Basketball:  UGB  na Young Sisters zegukanye “Legacy Tournament 2022”

  • Imvaho Nshya
  • Ukwakira 31, 2022
  • Hashize umwaka 1
Image

Kuva taliki 21 kugeza 29 Ukwakira 2022, ikipe  ya UGB ku bufatanye n’ishyirahamwe ry’umukino wa Basketball mu Rwanda “FERWABA” yateguye irushanwa ku nshuro ya gatatu “Legacy Tournament  2022” mu rwego rwo kuzirikana abashinze iyi kipe.

Iyi kipe ya UGB mu bagabo ndetse na Young Sisters y’i Burundi mu cyiciro cy’abagore ni zo zitwaye neza zegukana iri rushanwa ryari ribaye ku nshuro ya gatatu.

Iri rushanwa  ryabaye mu byiciro bibiri aho taliki 21 na 22 Ukwakira 2022 habaye irushanwa ry’amakipe  y’imbere mu gihugu mu cyiciro cya mbere mu  bagabo  ndetse no mu bakanyujijeho.

Taliki 26 kugeza 29 Ukwakira 2022 habaye imikino mpuzamahanga mu makipe y’icyiciro cya mbere mu bagabo, mu bagore, mu bakanyujijeho mu bagabo ndetse no mu bakiri bato.

Mu cyiciro cy’abakiri bato hitabiriye amashuri ahari hitabiriye Collège Saint André (CSA), IFAK, Lycée de Kigali (LDK) na Green Hills Academy “GHA”. Ikipe ya LDK ni yo yegukanye igikombe itsinze ku mukino wa nyuma ikipe ya CSA amanota 74 kuri 36.

Ikipe ya LDK yegukanye igikombe mu cyiciro cy’amashuri

Mu bakanyujijeho hari hitabiriye amakipe 4 aho yari mu matsinda abiri,  itsinda A ryari rigizwe na  UGB na Techno Warriors BBC (Burundi) naho itsinda B rigizwe na Gorillas Stars BBC (Rwanda) na Bakolo BBC (RDC).

Muri iki cyiciro, ikipe ya Techno Warriors y’i Burundi  yegukanye igikombe itsinze Gorillas Stars BBC amanota 63 kuri 52.

Ikipe ya Techno Warriors BBC

Mu bagore hari hitabiriye amakipe 6 aho yari yashyizwe mu matsinda abiri, itsinda A ryari rigizwe na IPRC Huye BBC, PJB (RDC) na REG BBC naho itsinda B rigizwe na The Hoops BBC, Young Sisters BBC (Burundi) na Wonderful BBC (RDC). Ikipe ya  Young Sisters BBC ni yo yegukanye igikombe itsinze IPRC Huye amanota 62 kuri 58.

Ikipe ya  Young Sisters BBC

Mu bagabo, hitabiriye amakipe 6 aho yashyizwe mu matsida abiri, itsinda A ryari rigizwe na New Star BBC (Burundi), UGB na APR BBC naho itsinda B rigizwe na REG BBC, Shoot 4 the Stars na Espoir BBC.

Ikipe ya UGB yegukanye igikombe itsinze ku mukino wa nyuma ikipe ya REG BBC amanota 78 kuri 64.

Mu bagore n’abagabo, amakipe yegukanye igikombe yanahawe ibihumbi 500 by’amafaranga y’u Rwanda.

Ubwo iri rushanwa ryaherukaga kuba  muri 2019 ryari ryegukanwe n’ikipe ya Patriots BBC mu bagabo ndetse n’ikipe  ya IPRC Huye mu bagore.

Iri rushanwa “Legacy Tournament  2022” riri muri gahunda yo guteza imbere umukino wa Basketball hongerwa amarushanwa, gufasha abakinnyi gukomeza gukina bitegura umwaka w’imikino utaha wa 2022-2023, guha agaciro  no kuzirikana  abagize uruhare mu burezi no gutoza abakinnyi batandukanye cyane cyane abashinze iyi kipe ya UGB  kuva mu 1998 ari bo Shampiyona Aimable wari umuyobozi wa LDK akaba yaritabye Imana muri 2004 na Nizeyimana Jean De Dieu wari umwarimu akaba yaritabye Imana muri 2007.

Shampiyona Aimable (ibumoso) na Nizeyimana Jean De Dieu (iburyo) bibukwa
  • Imvaho Nshya
  • Ukwakira 31, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE