Byinshi kuri Karame Rwanda Ltd imaze kuba ubukombe mu bwubatsi bw’imihanda 

  • Imvaho Nshya
  • Nzeri 28, 2023
  • Hashize amezi 5
Image

Karame Rwanda Ltd ni sosiyete ikora imirimo y’ubwubatsi bw’imihanda mu Mujyi wa Kigali ndetse no hirya no hino mu Rwanda, yatangiye mu 2006, amahitamo yayo akaba ashingiye ku gukunda igihugu nk’uko Umuyobozi Mukuru wayo, Munyakazi Sadate yabitangaje.

Ibisobanuro by’izina ry’iyi sosiyete y’ubwubatsi, ni ukwifuriza u Rwanda uburame kandi ko ruguhamagaye warwitaba.

Ubwo Munyakazi watangije Karame Rwanda yendaga kuzuza imyaka 25, ubuzima bwe bw’ubucuruzi yiteguraga kujyamo, yumvise izina ryiza yabuha ari uko yakwitaba u Rwanda cyangwa akarwifuriza kurama.

Karame Rwanda ni sosiyete ifite ibikorwa binyuranye, ikorana n’Umujyi wa Kigali nko kubaka imihanda no kuyitaho mu gihe yangiritse, kubaka amateme, kuyobora amazi ndetse no kubaka ibiraro.

Iyi sosiyete igira gahunda zo kwirinda ibiza, aho basukura ruhurura kuko iyo zisibye zikazamo ibitaka ari byo bituma amazi ashobora kureka cyangwa akaba yanateza imyuzure.

Mu kiganiro Imvaho Nshya yagiranye na Munyakazi, yagize ati: “Tubyitaho bigatuma amazi ahora aca mu nzira yagenewe, bikarinda ibiza. N’ahabaye ibiza dufitanye amasezerano n’Umujyi wa Kigali ko twihutira kuhasana kugira ngo abaturage batajya mu kaga”.

Ibi ni bimwe mu bikorwa Karame Rwanda Ltd irimo gukora muri iyi minsi hakiyongeraho kubaka imihanda hirya no hino mu makaritsiye, cyane cyane ku bufatanye n’Umujyi wa Kigali n’abaturage.

Munyakazi yahamirije Imvaho Nshya ko muri Kibagabaga hubatswe site zigera kuri eshatu. Hari site ifite uduhanda turindwi, ifite uduhanda nka tubiri n’indi ifitemo agahanda kamwe.

Ati: “Ku Kacyiru naho hari amasite abiri, Bumbogo, Gasogi n’ahandi. Aho hose ni ibikorwa dukora ku bufatanye bw’Umujyi wa Kigali n’abaturage”.

Munyakazi Sadate, Umuyobozi wa Karame Rwanda Ltd

Bahisemo imirimo y’ubwubatsi hashingiwe ku isoko uko ryari rihagaze, basanga ari ho bajyamo neza mu kuyobora ishoramari ryabo kugira ngo na bo biteze imbere.

Yagize ati: “Ibikorwa by’ubwubatsi ni ibikorwa bihoraho Afurika ikeneye n’Igihugu cyacu by’umwihariko, twumvaga ari igice twagiriramo ubunararibonye kugira ngo twiteze imbere nka sosiyete ariko tunateze imbere Igihugu”.

Impamvu bahisemo gukoresha urubyiruko

Ubuyobozi bwa Karame Rwanda Ltd busobanura ko kwita ku rubyiruko ari ukwita ku hazaza h’Igihugu kuko ni rwo mizero y’ejo heza kandi akaba ari no kuruha amahirwe yo kugira ngo rugire ubunararibonye no kugira umusanzu rutanga mu kubaka Igihugu ruhereye ku kwiyubaka rwo ubwabo.

Munyakazi akomeza agira ati: “Ntabwo twanga n’abakuze ariko tubona yuko iyo umuntu afashe urubyiruko hari ikintu kinini cyane aba afashije Igihugu. Ku bagore ho ni umwihariko kubera ko batagiye bagaragara mu mirimo y’ubwubatsi, ni yo mpamvu twahisemo ko uzajya abikenera tuzajya tumufasha kandi biradushimisha kubona bashiki bacu baritinyutse bakumva yuko hari imirimo na bo bashobora gukora”.

Icyerekezo cya Karame Rwanda, Munyakazi avuga ko Iterambere ry’Umujyi wa Kigali n’iterambere ry’igihugu rigaragarira buri wese, aho mu 1994 ubwo Jenoside yakorewe Abatutsi yahagarikwaga n’ingabo zari iza RPF wasangaga igihugu kidafite ibikorwa remezo.

Agaragaza ko kuri ubu hari imihanda minini irimo kubakwa ariko ngo iyo winjiye muri karitse usanga hakiri imihanda y’icyondo, hari ivumbi no kuba hakigaragara imihanda idatunganye akaba ari yo mpamvu habayeho ubufatanye hagati y’Umujyi wa Kigali n’abaturage.

Ubuyobozi bwa Karame Rwanda bugira buti: “Ubwo bufatanye rero buduha yuko mu cyerekezo cyacu twifuza ko bizagera umwaka utaha nibura ibilometero bitari munsi y’ijana (Km 100) byaba bitunganyije ku buryo abaturage baba bafite imihanda itunganyije”.

Imyumvire y’umuturage isigaye iteye imbere. Ibi Munyakazi abishingira ku kuba ngo umuturage asigaye yumva neza kugira uruhare mu bimukorerwa icyo bivuze.

Ati: “Iki ni ikimenyetso cyiza cy’igihugu kirimo gutera imbere kandi kirimo kwiyubaka, haba mu bumwe, mu iterambere ndetse no mu guteza imbere igihugu cyacu mu bijyanye n’imyumvire y’abenegihugu.

Bafite imashini zigezweho zibafasha gutunganya imihanda mu buryo burambye

Umuturage asigaye yumva agomba kugira uruhare mu bimukorerwa birumvikana ko ahita agira uruhare mu kurinda ibyo yagezeho”.

Uko Karame Rwanda yakiriye igisubizo Perezida Kagame aherutse guha Abanyarwanda

Munyakazi Sadate yabwiye Imvaho Nshya ko nk’abikorera bo ari ugukomeza (Continuité) ibyiza igihugu kigeraho n’iterambere ryacyo.

Avuga ko Igihugu giha amahirwe angana abaturage bacyo kandi bakangana n’imbere y’amategeko n’Igihugu.

Atanga urugero rw’aho kera wasangaga umuntu atamenya aho akazi ka Leta gatangirwa cyane ko ngo Leta ari we Mukoresha munini muri iki gihugu.

Ubu ngo bazi aho ako kazi gatangirwa, habaho ipiganwa, umuntu agatsindira isoko akarikora yanarirangiza akishyurwa.

Yagize ati: “Nk’uwikorera, gukorera mu gihugu kimeze gutyo cyangwa kuvuka k’ubucuruzi bwanjye bukavukira mu gihugu kiri kuri gahunda gutyo, Umuyobozi wabikoze mba numva yuko kutubwira ngo aziyamamaza umwaka utaha, twe tuba twumva dusubijwe ubwiza n’ubundi turimo.

Dusubizwa gutera imbere kw’Igihugu ndetse no gukomeza kugira icyizere cy’umutekano nk’urutirigongo rw’iri terambere dufite.

Navuga yuko njye nk’uwikorera ari ikintu cyiza kandi cyanshimishije kubona Nyakubahwa Perezida wa Repubulika y’u Rwanda, Paul Kagame, watugejeje kuri byinshi aduha amahirwe yo kuzongera kutwemerera kutuyobora umwaka utaha, kuko gutsinda amatora byo rwose Insha Allah njye mbona ko byoroshye cyane, kubigeraho byo ni uruca bana”.

Mu byo Karame Rwanda ikora mu Mujyi wa Kigari harimo no gusibura imiyoboro y’amazi
Imihanda yo muri za karitsiye ishyirwamo kaburimbo
Karame Rwanda iha imirimo urubyiruko rw’ingeri zitandukanye, abize n’abataragize amahirwe yo kwiga
  • Imvaho Nshya
  • Nzeri 28, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE