Burera: Barashimira Perezida Kagame watumye umuhanda wadindiye imyaka 10 usubukurwa

  • NGABOYABAHIZI PROTAIS
  • Mutarama 31, 2024
  • Hashize amezi 4
Image

Abaturage bo mu Karere ka Burera n’abakoresha umuhanda Base-Kirambo-Butaro-Cyanika, barashimira Perezida wa Repubulika y’u Rwanda Paul Kagame wabemereye kaburimbo muri uwo muhanda, akaba yanatumye wongera gusubukurwa nyuma y’imyaka 10 umaze waradindiye.

Abo baturage bavuga ko mu mwaka wa 2013 ari bwo Perezida Kagame yabemereye kaburimbo muri uyu muhanda w’ibilometero 63 unyura ku Bitaro Bikuru bya Butaro bivura Kanseri.

Uyu muhanda kandi ni na wo unyura kuri Kaminuza Mpuzamahanga y’Ubuvuzi n’Ubuzima kuri bose (University of Global Health Equity/UGHE).

Uwizeyimana Lambert wo mu Murenge wa Kagogo, yavuze ko biteze iterambere kuri uwo muhanda no kuba igiciro cy’ingendo kizagabanyuka.

Ashimira Perezida Kagame wawubemereye, none uyu munsi ukaba watangiye kubakwa hagamijwe gushyiramo kaburimbo, bakaba biteze iterambere kuri uyu muhanda.

Yagize ati: “Twishimiye ko Kagame imvugo ikomeje kuba ngiro, uyu muhanda uje ari igisubizo ku baturage bo muri Burera n’Intara y’Amajyaruguru muri rusange kuri ubu igiciro cy’imodoka kigiye kugabanyuka  kuko nk’ubu kugera i Musanze uri kuri moto baguca amafaranga 17,000 kugera ku Karere, ubwo wubatswe rero tugiye kujya dutembera ku giciro gike. Ikindi ni uko aho kaburimbo yageze iterambere na ryo rihasesekara”.

Mu Nama y’Igihugu y’Umushyikirano yabaye ku nshuro ya 19 muri uku kwezi, Perezida Kagame yasabye inzego bireba kwihutisha ikorwa ry’uyu muhanda yemereye abaturage mu myaka 10 ishize.  

Uwizeyimana akomeza avuga ko uyu muhanda numara kubakwa usibye no kubaha akazi muri iyi minsi, bitezemo inyungu nyinshi kandi uzabaha amafaranga.

Yagize ati: “Tugiye kubaka amazu y’ubucuruzi hano hafi kuri aya masanteri y’ubucuruzi kuko agiye kumenyekana, ubukerarugendo buzongerwamo ingufu kuko numvaga hari abazungu batinyaga uyu muhanda baje gusura ibiyaga n’inyoni zo mu gishanga cy’Urugezi. Tugiye kuva mu icuraburindi kuko nabonye aho Kagame yubatse umuhanda ashyiraho amatara.”

Kalisa Telesphole wo mu Murenge wa Cyanika avuga ko  Perezida Kagame akomeje guhesha ishema Akarere ka Burera n’igihugu muri rusange, cyane ko mu mateka ya Burera nta kaburimbo yari yarigezemo mbre ya Leta y’Ubumwe bw’Abanyarwanda.

Yagize ati: “Ubu Kagame akomeje kuduhesha ishema, ababaga bafite amafaranga bigiraga mu mujyi iyo babaga bamaze kugura imodoka, kuko batinyaga ibinogo by’umuhanda Kidaho-Butaro. None ubu ndumva byose bikemutse! Uzi ko Kagame adukuye ku gisebo kubera ko mu Turere twose tw’Intara y’Amajyaruguru Burera ari yo itanyurwagamo kaburimbo. Turashima ko dukomeje kugerwaho n’ibikotrwa byinshi by’iterambere mu rwego rwo gukomeza guhesha agaciro igihugu cyacu.”

Yakomeje avuga ko ko we na bagenzi be baturiye umupaka  boroherejwe ingendo zakoraga bajya guhahira no kwivuriza mu higugu cy’abaturanyi cya Uganda kure, aho bubakiwe amasoko n’amavuriro n’amavuriro hafi yabo.

Bamwe mu batwara abagenzi muri uyu muhanda Kidaho-Butaro, na  bo bashimangira ko kaburimbo ije ari igisubizo, ibinyabiziga byabo kandi ko ugiye no gutuma bazabasha kwizigamira ayo baguraga ibyuma by’imodoka byahoraga byangizwa n’uyu muhanda.

Semana Eliab yagize ati: “Uyu muhanda uje kudufasha mu ngendo zifite umutekano, kuko ibinogo bigiye kuvamo ibyuma byacu bireke kwangirika, kandi urugendo ruzaba amasaha make kuko twagendaga duhunga ibinogo n’ibitare byo mu muhanda. Abagenzi na  bo bagiye kwiyongera kuko ibiciro na byo bizagabanuka kimwe nk’uko umubare w’imodoka ugiye kwiyongera muri uyu muhanda, Kagame aradufashije tuzamutora nanone 100%.”

Umuyobozi w’Akarere ka Burera Mukamana Soline na we yishimira iki gikorwa agashimira Perezida Kagame ukomeje kwita ku mibereho myiza y’abaturage, ariko nanone asaba abaturage gukomeza kubyaza umusaruro ibikorwa remezo bagenda bagezwaho.

Yagize ati: “Umuhanda nk’uyu aba ari igikorwa cy’iterambere n’imibereho myiza y’abaturage, ndashimira Nyakubahwa Perezida wa Repubulika Paul Kagame we uhora areba icyagirira Abanyarwanda akamaro.”

Biteganyijwe ko uyu muhanda urimo kubakwa n’Ikigo cy’Igihugu gishinzwe Iterambere rya Taransiporo (RTDA) uzaba umaze kuzura mu mwaka 2025.

Meya Mukamana arasaba abaturage kuzafata neza uyu muhanda no kuwubyaza umusaruro bawukoresha mu migenderanire n’ishoramari.

Umuhanda Base-Kirambo-Butaro-Cyanika ufite ibilometero 63 bikaba biteganyijwe ko uzuzura utwaye miliyari 80 z’amafaranga y’u Rwanda.

Imirimo yo gutunganya uyu muhanda irarimbanyije
  • NGABOYABAHIZI PROTAIS
  • Mutarama 31, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE