabije mu myaka yo hambere. 

Perezida Kagame yagize ati: “Njye nagira ngo n’iyo musenga, muba musaba ibyabateza imbere, musaba ibyabakiza mukava mu bukene. Nta muntu waramya ubukene ntibibaho…”

Iyo mihango ikurura ibihumbi by’abakirisitu Gatolika buri mwaka, kandi abenshi muri bo ni urubyiruko. Amasengesho aheruka yabaye muri Kamena uyu mwaka, Minisitiri Dr. Utumatwishima akaba ari we wari Umutumirwa Mukuru. 

Yavuze ko yatunguwe ndetse anababazwa no kwibonera ibibera muri ayo masengesho, aho abayitabira bagenda amanywa n’ijoro batarya, batanywa kandi barara hanze, nta mutekano bacungiwe kandi nta n’ibikorwa remezo by’isuku cyangwa ibindi byose bikenerwa ahahurira abantu benshi bihari. 

Bivugwa ko uwo mutambagiro n’amasengesho byatangijwe na Musenyeri Aloys Bigirumwami wayoboraga Diyosezi ya Nyundo mu 1954. Kuva icyo gihe kugeza uyu munsi abiganjemo urubyiruko bamara iminsi itatu bagenda n’amaguru baturutse mu bice  bya Rusizi, Rubavu, Ngororero, Nyabihu na Rutsiro. 

Minisitiri Dr. Utumatwishima yagize ati: “Hari ibintu bimwe na bimwe bitakijyanye n’igihe mu by’ukuri, ibintu udashobora gukora uyu munsi n’uyu mwaka. Hari uburyo bukwiriye abantu bashobora gukoramo umutambagiro mutagatifu nk’ukorerwa i Kibeho. Ababitegura bakwiye kuzirikana umutekano w’abawitabira. Uko umuhango “w’Umubyeyi wacu w’Abakene” wakorwaga mu 1954 ni na ko ugikorwa uyu munsi, ibyo bikwiye guhinduka.”

Yakomeje avuga ko kimwe mu bikwiye guhinduka ari izina ryahujwe n’uwo mutambagiro n’ahantu bibera hakomeza kwimakaza imyumvire ya gikene kuko bishobora kugira ingaruka zihoraho ku rubyiruko. 

Yabwiye The New Times ati: “Mu ijambo nabagejejeho, nababwiye gutaha bagasubira ku ishuri, bagatangira ibikorwa by’ubukungu bibateza imbere kuko na Yezu ubwe atigeze atoranya intumwa zidakora… gusenga biremewe ariko mukwiye kuba mukora cyane kugira ngo mwikure mu bukene.”

Dr. Utumatwishima yavuze ko Minisiteri y’Urubyiruko na Polisi y’u Rwanda bazakomeza gukorana bya hafi n’abategura ayo masengesho n’umutambagiro mutagatifu kugira ngo bikorwe mu buryo butayobya urubyiruko. 

Ingoro y’Umuvyeyi Bikira Mariya ku Musozi wa Crête Congo-Nil i Rutsiro
  • NTAWITONDA JEAN CLAUDE
  • Kanama 27, 2023
  • Hashize amezi 9
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE