CICR yasobanuye impamvu yatangiye ibikorwa by’amategeko agenga intambara

  • NTAWITONDA JEAN CLAUDE
  • Ukwakira 17, 2022
  • Hashize umwaka 1
Image

Komite Mpuzamahanga y’Umuryango Utabara imbabare (CICR) ishami ry’u Rwanda kuva mu 1963 ariko ukagira icyicaro gihoraho mu Rwanda kuva mu 1990, watangaje ko watangiye ibikorwa byo gusakaza amategeko mpuzamahanga agenga intambara (IHL).

Ni mu kiganiro cyihariye Imvaho Nshya yagiranye na Namahoro Juien, umukozi ushinzwe ishami ry’itumanaho no gukumira n’ibikorwa byo kumenyekanisha amategeko muri CICR.

Namahoro avuga ko kuva mu 1990, CICR yatangiye gusakaza ibikorwa n’amategeko agenga urugamba kugira ngo urubyiruko, abarimu, abashinjacyaha n’abagenzacyaha bose bamenye amategeko ndetse n’abaturage muri rusange.

Hibandwa by’umwihariko ku guhugura abasirikare n’abapolisi. Ati: “Birumvikana iyo intambara ibaye umusirikare ni we ufata imbunda akajya ku rugamba, yaba ari ukurengera igihugu cyangwa izindi mpamvu runaka.

Hari abo arwana nabo, hari abo asanga ku rugamba, ashobora kuba ari imitwe yitwaje intwaro arwana nayo cyangwa abandi basirikare bigometse ku butegetsi n’ibindi.

Ariko aha hantu ahasanga abasiviri barimo ba baturage basanzwe, abo bose mu by’ukuri ari ugiye ku rugamba, ari ushoje urugamba hari amategeko amugenga agomba kubahiriza byanze bikunze”.

Umusirikare wakomeretse agatakaza ukuboko abarwa nk’aho atagifite uruhare rufatika ku rugamba, icyo gihe na we agomba kurengerwa.

Ati: “Hari uwamanitse amaboko kubera ko wenda adafite imbaraga ku rugamba, icyo gihe na we tumubara nk’imfungwa y’intambara, abo na bo bararengerwa.”

Avuga ko n’abanyamakuru batara inkuru mu gihe cy’urugamba abo bose amategeko y’i Geneve yasinywe mu 1949 abarengera.

Akomeza avuga ati “Turagenda tukagera kuri wa muturage wo hasi wagizweho ingaruka n’intambara tukamubwira ko na we nubwo aya mategeko amurengera ariko na we aramutse ateye intambwe yo kwinjira muri ya mirwano, atakaza kwa kurengerwa.

Ibi byose turabimenyekanisha kandi ntitubikorera mu bihugu birimo intambara cyangwa amakimbirane, tubikora mu bihugu byose n’ibirimo amahoro.

Iyo tuvuze gukumira, twebwe nka CICR nta mbaraga dufite zo gukumira intambara ariko niduhamagara abana biga amategeko bazavamo abayobozi b’igihugu, abashinjacyaha, abagenzacyaha, abacamanza, bazamenya amategeko n’ibintu bibujijwe ku rugamba.

Icyo gihe iyo haramutse habayeho ikibazo bamenya uburyo bitwara”.

Aha ni ho ahera asobanura impamvu CICR yashyizeho uburyo bwo gushishikariza no gukangurira abantu amategeko agenga urugamba.

Julien Namahoro umuyobozi w’ishami ry’itumanaho muri CICR

Ashimangira ko nibaramuka bagiye muri ibyo bihe by’intambara, bazamenya ibyo bagomba gukora n’ibyo bagomba kureka.

CICR itegura amarushanwa ngarukamwaka ku mategeko mpuzamahanga agenga intambara

Umuryango Mpuzamahanga utabara imbabare CICR mu mpera z’icyumweru gishize taliki 15 Ukwakira 2022 wasoje amarushanwa y’iminsi ibiri ku mategeko mpuzamahanga yahuje za kaminuza eshanu zigisha amategeko mu Rwanda.

Maliza Latifah, umunyeshuri muri Kaminuza ya Kigali yegukanye umwanya wa kabiri, yishimira ko yungukiye ubunararibonye muri aya marushanwa yiswe ‘Moot Court Competition on International Humanitarian Law’ bityo agasobanukirwa birushijeho amategeko agenga intambara.  

Monisha Adikhari, umunyeshuri muri Kaminuza y’u Rwanda yishimiye intsinzi begukanye muri aya marushanwa.

Ati: “Aya marushanwa twayigiyemo byinshi kandi twishimiye umwanya wa mbere twatsindiye”.

Serugo Jean Baptiste, umwarimu muri Kaminuza y’u Rwanda mu ishami ry’amategeko, asobanura ko amarushanwa ategurwa na CICR afasha abanyeshuri gushyira mu bikorwa ibyo bize.

Ati: “Dufite isomo twigisha rijyanye n’amategeko agenga ibihe by’intambara, iryo somo rero kugira ngo tumenye neza ko barifashe biba ngombwa ko duhuza abanyeshuri biga amategeko muri za kaminuza zitandukanye kugira ngo bagire imyumvire imwe ibyo tukabigeraho ku bufatanye na CICR”.

Itsinda ry’abanyeshuri biga amategeko muri Kaminuza y’u Rwanda niryo ryegukanye umwanya wa mbere rikazahagararira u Rwanda mu irushanwa ryo ku rwego rwa Afurika rizwi ku izina rya ‘All Africa Moot Court Competition’ rizabera muri Tanzania mu kwezi gutaha.

  • NTAWITONDA JEAN CLAUDE
  • Ukwakira 17, 2022
  • Hashize umwaka 1
TANGA IGITEKEREZO
Kagabo j.pierre says:
Ukuboza 4, 2022 at 4:01 pm

Kayitare wacu urabashya komerezaho kko ufite inararibonye muribyose

Andika igitekerezo

AMATEGEKO AGENGA IYANDIKA RY'IGITEKEREZO CYAWE