COVID-19: Amerika imaze guha u Rwanda doze hafi miliyoni 5.3 z’inkingo  

  • NTAWITONDA JEAN CLAUDE
  • Gashyantare 27, 2022
  • Hashize imyaka 2
Image

Leta Zunze Ubumwe z’Amerika (USA) zimaze guha u Rwanda inkingo za COVID-19 zikabakaba miliyoni 5.3 muri gahunda ikomeje y’icyo Gihugu yo gukomeza gushyigikira urwego rw’ubuzima mu Rwanda, by’muwihariko mu rugamba rwo kurandura icyorezo cya COVID-19

Izo nkingo zageze kuri doze 5,295,630 zuzuye nyuma y’aho icyo gihugu kigereje mu Rwanda doze 999,180 zo mu bwoko bwa Pfizer ku wa Kane taliki ya 24 Gashyantare 2022, zikaba zije ziyongera ku zindi zageze mu Rwanda mu bihe bitandukanye guhera mu mpera z’umwaka ushize.

Ambasade ya USA mu Rwanda itangaza ko 27% by’inkingo icyo gihugu cyahaye u Rwanda zamaze gukwizwa mu Gihugu no guhabwa abaturage, kikaba ari kimwe mu bikorwa bifite agaciro ka miliyari 28 z’amafaranga y’u Rwanda icyo gihugu kimaze gukora mu Rwanda mu rwego rwo guhangana na COVID-19.

Binyuze muri iyo mpano, USA itangaza ko ikomeje ubufatanye na Guverinoma y’u Rwanda mu rugamba rwo kurinda ubuzima bw’Abanyarwanda.

Ibindi bikorwa USA zakoze muri uru rugamba harimo gutanga ibikoresho by’ubuvuzi n’amahugurwa mu bigo by’ubuvuzi 351, Ibitaro by’Uturere 21, Ibitaro byo ku rwego rw’Intara 2 n’ibindi byo ku rwego rw’Igihugu 2.

Icyiciro gishya cyageze mu Rwanda ku wa Kane w’iki cyumweru

Muri iyo gahunda kandi hanavuguruwe ibitaro bitandukanye hagamijwe kuhahanga santeri zihariye zakira kandi zikanavura abarwayi ba COVID-19. Santeri z’ubuvuzi umunani zabashije kugezwaho ibikoresho by’ubuvuzi bigezweho bitabara ubuzima bw’abatari bake birimo imashini zitanga umwuka, izicunga umwuka n’ibyuma biwubika, ndetse n’utwuma dukora ubugenzuzi bw’uko ubuzima bw’abarwayi buhagaze.

Muri ibyo bikoresho harimo ibitanga umwuka (ventilators) 100 byakorewe muri Amerika, imashini 6 zifotora umubiri zikoresheje imirasire (X-ray), utwuma 96 dufata amashusho yo mu muhogo n’indi myanya y’ubuhumekero (laryngoscopes) n’udukoresho dupima imiterere y’umutima 8,300.

Ibikoresho byo gupima COVID-19 byatanzwe na USA birabarirwa muri miliyoni 2.6 n’imyenda irinda abaganga kwandura ikaba igera ku 725,000.

Muri gahunda yo guhugura abaganga bahangana n’iki cyorezo yakorerwaga ku mavuriro (FETP) hoherejwe impuguke 37 zagiye gufasha abari mu rugamba rwo guhangana n’iki cyorezo binyuze mu gukurikirana abanduye no kubavura.

Muri iyo gahunda kandi hanahuguwe Abanyarwanda bari ku ruhembe rw’imbere mu rugamba rwo guhangana n’icyo cyorezo bagera kuri 87 baturutse mu turere 20.

Umuyobozi ushinzwe inyungu za USA mu Rwanda Deb MacLean, yagize ati: “Inkunga ya Leta Zunze Ubumwe z’Amerika ya doze miliyoni 5 z’inkingo, zirimo izikabakaba miliyoni imwe zahageze muri iki cyumweru, ishimangira imbaraga iki gihugu gishyira mu rugamba rwo guhashya burundu iki cyorezo, n’agaciro k’ubufatanye bwacu n’u Rwanda mu guharanira ubuzima bwiza.”

Yakomeje agira ati: “Turashishikariza buri wese gufatirana ayo mahirwe y’inkingo mu kwirinda, mu kurinda imiryago yabo ndetse n’umuryango mugari muri rusange.”

Kuva icyorezo cya COVID-19 cyagaragara ku Isi, Leta Zunze Ubumwe z’Amerika ziyemeje gushora ayo mafaranga akabakaba miliyari 30 yo guhashya iki cyorezo mu Rwanda, ari na yo yatanze umusaruro mu bikorwa bimaze gutanga umusaruro ufatika mu gihugu.

Mu ruhando mpuzamahanga, USA ziyemeje gutanga nibura doze miliyari 1.1 z’inkingo bitarenze mu mwaka wa 2023 mu bufatanye na Gahunda yo gusaranganya inkingo (COVAX), Ishami ry’Umuryango w’Abibumbye ryita ku Buzima (WHO), Ishami ry’Umuryango w’Abibumbye ryita ku Bana (UNICEF), n’ibihugu by’abafatanyabikorwa.

Binyuze muri ubwo bufatanye, ubuyobozi bwa Leta Zunze Ubumwe z’Amerika bukomeje guhagarara neza mu ntego bwiyemeje yo guharanira ko izo nkingo zigejejwe ku bazikeneye cyane kurusha abandi hagamijwe guhagarika burundu iki cyorezo.

  • NTAWITONDA JEAN CLAUDE
  • Gashyantare 27, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE