Burera: Baterwa ipfunwe na bagenzi babo bashinga amatsinda bashingiye aho bavuka

  • NGABOYABAHIZI PROTAIS
  • Ugushyingo 30, 2023
  • Hashize amezi 3
Image

Bamwe mu baturage bo mu Karere ka Burera, bavuga ko bababazwa na bamwe muri bagenzi babo bashinga ibimina cyangwa se amatsinda bagendeye ku bisekuru by’imiryango y’abo cyangwa se umusozi bavukaho, ibi bintu ngo bakaba basanga bishobora gukurura amacakubiri.

Nziraguseswa Jean Bosco wo mu Murenge wa Cyanika avuga ko byaba bibabaje kubona hari abashinga ikimina gishingiye ku gisekuruza, inzu cyangwa se Akarere ibi ngo arabivuga ashingiye ko ngo mu Karere ka Burera hari benshi bashinga amatsinda bashingiye ko ari abanyaburera gusa.

Yagize ati: “Twarumiwe ubwo twumvaga ngo hari ikimina cy’abanyakidaho, nta muntu n’umwe wagombaga kukijyamo atavuka mu cyahoze ari Komini Kidaho, birababaje kubona umuntu aba yifuza kujya mu kimina azanye amafaranga y’umusanzu we ariko ngo kubera ko utari uwo mu Kidaho ntibakwakire, ibi bintu nibikomeza nabyo bizaba ari inzira mbi izabyara amacakubiri, none se amafaranga agira isura ngo aya ni aya ntuza, aya ni ayande? Oya pe nta tsinda rikwiye gushingira ku karere”.

Mukamazera Daphrose we asanga gushyiraho itsinda rishingiye ku karere ari ukwishora mu bibazo by’amacakubiri.

Yagize ati: “Iyo umuntu yamaze kumva ko hari abo bafitanye ibikorwa bitareba abandi, atangira kubasuzugura kubanga ndetse no kwiremereza hano hari itsinda ry’abanyakidaho kandi ikibabaje ni uko rigizwe n’abantu ubona bajijutse bize ndetse bari no mu buyobozi bwa Leta, ukibaza uti: Ese niba umuntu ari gitifu, visi Meya nawe uri muri iri tsinda azigisha iki muri gahunda y’ubumwe bw’Abanyarwanda, ko ava muri iryo tsinda yita ko ari irya benewabo akaza kwigisha ubumwe bw’Abanyarwanda?”.

Ibi bintu nshima ko Leta yatangiye kujya ibivumbura buhoro buhoro hari n’abiyise abarera dukundane, abadaho n’abandi ibi ntibikwiye, ibi kandi byasebeje Umurenge wacu kandi uvukamo abayobozi bo ku rwego rwo hejuru”.

Guverineri w’Intara y’Amajyaruguru Mugabowagahunde Maurice we asanga ibintu nk’ibi bidakwiye iki gihugu cy’u Rwanda, ahubwo asaba ko abibumbira mu matsinda bajya bayakora bagamije ubumwe bw’Abanyarwanda ndetse n’iterambere ry’igihugu.

Guverineri w’Intara y’Amajyaruguru, Mugabowagahunde Maurice yasabye abaturage guca ukubiri n’ibibatandukanya

Yagize ati: “Birababaje kubona duhora mu macakubiri ashingiye ku tuntu ntazi, guhora mu bikorwa biducamo kabiri ibyo bikaturangaza aho kwiteza imbere; ngo hano  hari ibimina by’abanyakidaho ngo utavuka mu Kidaho ntiyajyamo, ngo hari n’aho ugera ugasanga  hari utubari udashobora kugeramo   utari uwaha n’aha, ibi bintu twarabyumvise kandi  ni ibintu bibabaje nimureke dukore ibyaduteza imbere kuruta ibyadutanya nk’Abanyarwanda, rwose bamwe mu banyarwanda  dukwiye kuva mu bidutanya tukitabirira ibitwubaka”.

Abaturage babigarukaho ko biteye impungenge bashingiye ku  byaragaragaye ubwo abasaga 300 bakoze inama bimika umutware w’Abakono mu Karere ka Musanze, ibintu ubuyobozi bukomeje kwamagana, ahubwo bagashimangira ko ubumwe bw’Abanyarwanda ariyo soko y’iterambere.

  • NGABOYABAHIZI PROTAIS
  • Ugushyingo 30, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE