Champions League: Manchester City yageze muri 1/8

  • Imvaho Nshya
  • Ugushyingo 8, 2023
  • Hashize amezi 7
Image

Ibitego bibiri bya Erling Haaland byafashije Manchester City kugera muri 1/8 cya UEFA Champions League y’uyu mwaka w’imikino, mu gihe AC Milan yihagazeho ku kibuga cyayo ikahatsindira Paris Saint-Germain ibitego 2-1.

Ku mugoroba wo kuri uyu wa Kabiri, tariki ya 7 Ugushyingo, hakinwe umunsi wa kane w’amatsinda ya UEFA Champions League kuva mu itsinda E kugeza mu itsinda H.

Ku kibuga Etihad Stadium mu mujyi wa Manchetser, ibitego bibiri bya Erling Haaland birimo icya penaliti n’ikindi cyinjijwe na Phil Foden byafashije Manchester City gutsinda Young Boys y’abakinnyi 10, ibitego 3-0.

Iyi kipe yo mu Bwongereza inafite igikombe giheruka yahise iba iya mbere ibonye itike ya 1/8 kuko yagize amanota 12 kuri 12 mu Itsinda G, izamukana na RB Leipzig yagize amanota icyenda nyuma yo gutsindira FK Crvena Zvezda iwayo ibitego 2-1. Andi makipe yo muri iri tsinda, yombi afite inota rimwe mu gihe hasigaye imikino ibiri y’amanota atandatu.

AC Milan yatsinze PSG

Mu mukino wari utegerejwe na benshi ku kibuga san siro, AC Milan yari yakiriye Paris Saint-Germain yo mu Bufaransa iyi kipe yo mu Butaliyani, yitwara neza mu rugo itsinda ibitego 2-1 byombi byinjiye mu bice byombi by’iminota yakinwe.

PSG ni yo yafunguye amazamu ku gitego cyinjijwe na Milan Skriniar ku mupira wahinduwe na Marquinhos ku munota wa cyenda, nyuma y’iminota itatu cyishyuwe na Rafael Leão ku munota wa cumi na kabiri.

Byasabye gutegereza umunota wa 50 mu gice cya kabiri cy’umukino, AC Milan ibona igitego cya kabiri cyatsinzwe na Olivier Giroud n’umutwe ku mupira wahinduwe na Theo Hernández, aroba umunyezamu Gianluigi Donnarumma.

Muri uyu mukino abafana ba AC Milan bataye amafaranga y’amiganano mu kibuga ku munyezamu w’Umutaliyani wavuye mu ikipe Gianluigi Donnarumma akerekeza muri PSG.

Muri iri tsinda F, Borussia Dortmund yafashe umwanya wa mbere n’amanota arindwi nyuma yo gutsinda Newcastle United ibitego 2-0, PSG ijya ku mwanya wa kabiri n’amanota atandatu, mu gihe Milan AC yagize amanota atanu, ikurikiwe n’ikipe yo mu Bwongereza ifite amanota ane.

Mu yindi mikino yabaye, Atlético Madrid yagize amanota umunani mu Itsinda E nyuma yo kunyagira Celtic y’abakinnyi 10 ibitego 6-0, ikurikirwa na Lazio yagize amanota arindwi itsinze Feyenoord igitego 1-0.

Nubwo yatsinzwe na Shakhtar Donetsk igitego 1-0, FC Barcelone yakomeje kuyobora itsinda H n’amanota icyenda, iyanganya na FC Porto yo yatsinze Royal Antwerp ibitego 2-0.

Imikino iteganyijwe kuri uyu wa Gatatu tariki ya 8 Ugushyingo

Itsinda A

Bayern Munich irakina na Galatasaray saa yine z’ijoro

FC Copenhagen irakira Manchester United saa yine z’ijoro

Itsinda B

Arsenal irakira Seville CF saa yine z’ijoro

PSV Eindhoven irakira Lens saa yine z’ijoro

Itsinda C

Napoli irakira Union Berlin saa moya na mirongo ine n’itanu

Real Madrid irakira SC Braga saa yine z’ijoro

Itsinda D

Real Sociedad irakira Benfica saa moya na mirongo ine n’itanu

FC Salzburg irakira Inter Milan saa yine z’ijoro

SHEMA IVAN

  • Imvaho Nshya
  • Ugushyingo 8, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE