Basketball: Patriots BBC yatsinze Espoir yongera kuyobora shampiyona

Patriots BBC yatsinze Espoir BBC amanota 80-65 mu mukino w’umunsi wa 13 wa Shampiyona, isubirana umwanya wa mbere ku rutonde rwa shampiyona ya Basketball n’amanota 26.

Umukino wabaye ku mugoroba wo ku wa Gatanu tariki 28 Kamena 2024 muri Lcyee de Kigali.

Uwo mukino watangiye wihuta cyane amakipe yombi atsindana, bidatinze agace ka mbere karangira Patriots iyoboye umukino n’amanota 21 kuri 19 ya Espoir BBC.

Iyi kipe ya Espoir yasubiranye imbaraga mu gace ka kabiri, abarimo Nato Ronald na Omega Ngaifei bayifasha gutsinda.

Ku rundi ruhande, Ndizeye Dieudonné na William Perry bafashaga Patriots gutsinda ndetse no kuyobora umukino ku kinyuranyo gito cyane.

Iyi kipe yakomeje gukina neza, igice cya mbere kirangira Patriots iyoboye umukino n’amanota 40 kuri 34 ya Espoir BBC.

Agace ka gatatu Patriots yagatangiye neza ikomerezaho ariko uko umukino wagendaga abakinnyi bayo bagiraga amakosa menshi.

Ndizeye yagize amakosa ane, bityo asohorwa mu kibuga mu rwego rwo kwirinda ko yuzuza atanu. Mu mpera z’ako gace Frank Kamdoh yagize imvune ajyanwa kwa muganga.

Agace ka gatatu karangiye Patriots yongereye ikinyuranyo kigera mu manota 11 (63-52).

Agace ka nyuma Espoir BBC yagerageje kugabanya ikinyuranyo ariko Perry ntiyayorohera.

Umukino warangiye Patriots yatsinze Espoir BBC amanota 80-65 ikomeza agahigo ko kudatsinda, inisubiza umwanya wa mbere n’amanota 26.

Undi mukino wabanje REG BBC yatsinze Kigali Titans amanota 122-87 iguma ku mwanya wa Gatatu n’amanota 25.

Kuri uyu wa Gatandatu shampiyona irakomeza, Tigers BBC irakina na Inspired Generation saa cyenda mu gihe ORION BBC ikina na APR BBC saa kumi n’imwe n’igice z’umugoroba.