Biroroshye cyane gucururiza mu Rwanda- Minisitiri Ndagijimana abwira Abongereza

  • NTAWITONDA JEAN CLAUDE
  • Mutarama 31, 2024
  • Hashize amezi 4
Image

“Biroroshye cyane gukorera mu Rwanda, kugemurira isoko ry’u Rwanda ndetse no kwagukira ku isoko ry’Umugabane.” Minisitiri w’Imari n’Igenamigambi Dr. Ndagijimana Uzziel yabihamirije  abashoramari baturutse mu Bwongereza.

Ni mu butumwa yabagejejeho ku wa Kabiri tariki ya 30 Mutarama 2024, mu Nama y’Ubucuruzi ihuza Ubwami bw’u Bwongereza n’u Rwanda iteraniye i Kigali guhera ku wa Mbere tariki ya 29 kugeza kuri uyu wa Gatatu ku ya 31 Mutarama.

Iyo nama ifite insanganyamataiko igira iti: “Gera ku ntsinzi mu Rwanda: Fungura Iterambere n’Amahirwe ku Mugabane”, yahuje abayobozi b’ubucuruzi, abashoramari n’abayobozi bakuru muri Guverinoma z’ibihugu byombi. 

Ibiganiro byabo biribanda ku mahirwe y’ubucuruzi busanzwe n’ubushingiye ku guhangana n’imihindagurikire y’ibihe arangwa hagati y’ibihugu byombi.

Ni inama yitezweho kongera umuvuduko n’imbaduko by’ubucuruzi bukorwa hagati y’ibihugu byombi, bumaze kwikuba inshuro ebyiri mu myaka itanu ishize. 

Mu mwaka wa 2023, ubucuruzi bwakozwe hagati y’u Rwanda na UK bifite agaciro ka miliyoni 44 z’amadolari y’Amerika, ni ukuvuga miliyari zisaga 55 z’amafaranga y’u Rwanda, bikaba bihagarariye inyongera ya 9.4% ugereranyije n’ubucuruzi bwakozwe umwaka wabanje. 

Ibyo u Bwongereza bwohereza mu Rwanda byiganjemo imashini n’imiti, mu gihe ibyo u Rwanda rwohereza mu Bwongereza byiganjemo ikawa n’icyayi. 

Ubucuruzi bw’abashoramari baturutse mu Bwongereza bwanditswe mu Rwanda mu myaka 10 ishize, bufite agaciro ka miliyoni 662 z’amadolari y’Amerika, ni ukuvuga miliyari zisaga 841 z’amafaranga y’u Rwanda. 

Ashingiye  ku mubano warushijeho gukura mu myaka 10 ishize, Minisitiri Dr. Ndagijimana Uzziel yasobanuye ko u Rwanda n’u Bwongereza bifitanye amateka akungahaye mu butwererane. 

Yagize ati: “U Rwanda n’u Bwongereza bifitanye amateka akungahaye y’ubutwererane butanga umusaruro bwahereye mu gice cya mbere cyo gusana no kongera kubaka u Rwanda, nyuma gato ya Jenoside yakorewe Abatutsi mu 1994.”

Yongeyeho ko ibihugu byombi bikomeje kugirana imikoranire izira amakemwa mu nzego zitandukanye nk’uburezi, guteza imbere urwego rw’abikorera, guhangana n’imihindagurikire y’ibihe, no kurushaho kunoza ikirere cy’ubucuruzi n’ishoramari ku mpande zombi. 

Binyuze mu mavugurura yakozwe mu micungire y’umutungo, imiyoborere n’ikirere cy’ubucuruzi, u Rwanda rwaje mu bihugu bya mbere byoroshye gukoreramo ubucuruzi no gushoramo imari ku Isi.

Dr. Ndagijimana yashimangiye ko ayo mavugurura yatanze umusaruro mu birebana no kongera umuvuduko w’ishoramari ry’abikurera, haba ku bashoramari b’imbere mu gihugu ndetse n’ishoramari ritaziguye riva mu mahanga. 

Ati: “Mfashe uyu mwanya ngo nshishikarize abayobozi b’ubucuruzi mu Bwongereza gushora imari yabo mu Rwanda no gutanga umusanzu wabo mu ishyirwa mu bikorwa ry’Icyerekezo 2050 cyacu, ari na ko babona inyungu ihebuje ku ishoramari ryabo.”

Umuyobozi wa Banki y’u Rwanda y’Amajyambere Kampeta Sayizonga Pitchette, na we yasobanuye ko urwego rw’imari rw’u Rwanda rukomeje gutera imbere mu kwihutisha uruhare rw’abikorera mu iterambere ry’Igihugu binyuze mu kongera ibikorwa remezo by’urwego rw’imari bihaza ibyifuzo byabo bitandukanye. 

Yashimangiye ko ikintu cy’ingenzi gishyizwe imbere ari ukwimakaza ibikorwa by’iterambere rirambye hibandwa ku rugendo rwo kwimakaza ubukungu butangiza ibidukikije.

Mansoor Hamayun, Umuyobozi akaba n’umwe mu bashinze Ikigo Bboxx cyo mu Bwongereza kimaze imyaka isaga 10 ku isoko ry’u Rwanda, yashimye ikirere cyiza cy’ubucuruzi n’ishoramari kirangwa mu Rwanda, anahishura ko bishimiye kuhimurira icyicaro gikuru bagikuye i London. 

Yavuze ko u Rwanda rwumva cyane iby’ibyingenzi bikenewe mu kwihutisha iterambere no gutegura ikirere cyiza cy’ubufatanye mu bukungu. 

Dolar Popat, Intumwa y’Ubucuruzi y’u Bwongereza mu Rwanda, yavuze ko gukora cyane n’ukwiyemeza by’u Rwanda bigaragaza ko abashoramari b’u Bwongereza bitabiriye inama bafite gufatirana amahirwe aboneka mu kubaka ubukungu bushingiye ku guhangana n’imihindagurikire y’ibihe. 

Yaboneyeho gushimangira ko hakiri icyumba kinini cyane cyo kwaguriraho ishiramari ry’Abongereza mu Rwanda udasize n’ubucuruzi bukorwa hagati y’ibihugu byombi. 

Yagize ati: “Mu by’ukuri nizera ko Afurika ari umugabane ufite amahirwe menshi cyane y’ubucuruzi n’ishoramari… umugabane wuzuye imitungo kamere n’iterambere ry’abaturage mu myaka iri imbere.”

Yakomoje ku mahirwe ari mu nzego z’ingenzi z’ubutwererane bw’u Rwanda n’u Bwongereza, harimo ubuhinzi n’ubworozi, ibikorwa remezo, ubwikorezi bw’ibintu n’abantu, amabuye y’agaciro, inganda ndetse no kubaka ubukungu butangiza ibidukikije. 

  • NTAWITONDA JEAN CLAUDE
  • Mutarama 31, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE