Bboxx igiye kwimurira icyicaro mu Rwanda inahashore miliyari 126 Frw

  • NTAWITONDA JEAN CLAUDE
  • Mutarama 30, 2024
  • Hashize ibyumweru 4
Image

Ikigo cyo mu Bwongereza Bboxx cyiyemeje gushora miliyoni 100 z’amadolari y’Amerika, ni ukuvuga miliyari zisaga 126 z’amafaranga y’u Rwanda mu rw’imisozi Igihumbi, mu myaka itanu iri imbere.

Icyo kigo cyanatangaje ko kigiye kwimurira icyicaro gikuru cyacyo mu Rwanda, kivuye i London mu Bwongereza, mu rwego rwo kurushaho kwimakaza ibikorwa byacyo ku mugabane w’Afurika, ahagaragara isoko ryagutse ku bicuruzwa na serivisi gitanga.

Byagarutsweho kuri uyu wa Kabiri mu Nama y’Ubucuruzi ihuza Ubwami bw’u Bwongereza (UK) n’u Rwanda iteraniye i Kigali guhera ku wa Mbere tariki ya 29 ikazasoza kuri uyu wa Gatatu tariki ya 31 Mutarama 2024.

Ikigo Bboxx cyatangiye gukorera mu Rwanda mu mwaka wa 2013, kikaba gikomeje gutanga umusanzu wacyo mu iterambere ry’abaturage binyuze mu kubahuza n’ibikoresho bigezweho birimo iby’ikoranabuhanga, iby’ingufu zo guteka zitangiza ibidukikije, kubagezaho amashanyarazi yizewe kandi ahendutse, ibikoresho by’ikoranabuhanga nka mudasobwa, telefoni, ibisubizo mu gukwiza amazi n’ibindi.

Kugeza uyu munsi, icyo kigo kimaze gufasha Abanyarwanda barenga 350,000 kibagezaho gazi yo gutekesha, ibikoresho by’amashanyarazi n’iby’ikoranabuhanga, mu miryango ndetse no mu bucuruzi.

Bboxx Rwanda ikomeje kwagura ibikorwa byayo mu bice by’imijyi n’icyaro, aho ibagezaho ibisubizo byo guteka bitangiza ibidukikije, telefoni zigezweho, uburyo bwo gutwara abantu n’ibintu bukoresha amashanyarazi n’ibindi.

Buri munsi, itsinda rya Bboxx Rwanda riharanira kugeza ku bakiliya serivisi zo zigezweho zigamije guhindura ubuzima n’imibereho yabo, intego kuri ubu ikaba iyo guhera mu Rwanda bagura ibikorwa byabo mu bice bitandukanye by’Afurika.  

Ubuyobozi bwa Bboxx bwahishuye kandi ko mu myaka iri imbere buzaba bumaze guhugura Abanyarwanda basaga 500 muri gahunda biyemeje yo kurushaho kwagura ibikorwa byabo muri Afurika.

Iyo gahunda yatangajwe mu gihe iki kigo cyihaye intego yo kwaguka inshuro icumi, ugereranyije n’uko gihagaze ubu, bitarenze mu mwaka wa 2028 kubera ubwo bufatanye buje bukurikira ubwo cyagiranye n’Ikigo cy’Ishoramari cyo muri Kuwait cyitwa EnerTech mu kwezi k’Ukuboza 2023.

Umuyobozi Mukuru w’Urwego rw’u Rwanda rushinzwe Iterambere (RDB) Gatare Francis, yashimiye iki kigo cyiyemeje gukomeza kwagukira muri Afurika gifite icyicaro mu Rwanda.

Yavuze ko iterambere ry’u Rwanda, aho rugomba guhinduka icyicaro cy’ikoranabuhanga no guhanga udushya, atari impanuka ahubwo ko ari umusaruro wa politiki nziza, ikirere cyiza cy’ubucuruzi n’ishoramari ndetse n’uko rwiyemeje gutanga ubutabera bwizewe.

