Basketball: Ikipe y’u Rwanda iratangira imikino y’Afurika ikina na Côte d’Ivoire

Taliki 28-07-2023

Nigeria-RDC (BK Arena-11h30)

Mali-Uganda (BK Arena-14h30)

Rwanda-Côte d’Ivoire (BK Arena-18h00)

Cameroun-Mozambique (BK Arena-21h00)

Kuva kuri uyu wa Gatanu taliki 28 Nyakanga 2023 muri BK Arena haratangira imikino ya nyuma y’Afurika mu bagore mu mukino wa Basketball igiye kuba ku nshuro ya 28  “FIBA Women Afrobasket 2023” ikaba izasozwa taliki 05 Kanama 2023.

Iyi mikino yitabiriwe n’amakipe 12 aho yashyizwe  mu matsinda 4. Itsinda A rigizwe n’u Rwanda, Angola na Cote d’Ivoire.  Itsinda B rigizwe na Cameroun, Guinea na Mozambique. Itsida C rigizwe na Mali, Senegal na Uganda naho itsinda D rigizwe na Nigeria, Misiri na RDC.

 Ku munsi wa mbere w’iyi mikino, guhera saa tanu n’igice (11h30), ikipe Nigeria ifite igikombe giheruka irakina na RDC, Mali ikine na Uganda (14h30).

Kuva saa kumi n’imwe (17h00) hateganyijwe ibirori byo gufungura irushanwa ku mugaragaro hanyuma guhera  saa kumi n’ebyiri  (18h00), ikipe y’u Rwanda yakiriye irushanwa ikine na Cote d’Ivoire. Umukino usoza iyindi urahuza ikipe ya Cameroun na Mozambique (21h00).

Abifuza kureba iyi mikino muri BK Arena bagura itike mu buryo bw’ikoranabuhanga  banyuze kuri uru rubuga “ticqet.rw/#/” .

Uko irushanwa rizagenda, nyuma y’imikino y’amajonjora, ikipe ya mbere muri buri tsinda ubwo ni amakipe 4 izahita ikomeza muri ¼ hanyuma amakipe  asigaye naho ahatanira itike ya ¼ .

Iri rushanwa ni inshuro ya mbere ribereye mu Rwanda akaba ari inshuro ya gatatu ikipe y’u Rwanda igiye kwitabira kuko yitabiriye bwa mbere mu 2009 ubwo irushanwa ryaberega muri Madagascar ndetse no mu 2011 ubwo ryaberaga muri Mali. Aha hose ikipe y’u Rwanda ikaba yarasoreje ku mwanya wa 9.

Ubwo iri rushanwa riheruka mu 2021 ryabereye muri Cameroun aho ikipe ya Nigeria yegukanye igikombe itsinze ku mukino wa nyuma ikipe ya Mali amanota 70 kuri 59.

Yanditswe na NYIRANEZA JUDITH