CHAN 2022 : Ikipe y’u Rwanda izakina  hagati ya   Ethiopia  na  Sudani  y’Epfo mu gushaka itike

  • Imvaho Nshya
  • Gicurasi 26, 2022
  • Hashize imyaka 2
Image

Kuri uyu wa Kane 26 Gicurasi 2022 ni bwo habaye tombola y’uko amakipe azahura mu mikino yo gushaka itike y’imikino y’Afurika y’amakipe y’ibihugu mu bakinnyi  bakina  imbere mu gihugu «CHA 2022 » izabera muri Algeria taliki 8 kugeza 31 Mutarama 2023 ikitabirwa ku nshuro ya mbere n’amakipe 18 avuye kuri 16.

Ubusanzwe imikino yo gushaka itike ikinirwa mu bice « Zone ».  Mu Karere k’Afurika y’Uburasirazuba no hagati aho u Rwanda ruherereye hari amakipe 9 agomba kuvamo amakipe 3. Aya makipe ni u Rwanda, Uganda, Sudan, Tanzania, Ethiopia, Burundi, South Sudan, Somalia na Djibouti.

Imikino yo gushaka itike izakinwa mu byiciro 2 aho icyiciro cya mbere kirimo amakipe 6  azakina  hakazamuka 3 hanyuma ahure n’amakipe 3 atazakina imikino y’ijonjora y’icyiciro cya mbere ubundi amakipe 3 yitwaye neza abone itike ya CHAN 2022.

Uko imikino yo gushaka itike izagenda

Hagati ya taliki 22 na 24 Nyakanga 2022, ikipe ya Ethiopia izakina na South Sudan, Somalia ikine na Tanzania naho u Burundi bukine na Djibouti.

Nyuma y’iyi mikino ibanza, hagati ya taliki 29  na 31 Nyakanga 2022 hazaba imikino yo kwishyura hanyuma  amakipe azitwara neza akomeze mu cyiciro cya kabiri ari na cyo cya nyuma.

Hagati ya taliki 26 na 28 Kanama 2022, ikipe izatsinda hagati ya Ethiopia na South Sudan izahura n’ikipe y’u Rwanda. Ikipe izakomeza hagati ya Somalia na Tanzania izakine na Uganda  naho  izakomeza hagati y’u Burundi na  Djibouti ihure na Sudan.

Nyuma y’imikino ibanza, hagati ya taliki 02 na 04 Nzeri 2022 hazaba imikino yo kwishyura aho amakipe 3 azitwara neza azabona itike y’imikino ya nyuma ya  CHAN 2022 izabera muri Algeria.

Mu gushaka itike ya CHAN 2020, ikipe y’u Rwanda “Amavubi”  yasezereye ikipe y’igihugu ya Ethiopia.

Imikino ya CHAN 2020 ari na yo iheruka yabaye muri 2021 kubera COVID-19, Akarere k’Afurika y’u Burasirazuba kari kaserukiwe na Uganda, u Rwanda na Tanzania.

Mu nshuro 6 iri rushanwa rimaze gukinwa, u Rwanda rumaze kwitabira inshuro 4 (2011, 2016, 2018 na 2020). Muri CHAN 2011 na CHAN 2018, ikipe y’u Rwanda yaviriyemo mu majonjora naho muri CHAN 2016 na CHAN 2020, ikipe y’u Rwanda yaviriyemo muri ¼ .  

  • Imvaho Nshya
  • Gicurasi 26, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE