Cecile kayirebwa yambitswe ikamba mu gitaramo cyo kumushimira

Ku  wa Gatandatu tariki ya 30  Werurwe 2024, Cecile Kayirebwa yashimiwe n’abakunzi be bamwambika ikamba, mu gitaramo cyiswe ‘Dushimire Kayirebwa’ cyabereye i Kigali.

Ni gikorwa cyatangijwe no gususurutsa abaitabiriye igitaramo ndetse banashyira ku meza indabo z’amaroza (roses) nk’ ikimenyetso cy’urukundo bamufitiye.  

Kayirebwa Cecile kaba n’umushyitsi mukuru yahageze ahagana saa moya,  akaba yahageranye n’abamuherekeje harimo  umukobwa we.

Uyu mubyeyi washimiwe afatwa nk’ikingi ya mwamba akaba n’umunyabigwi mu muziki w’u Rwanda.

Ari mubahanzi bakomeye kandi bafite indirimbo zikunzwe na n’ubu zigikunzwe,  zirimo None Twaza, Iwacu, Ubumanzi, n’izindi.

Ubwo yahabwaga ijambo ngo agaragaze akamuri ku mutima nyuma yo kwambikwa ikamba, Cecile  Kayirebwa yashimiye mu magambo atatu, agira ati: ”Ndabashimira cyane, cyane ariko! Mwankoreye ikintu gikomeye.”

Mu kiganiro Imvaho Nshya yagiranye na Rusakara Jean De Dieu wateguye iki gitaramo, yagagaragaje imbamutima yatewe n’uko iki gitaramo bateguye igihe kinini cyagenze neza.

Yaguze ati: “Ndishimye cyane kuko ibyo natekerezaga byabaye, nishimye kandi na we ku maso byagaragara ko yishimye.”

Rusakara yashimangiye ko gushimira Kayirebwa ari intangiriro yo gushimira abahanzi b’abanyabigwi bagize uruhare rukomeye mu iterambere ry’umuziki w’u Rwanda cyane cyane uwa gakondo.

Yavuze ko imwe mu mpamvu bahereye ku gushimira Kayirebwa ari uko ari we muhanzikazi bafatiraho urugero bakaba bamufata nka nyirasenge mu muziki, ati: “Rero ku mushimira byari bikwiye.”

Yakomeje akomoza ku kiganiro yakoreye kuri KT Radio mugitondo aho Cecile Kayirebwa bamubajije uko yiteguye icyo gitaramo asubiza agira ati “Ni ubwa mbere ngiye gushimirwa, ntanarimwe nigeze nshimirwa kuva natangira kuririmba cyangwa ku gikorwa runaka.”

Rusakara yemeza ko “nyirasenge” mu nganzo yanyuzwe no kwicara na we bakamuririmbira indirimbo zimunyura harimo n’ize ku giti cye.

Ku rubyiniro hataramye abahanzi batanduknye bamenyerewe mu muziki wa gakondo na Karahanyuze, harimo Makanyaga Abdul akaba ameze imyaka 51 mu muziki,  Orchestre Impala, Murinzi n’abandi.

UWAMALIYA CECILE