Birmingham 2022: Abakinnyi b’u Rwanda mu mukino wo Koga  baviriyemo mu majonjora

  • Imvaho Nshya
  • Kanama 3, 2022
  • Hashize imyaka 2
Image

Mu mujyi  wa Birmingham mu Bwongereza harimo kubera imikino ihuza ibihugu byibumbiye mu muryango w’ibihugu bikoresha ururimi  rw’Icyongereza “Commonwealth Games 2022”.

Mu mukino wo Koga “Swimming”, u Rwanda rwaserukiwe n’abakinnyi babiri mu  bagabo ari bo Maniraguha Eloi na Irankunda Isihaka. Aba bakinnyi bombi  bakaba baraviriyemo mu majonjora.

Taliki 29 Nyakanga 2022, Irankunda Isihaka  yahatanye muri metero 50 muri “Butterfly” mu majonjora y’ibanze  maze akoresha amasegonda 26 n’ibice 84 akaba yarasoreje ku mwanya wa 46 mu bakinnyi 54 bahatanye.

Ubusanzwe muri iki cyiciro mu mikino mpuzamahanga iheruka Irankunda yakoresheje  amasegonda 27 n’ibice 07.

Muri iki cyiciro, Benjamin Proud (England) yegukanye umwanya wa mbere aho yakoresheje amasegonda 22 n’ibice 81. Ku mwanya wa kabiri hasoreje Teong Tzen Wei (Singapore) wakoresheje amasegonda 23 n’ibice 21 naho ku mwanya wa 3 haza Cameron Gray (New Zealand) wakoresheje amasegonda 23 n’ibice 27.

Umukinnyi Irankunda Isihaka kandi taliki 01 Kanama 2022 yahatanye  muri metero 100  muri “Butterfly” mu majonjora y’ibanze asoreza ku mwanya wa 44 mu bakinnyi 47 aho yakoresheje umunota 1 n’ibice 95. Muri iki cyiciro yagabanyije ibihe kuko yari asanzwe akoresha umunota 1, amasegonda 2 n’ibice 25.

Muri iki cyiciro, Joshua Liendo (Canada) yegukanye umwanya wa mbere  aho yakoresheje amasegonda 51 n’ibice 24. Ku mwanya wa  kabiri haje James Guy (England) wakoresheje amasegonda 51 n’ibice 40 naho ku mwanya wa 3 haza Matthew Temple (Australia) wakoresheje amasegonda 51 n’ibice 40.

Ku ruhande rw’umukinnyi Maniraguha Eloi, taliki 31 Nyakanga 2022, yahatanye  muri metero 100 muri “Freestyle” mu majonjora y’ibanze maze asoreza ku mwanya 63 mu bakinnyi 69 aho yakoresheje amasegonda 57 n’ibice 79.

Muri iki cyiciro, Kyle Chalmers (Australia)  yegukanye umwanya wa mbere akoresheje amasegonda 47 n’ibice 51, Tom Dean (England) yegukana umwanya wa kabiri akoresheje amasegonda 47 n’ibice 89 naho ku mwanya wa gatatu haza Duncan Scott (Scotland) wakoresheje amasegonda 48 n’ibice 27.

Taliki 02 Kanama 2022, Maniraguha Eloi yahatanye  muri metero 50 muri “Freestyle”  mu majonjora y’ibanze asoreza ku mwanya wa 54 mu bakinnyi 71 aho yakoresheje amasegonda 25 n’ibice 15. Muri iki cyiciro, Maniraguha Eloi ubwo yaherukaga kurushanwa yakoresheje amasegonda 25 n’ibice 26.

Muri iki cyiciro, Ben Proud (England) yegukanye umwanya wa mbere , ku mwanya wa kabiri haza Joshua Liendo (Canada)  naho ku mwanya wa 3 haza Lewis Burras (England).

  • Imvaho Nshya
  • Kanama 3, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE