Diamond Platnumz yatanze ibyishimo ku Banyakigali

Umuhanzi ukomoka muri Tanzania Diamond Platnumz yatanze ibyishimo bisendereye ku bakunzi b’umuziki we bitabiriye igitaramo cye yakoreye i Kigali.

Ni igitaramo cyabaye mu ijoro ry’itariki 29 Kanama 2026, muri BK Arena ahasanzwe haparikwa imodoka.

Abitabiriye batangiye kuhagera saa kumi n’ebyiri z’umugoroba batangira gufashwa kwinjira aho igitaramo cyabereye baganira ari na ko basangira, abandi bamenyana.

Ahagana sa 8:00, ni bwo abashyushyarugamba Rocky Try na Michael Sengazi bageze ku rubyiniro, batangiza igitaramo cya ’Diamond Platnumz Experience’.

Bahise baha ikaze Dj Khizz Beats aho yatangiye gususurutsa abantu binyuze mu ndirimbo zitandukanye yavanze zabafashaga kunyeganyeza umubiri.

Diamond Platnumz wari utegerejwe n’abatari bake yegeze ku rubyiniro ahagana saa sita z’ijoro n’iminota yinjirira mu ndirimbo Pom Pom aherutse gufatanya na Bruce Melodie.

Uyu muhanzi wakiranywe urugwiro yahise akomereza kuri “Komasava” yakoze mu 2024, n’izindi zose zakunzwe aho atigeze atanga agahenge ku bitabiriye igitaramo ahubwo babyinaga ari nako baririmbana ijambo ku rindi.

Uretse Diamond hari n’abandi bahanzi nyarwanda bataramiye abitabiriye barimo Bruce Melodie wageze ku rubyiniro ahagana saa tanu n’iminota 43, aririmba izirimo Katerina, Izina na Katapilla, ati “igitaramo turagitangije.”

Akomereza kuyitwa Akinyuma, Saa Moya, Munyakazi, Turaberanye, ‘Complete me’ asoreza kuri Selebura, Pom Pom, Kungola na Henzapu.

Muri icyo gitaramo hanaririmbyemo Ish Kevin waririmbye ize zitandukanye harimo My Year, Amakosi, Bro code, Vayo, Clout na Kibasumba n’izindi nyinshi.

Nel Ngabo wagiye ku rubyiniro ari uwa kabiri yinjiriye mu ndirimbo “Zoli,” Nywe, n’izindi yaririmbye agendana n’abitabiriye ijambo ku rindi.

Abavanga umuziki barimo Dj Etania wo muri Uganda na Dj Marnou ni bo bavanze umuziki  bashimisha abitabiriye.

Imyambarire yitaweho

Kamwe mu dushya kabonetse muri icyo gitaramo, ni uko imyambatire yitaweho aho umuntu yazaga yambaye imyenda migufi agasubizwa inyuma basabwa kujya guhindura kugira ngo bemererwe kwinjira bitandukanye n’ibyari bisanzwe mu rwego rwo guca ubwomanzi mu bakobwa bitabiraga ibitaramo bambaye imyenda itabambitse bikwiye.

Diamond Platnumz ataramiye mu Rwanda nyuma y’imyaka itatu atahataramira kuko yahaherukaga muri 2023, mu bitaramo bya Trace Awards na Giants of Africa Festival.