Yakomeje agira ati: “Icyemezo cya Bboxx cyo kwimurira icyicaro gikuru mu Rwanda tucyakiriye neza kandi kijyanye n’imbaraga u Rwanda rukomeje gushyira mu gukurura ishoramari rigezweho kandi riramba. Uruhererekane rwacu rw’ubucuruzi rutanga urubuga rwiza ku bigo nka Bboxx rwo guhanga ibishya no kwaguka, bitanga ubutumwa ku Isi ko u Rwanda rufunguriwe ubucuruzi kandi rwiteguye ahazaza.”

Mansoor Hamayun, Umuyobozi Mukuru akaba n’umwe mu bashinze Bboxx, na we yavuze ko uretse kuba iki kigo cyegera abakiliya bacyo mu kumva ingorane bahura na zo mu gukoresha ikoranabuhanga, iki kigo cyiyemeje kutava iruhande rw’abakiliya bacyo mu guharanira ko umusaruro w’ibikorwa byacyo uramba.

Yagize ati: “Mu rugendo rwacu rwo kuvugurura ibikoresho na serivisi tugeza ku bakiliya muri Afurika, birakwiye ko dutura mu mutima w’Afurika. Kuza hano i Kigali ntibitwegereza imiryango duha serivisi gusa ahubwo binashimangira ko twiyemeje gushyira Afurika imbere, kubaka urubuga rushingiye ku makuru duhindura ubuzima bw’abantu, binyuze mu gukangura impano zabo ku rwego ruhebuje.”

Ubuyobozi Bukuru bwa Bboxx bwitabiriye Inama y’Ubucuruzi ihuza UK n’u Rwanda iteraniye i Kigali (Ifoto: Bboxx)

Yavuze ko u Rwanda, nka kimwe mu bihugu bihuriye mu Muryango w’Ibihugu bikoresha Icyongereza (Commonwelth) aho Perezida Paul Kagame ari we Muyobozi wayo uri ku ntebe, ari umufatanyabikorwa w’imena wa Bboxx.

Ambasaderi w’u Bwongereza mu Rwanda Omar Daair, na we yagize ati: “Ubufatanye bw’u Rwanda n’u Bwongereza, bwubakiye ku ndangagaciro dusangiye n’ukwiyemeza duhuriyeho mu kubaka iterambere rirambye. Intambwe Bboxx iteye yo kwimukira i Kigali ni igihamya cy’uyu mubano ukomeye dufitanye, kandi bishimangira uburyo u Bwongereza bukomeje gushyigikira urugendo rwo guhanga udushya muri Afurika.”

Yakomeje agira ati: “ Mu gihe Bboxx itangiye paji nshya muri Afurika, dutewe ishema no kuba twaragize uruhare mu rugendo rwayo kandi twiteguye gukomeza ubufatanye mu kwihutisha uburumbuke n’iterambere ku mugabane.”

Ikigo Bboxx cyashinzwe mu mwaka wa 2010, cyateye imbere cyane kuva cyatangira guhangana n’ingorane z’ubukene bw’ingufu ku mugabane w’Afurika.

Ibikorwa byacyo bya mbere byatangiriye mu Rwanda, ariko mu myaka 13 ishize kimaze kugera mu bihugu 11 by’Afurika. By’umwihariko 10% by’ingo zo mu Rwanda zicanirwa n’ibisubizo by’ingufu byazanywe na Bboxx.  

Icyemezo cyo kwimurira icyicaro mu Rwanda gishingiye ku rugendo rw’iterambere mu myaka 20 ishize, ryajyanye no gushyiraho politiki zorohereza abashoramari zirimo n’Ihuriro Mpuzamahanga ry’Imari rya Kigali ndetse n’Ikigo Start-up Act.

Icyo kigo kandi cyahisemo kuza i Kigali mu gihe hamaze kuba ihuriro ry’abanyempano kandi hakaba n’agace ishoramari ryarushijeho kwiyongera mu myaka yashize.

U Rwanda kandi rugira uruhare rukomeye mu koroshya ingendo zihuza Umugabane w’Afurika binyuze muri Sosiyete Nyarwanda ikora ubwikorezi bwo mu kirere (RwandAir).

Bboxx iracanira 10% by’ingo zo mu Rwanda
Ibikoresho by’ikoranabuhanga bitangwa na Bboxx (Ifoto: Bboxx)
  • NTAWITONDA JEAN CLAUDE
  • Mutarama 30, 2024
  • Hashize ibyumweru 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE