Byinshi ku kigo DPO Group cyatangaje ubufatanye na Banki ya Kigali

  • NTAWITONDA JEAN CLAUDE
  • Gashyantare 8, 2022
  • Hashize imyaka 2
Image

Ikigo DPO Group, kiyoboye mu gutanga serivisi zo kwishyura no kwishyurwa hifashishijwe ikoranabuhanga ku mugabane w’Afurika, cyatangaje ko cyagiranye ubufatanye na Banki ya Kigali (BK Group) mu rwego rwo gushyigikira no guteza imbere abacuruzi bwifashisha ikoranabuhanga bakorana n’iyo banki.

Ubwo bufatanye buzatuma abakiliya ba BK bagera kuri serivisi zo kwishyura no gucuruza hifashishijwe ikoranabuhanga ryizewe kandi rigezweho ritangwa n’Ikigo DPO Group.

Iki kigo cyatangiye gukora guhera mu mwaka wa 2006, kimaze kuba ubukombe kuko gikorera mu bihugu birenga 20 byo ku mugabane w’Afurika. Kuva cyatangira kimaze kugira abakozi basaga 400 mu bihugu bitandukanye.

Mu myaka imaze, DPO Group ntihwema guhanga udushya mu ikoranabuhanga rigezweho rifasha abacuruzi n’abantu ku giti cyabo  kubona serivisi zo kwishyura bifashishije murandasi (online) n’igihe batayifite (offline), ku bwoko bw’amafaranga yose akoreshwa muri Afurika n’uburyo bwose bworoheye uwo ari we wese bwo kwishyurwa.

Kugeza ubu DPO Group ikorana n’abacuruzi basaga 60,000 bahoraho, barimo abakorera ubucuruzi bwabo kuri murandasi, abatanga serivisi z’ubukerarugendo n’imyidagaduro.

Mu mwaka wa 2021, DPO Group yaguzwe n’Ikigo Network International, cyubatse izina mu gutanga serivisi z’ubucuruzi bwifashisha ikoranabuhanga mu Burasirazuba bwo Hagati, bityo kibasha kugira ishami rinini ku isoko ryagutse ry’Afurika mu bijyanye no gutanga serivisi zo kwishyura n’izindi.

Iki kigo giha abacuruzi ubushobozi bwo kwishyura ndetse no kwishyurwa bitabatwaye imbaraga kandi batavuye aho bari, gifite intego yo kurushaho gushyigikira kugeza serivisi z’imari kuri bose ndetse kigashyigikira n’iterambere ry’ubukungu ku mugabane w’Afurika.

DPO Group yakoze ikoranabuhanga ryo kwishyura yihariyeho, rishyigikira ubucuruzi bwo mu byiciro byose muri Afurika aho abarikoresha babasha kwishyura cyangwa kwishyurwa badahuye n’ingorane izo ari zo zose bifashishije ikoranabuhanga ririmo n’irya Mobile Money ryifashisha telefoni ngendanwa.  

Umuyobozi Mukuru wa DPO Group Eran Feinstein, yagiza ati: “Ubufatanye bwacu na Banki ya Kigali buzarushaho gufungura isoko  ry’ubucuruzi  bwifashishije ikoranabuhanga bukomeje kwiyongera ku muvuduko udasanzwe  kuri ba rwiyemezamirimo n’abacuruzi bo mu Rwanda; bizatuma habaho ubwiyongere bw’ubucuruzi bwifashishije ikoranabuhanga mu gihugu hose.”

Yakomeje avuga ko serivisi z’ikoranabuhanga batanga zuje umutekano, ndetse zifasha abaguzi n’abacuruzi kwishyura no kwishyurwa badahangayikishijwe n’uko bahura n’ingorane runaka ku byo bahaha cyangwa bacuruza ku mugabane.   

Umuyobozi wa DPO Group mu Rwanda Karenzi Joan, na we yagize ati: “Ubufatanye nk’ubu ni amahirwe y’ingenzi cyane mu kwihutisha iterambere rya ba rwiyemezamirimo na banki zo muri Afurika, kuko bibafasha gukoresha ikoranabuhanga ryacu ryo kwishyura bakira ubwoko bw’amafaranga bwose bahisemo.”

DPO Group irashimirwa imbaraga ikomeje gushyira mu kwimakaza ikoranabuhanga mu bihugu by’Afurika muri iki gihe hatangiye gahunda y’Isoko Rusange ry’Afurika (AfCFTA) aho abacuruzi bakomeje kubakirwa ijuru rito mu bucuruzi buzira imbogamizi kandi bushyigikiwe ku mugabane w’Afurika wose.

Amahirwe akomeye kuri BK mu rugendo rw’ikoranabuhanga

Ubufatanye na DPO Group bubonwa, n’abasesenguzi mu by’ubukungu, nk’indi ntambwe Banki ya Kigali iteye mu kurushaho kwimakaza ikoranabuhanga mu mitangire ya serivisi, no kwagura ubunararibonye bw’abakiliya b’iyi banki imaze kuba ubukombe mu Rwanda no mu ruhando mpuzamahanga.

Ntiharashira igihe kinini Banki ya Kigali yimukiye ku ikoranabuhanga rishya mu mitangire ya serivisi, hagamijwe kwihutisha serivisi n’iterambere rya banki n’iry’abakiliya bayo.  

Umuyobozi ushinzwe serivisi zo kwishyura muri Banki ya Kigali Caleb Gakunju, yagize ati: “Twishimiye gukorana na DPO Group, kandi twizeye ko urubuga n’ikoranabuhanga itanga ari yo mahitamo ahebuje agiye kudufasha kuzamura servisi z’ubucuruzi bwifashishije ikoranabuhanga ku rundi rwego.”

Yakomeje agira ati: “Ubu bufatanye buje muri gahunda yo gukomeza kwinjiza ikoranabuhanga muri serivisi zose za banki mu korohereza abakiliya bacu kubona serivisi zigezweho kandi zitabatenguha. Ubumenyi bwa DPO ku masoko atandukanye yo muri Afurika busobanuye ko twahisemo umufatanyabikorwa wizewe mu kwagura ikoranabuhanga ryacu no guhaza ibyifuzo by’abakiliya ku rundi rwego.”

Imibare itangwa n’impuguke mu by’ubukungu iteganya ko mu bihugu byo muri Afurika yo munsi y’Ubutayu bwa Sahara, ubucuruzi bwifashishije ikoranabuhanga bushobora kuziyongera bukagera kuri miliyari 180 z’amadolari y’Amerika bitarenze mu mwaka wa 2025, na miliyari 700 z’amadolari y’Amerika bitarenze mu 2050.

Mu  Rwanda, ubucuruzi bukorewe ku ikoranabuhanga buteganyirizwa kuzamuka buvuye kuri miliyari 0.52 z’amadolari y’Amerika (miliyari 534 z’amafaranga y’u Rwanda) mu 2020 bukagera kuri miliyari 0.97 (miliyari 996 z’amafaranga y’u Rwanda) z’amadolari y’Amerika.

  • NTAWITONDA JEAN CLAUDE
  • Gashyantare 8, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE