Byinshi ku gitaramo inkuru ya 30

  • MUTETERAZINA SHIFAH
  • Gashyantare 28, 2024
  • Hashize amezi 2
Image

Igitaramo inkuru ya 30, ni igitaramo cyateguwe n’itorero Inyamibwa zUmuryango w’Abanyeshuri barokotse Jenoside yakorewe Abatutsi, AERG, cyikaba kibumbatiye inkuru y’Abanyarwanda.

Mu kiganiro n’Imvaho Nshya, Rusagara Rodrigue umuyobozi ushinzwe inyungu rusange z’itorero Inyamibwa, avuga ko ari igitaramo kidasanzwe ku banyarwanda ari nayo mpamvu bakise inkuru ya 30.

Ati: “Twabyise inkuru kubera ko iterambere rigaragarira ku munyarwanda wese, cyangwa umuntu wese wo ku Isi, mu kinyarwanda bavuga ngo ngiye kukubarira inkuru iyo ari ikidasanzwe agiye kukubwira, rero ibikorwa Abanyarwanda twagezeho twebwe ubwacu, ni inkuru umuntu yabarira buri muntu wese wo ku Isi, ni yo mpamvu twacyise inkuru ya 30.”

Agaruka ku mpamvu yo kutakitirira undi mubare, Rusagara yavuze ko gihura n’urugendo rw’Abanyarwanda banyuzemo kugeza uko bameze ubu.

Yagize ati: “Mu by’ukuri iryo jambo (Inkuru ya 30) ni imyaka 30 kuva 1959, kugera 1990, ukongera imyaka 30, kuva 1994 kugera 2024. Hari imyaka 30 Abanyarwanda bamaze mu buhunzi, kugeza muri 1990, Inkotanyi zibohora igihugu, hakaba n’indi myaka 30 kuva 1994 Jenoside yakorewe Abatutsi ibaye, kugera 2024, urwo rugendo rwose Abanyarwanda bavuyemo kugera ku byiza tugezeho uyu munsi ni inkuru idasanzwe.”

Asobanura impamvu nta bindi bitaramo byitiriwe inkuru ya 29, Rusagara avuga ko ari inkuru ya 30 kubera ko ari imyaka Abanyarwanda bamaze mu buhunzi ikaba ingana n’indi 30 bari mu gihugu cyabo, baryohewe n’iterambere, umutekano n’umudendezo.

Abazakitabira bahishiwe umukino uzabereka ubuzima n’urugendo byaranze Abanyarwanda muri ibyo bihe byose.

Ati: “Ni igitaramo twifuza gutumiramo buri Munyarwanda wese, kuko nta muntu udafite inkuru yabara, yaba ari uwavutse muri 2005 cyangwa mbere ya 1959, buri wese ku iterambere ry’u Rwanda afite inkuru yaribaraho.”

Yongeraho ati” “Buri muntu wese rero yitege ko azabona umukino mwiza ujyanye n’amateka amubwira ubuzima abamo bwa buri munsi, azitege ibyishimo, umunezero, n’umwanya wo gusabana nk’Abanyarwanda, kwizihirwa ngo duteze imbere igihugu cyacu mu myaka 30 tumaze tuvuye mu icuraburindi.”

Ni igitaramo giteganyijwe kuzaba ku itariki ya 23 Werurwe 2024, kikazabera kuri Bk Arena.

  • MUTETERAZINA SHIFAH
  • Gashyantare 28, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE