Birmingham 2022: Abaserukiye u Rwanda bagarutse mu i Kigali

  • Imvaho Nshya
  • Kanama 10, 2022
  • Hashize imyaka 2
Image

Itsinda  ry’abari baserukiye  u Rwanda  mu imikino ihuza ibihugu byibumbiye mu muryango w’ibihugu bikoresha ururimi  rw’Icyongereza “Commonwealth Games 2022” bagarutse i Kigali mu ijoro ryo ku wa Kabiri taliki 09 Kanama rishyira ku  wa Gatatu taliki 10  Kanama 2022.

Kuva taliki 28 Nyakanga  kugeza 08 Kanama 2022 mu Mujyi wa Birmingham mu Bwongereza habereye imikino  ya “Commonwealth Games 2022”.

Ku nshuro ya 4 u Rwanda  rwari rwitabiriye iyi mikino rwari rwaserukiwe n’abakinnyi 16 mu mikino 4 ari yo Koga “Swimming”, gusiganwa ku magare “Cycling”, imikino ngororamubiri “Athletics” na Volleyball ikinirwa ku mucanga “Beach Volleyball”. Kugeza ubu u Rwanda ubu nta mudali rurabasha kwegukana.

Muri rusange muri iyi mikino yari ibaye ku nshuro ya 22, Australia ni yo yegukanye imidali myinshi 178 harimo 67 ya zahabu, 57 ya Feza na 54 y’Umuringa. Ku mwanya wa kabiri haje u Bwongereza n’imidali 176 naho ku mwanya wa gatatu haza Canada n’imidali 92.

Ikipe y’ u Rwanda muri Beach Volleyball yari igizwe na  Ntagengwa Olivier na  Gatsinzi Vénuste ni yo  yitwaye neza yegukana umwanya wa 4 nyuma yo gutsindwa n’ikipe y’igihugu y’u Bwongereza amaseti 2-0  mu guhatanira umwanya wa 3.

Uko ikipe y’u Rwanda yitwaye

Iyi kipe yari iri mu itsinda B hamwe na Australia (Paul Burnett na Christopher “Chris” McHugh), Afurika y’Epfo (Leo Williams na Grant Goldschmidt) na Maldives (Sajid Ismail na Adam Naseem).

Umukino wa mbere wabaye taliki 30 Nyakanga 2022, ikipe y’u Rwanda  itsinda  Afurika y’Epfo amaseti 2-0 (21-19 na 21-16).

Umukino wa kabiri wabaye taliki 01 Kanama 2022, ikipe y’u Rwanda  yatsinze Maldives amaseti 2-1 (21-16, 14-21 na 16-14) naho umukino wa nyuma mu itsinda uba taliki 03 Kanama 2022 aho ikipe y’u Rwanda yatsinzwe na Australia amaseti 2-0 (21-16 na 21-18).

Muri ¼, ikipe y’u Rwanda  yatsinze New Zealand (Sam O’Dea na Brad Fuller) amaseti 2-0 (21-18 na 21-19). Uyu mukino wabaye taliki 05 Kanama 2022.

Mu mukino wa ½ cy’irangiza, ikipe y’u Rwanda yongeye guhura na Australia zari kumwe mu itsinda B. Iyi kipe y’u Rwanda yatsinzwe na Australia amaseti 2-0 (21-18 na 21-14).

Mu guhatanira umwanya wa 3, ikipe y’u Rwanda yatsinzwe n’ikipe y’u Bwongereza (Javier Bello na Joaquin Bello) amaseti 2-0 (21-11 na 21-12).

Ikipe y’ u Rwanda muri Beach Volleyball yari igizwe na  Ntagengwa Olivier (ibumoso) na  Gatsinzi Vénuste (iburyo)

Muri iki cyiciro, ikipe yegukanye umwanya wa mbere ni Australia aho yatsinze ku mukino wa nyuma  ikipe ya Canada (Daniel Dearing na Sam Schachter) amaseti  2-1 (17-21, 21-17 na 20-18).

Mu mikino ngororamubiri “Athletics”

Muri iki cyiciro abakinnyi 4 ni bo bari baserukiye u Rwanda  ari bo  Nimubona Yves, Iranzi Celine, Uwitonze Claire na Imanizabayo Emeline.

Taliki 03 Kanama 2022  Iranzi Celine yasiganwe  muri metero ibihumbi 10 asoreza ku mwanya wa 11 aho yakoresheje iminota 32, amasegonda 48 n’ibice 60. 

Aha uwegukanye umudali wa Zahabu ni Eilish McColgan (Scotland) wakoresheje iminota 30, amasegonda 48 n’ibice 60 akurikirwa na Irene Chepet Cheptai (Kenya) wakoresheje iminota 30, amasegonda 49 n’ibice 52 naho ku mwanya wa 3 haza Sheila Chepkirui (Kenya) wakoresheje iminota 31, amasegonda 9 n’ibice 46.

Taliki 05 Kanama 2022, Uwitonze Claire  yahatanye  muri metero 1500 aho yaviriyemo  mu majonjora y’ibanze. Uwitonze yabaye uwa  8 mu itsinda rya 4 aho yakoresheje iminota 4, amasegonda 24 n’ibice 07.

Muri iki cyiciro, Laura Muir (Scotland) yegukanye umudali wa Zahabu   akoresheje iminota 4, amasegonda 02 n’ibice 75 akurikirwa na Ciara Mageean (Northern Ireland) wegukanye umudali wa Feza  akoresheje iminota 4, amasegonda 4 n’ibice 14 naho ku mwanya wa 3 haza Abbey Caldwell (Australia) wakoresheje iminota 4, amasegonda 04 n’ibice 79.

Taliki 06 Kanama 2022,  Nimubona Yves  yahatanye muri metero ibihumbi 5 asoreza ku mwanya wa 5 aho yakoresheje iminota 13, amasegonda 20 n’ibice 20.

Muri iki cyiciro uwa mbere yabaye Jacob Kiplimo (Uganda) wakoresheje iminota 13, amasegonda 8 n’ibice 8, yakurikiwe na  Nicholas Kimeli (Kenya) wakoresheje iminota 13, amasegonda 8 n’ibice 19 naho ku mwanya wa 3 haza Jacob Krop (Kenya) wakoresheje iminota 13, amasegonda 8 n’ibice 48.

Taliki 07 Kanama 2022, Imanizabayo Emeline yasiganwe muri metero ibihumbi 5 aho yasoreje ku mwanya wa 14 akoresheje iminota 15, amasegonda 37 n’ibice 87.

Muri iki cyiciro, Beatrice Chebet (Kenya) yegukanye umwanya wa mbere akoresheje iminota 14, amasegonda 38 n’ibice 21, ku mwanya wa kabiri haje Eilish McColgan (Scotland) wakoresheje iminota 14, amasegonda 42 n’ibice 14 mu gihe ku mwanya wa 3 haje Selah Busieni (Kenya) wakoresheje iminota 14, amasegonda 48 n’ibice 24.

Mu mukino wo gusiganwa ku magare “Cycling”

Muri uyu  mukino, u Rwanda rwari rwaserukiwe n’abakinnyi 8 barimo 5 mu cyiciro cy’abagabo ari bo Uhiriwe Byiza Renus, Muhoza Eric, Mugisha Samuel, Manizabayo Eric na Mugisha Moise. Hari kandi abakinnyi 3 mu bagore ari bo Mukashema Josiane, Ingabire Diane na Tuyishime Jacqueline.

Taliki 04 Kanama 2022, hakinwe icyiciro cyo gusiganwa n’isaha hakabarwa ibihe byakoreshejwe ku mukinnyi ku giti cye  «Individual Time Trial ».

Mu bagore basiganwe intera ya kilometero 29, abakinnyi babiri b’u Rwanda bahatanye, Ingabire Diane yasoreje ku mwanya wa 25 akoresheje iminota 47 n’amasegonda 39 naho Tuyishime Jacqueline asoreza ku mwanya wa 26 akoresheje iminota 48 n’amasegonda 4.

Muri iki cyiciro, Grace Brown (Australia) yegukanye umwanya wa mbere aho yakoresheje iminota 40 n’amasegonda 5 akurikirwa na Anna Henderson (England) wakoresheje iminota 40 n’amasegonda 38 naho ku mwanya wa 3 hasoreza Georgia Williams (New Zealand) wakoresheje iminota 40 n’amasegonda 38. Muri rusange iki cyiciro cyitabiriwe n’abakinnyi 31.

Mu bagabo basiganwe kilometero 37,  abakinnyi 2 b’u Rwanda ari bo Mugisha Moise na Uhiriwe Byiza Renus ni bo bahatanye.

Mugisha Moise yasoreje ku mwanya wa 17 aho yakoresheje iminota 51 n’amasegonda 56 naho Uhiriwe Byiza Renus asoreza ku mwanya wa 27 aho yakoresheje iminota 53 n’amasegonda 52.

Muri iki cyiciro, Rohan Dennis (Australia) ni we wegukanye umwanya wa mbere aho yakoresheje iminota 46 n’amasegonda 21, yakurikiwe na Fred Wright (England) wakoresheje iminota 46 n’amasegonda 47 naho ku mwanya wa 3 haza Geraint Thomas (Wales) wakoresheje iminota 46 n’amasegonda 49.

Taliki 07 Kanama 2022 habaye isiganwa ryo mu muhanda « Road Race». Mu bagore basiganwe intera ya kilometero 112  aho abakinnyi baserukiye u Rwanda, Mukashema Josiane, Ingabire Diane na Tuyishime Jacqueline bose ntawasoje isiganwa.

Muri iki cyiciro, Baker Georgia (Australia) ni we wabaye uwa mbere , ku mwanya wa kabiri haje Evans Neah (Scotland) naho ku mwanya wa gatatu haza Roy Sarah (Australia) bose bakaba barakoresheje  amasaha 2, iminota 44 n’amasegonda 46.               

 Mu bagabo basiganwe intera ya kilometero 160, mu bakinnyi bari baserukiye u Rwanda, Uhiriwe Byiza Renus yasoreje ku mwanya wa 23, Muhoza Eric asoreza ku mwanya wa 33, Mugisha Moise ku mwanya wa 36 na Manizabayo Eric ku mwanya wa 54. Mugisha Samuel  we nta bwo yashoboye gusoza isiganwa.

Muri iki cyiciro, Gate Aaron (New Zealand) yegukanye umwanya wa mbere akurikirwa na  Impey Daryl (South Africa) naho ku mwanya wa 3 haza  Crockett Finn (Scotland) bose bakaba barakoresheje amasaha 3, iminota 28 n’amasegonda 29.

Mu mukino wo Koga “Swimming”, u Rwanda rwaserukiwe n’abakinnyi babiri mu  bagabo ari bo Maniraguha Eloi na Irankunda Isihaka. Aba bakinnyi bombi  bakaba baraviriyemo mu majonjora.

  • Imvaho Nshya
  • Kanama 10, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE