BAL 2022 :  Ikipe ya US Monastir ni yo yegukanye igikombe

  • Imvaho Nshya
  • Gicurasi 29, 2022
  • Hashize imyaka 2
Image

Petro de Luanda 72-83 US Monastir

Ikipe ya US Monastir yo muri Tunisia ni yo yegukanye igikombe cy’irushanwa ry’Afurika ry’amakipe yatwaye ibikombe iwayo muri Basketball mu Bagabo “Africa Basketball League 2022” ryakinwaga ku nshuro ya kabiri.

Iyi kipe yari yatsindiwe ku mukino wa nyuma muri BAL 2021 yitwaye neza yegukana igikombe itsinze ku mukino wa nyuma ikipe  ya Petro de Luanda yo muri Angola ku manota 83 kuri 72.

Muri uyu mukino wabereye muri BK Arena taliki 28 Gicurasi 2022, ikipe ya US Monastir yatsinze agace ka mbere ku manota 18 kuri 17, Petro de Luanda yatsinze agace ka kabiri ku manota 23 kuri 15 mu gihe US Monastir yatsinze uduce tubiri twa nyuma ku manota 24 kuri 19 na 26 kuri 13.

Umukinnyi wa Petro de Luanda, Lukeny  Gonçalves ni we watsinze amanota menshi  muri mukino (28)  naho abakinnyi babiri ba US Monastir, Firas Lahyani na  Michael Andre Dixon buri wese yatsinze amanota 21.

Uyu mukino wa nyuma warebwe na bamwe mu kanyujijeho muri NBA  nka  Dikembe Mutombo (RDC), Luol Deng (South Sudan), Joakim Noah (USA), Ian Mahinmi (France), Olumide Oyedeji (Nigeria) na  Charles Smith (USA).

Iyi  mikino BAL 2022 yabaga ku nshuro ya kabiri yatangiriye mu majonjora aho taliki 21 Ukwakira kugeza 16 Ukuboza 2021, amakipe 22 mu bice bitandukanye by’Afurika yakinnye mikino y’amajonjora kugira ngo haboneka amakipe 6 yiyongera ku yandi 6 yari ifite itike y’imikino ya nyuma.

Amakipe yari afite itike ni Zamalek (Misiri), US Monastir (Tunisia),  DUC  (Senegal),  Petro de Luanda (Angola), REG BBC (Rwanda)  na  AS Salé (Maroc).  Nyuma hiyongereyeho Cobra Sport (South Sudan), Ferroviário da Beira (Mozambique),  SLAC (Guinea),  FAP (Cameroun),  Espoir Fukash (RDC) na  Cape Town Tigers (Afurika y’Epfo).

Nyuma aya makipe  12 yashyizwe  mu matsinda abiri aho itsinda A “Sahara Conference” ryakiniye i Dakar muri  Senegal  kuva taliki 05 kugeza 15 Werurwe 2022. Amakipe 6 yakinnye hagati yayo maze ikipe ya REG BBC (Rwanda), US Monastir (Tunisia),  AS Salé (Maroc) na SLAC (Guinea) zikomeza muri ¼  naho Ferroviario da Beira (Mozambique)  na DUC (Senegal) arasezererwa.

Imikino yo mu itsinda B  “Nile Conference” yabereye mu Misiri  taliki 09 kugeza 19 Mata 2022, amakipe 6 yakinnye hagati yayo maze, Zamalek (Misiri), Petro de Luanda (Angola), Cap Town Tigers (Afrika y’Epfo) na FAP (Cameroun) akomeza muri 1/4 naho Cobra Sport (South Sudan) na Espoir Fukash(RDC) arasezererwa.

Amakipe 8 yagomba guhurira mu Rwanda kuva taliki 21 kugeza 28 Gicurasi 2022 agakina imikino ya nyuma.

Muri ¼ , ikipe ya REG BBC yo mu Rwanda yasezerewe na FAP ku manota 66 kuri 63, ikipe ya Petro de Luanda yasezereye AS Salé  ku manota 102 kuri 89,  ikipe ya  Zamalek yasezereye SLAC ku manota  69 kuri 49   naho  US Monastir  isezerera Cape Town Tigers ku manota 106 kuri 67.

Muri 1/2, Petro de Luanda yakuyemo FAP ku manota 88 kuri 74 naho US Monastir isezerera Zamalek ku manota 88 kuri 81. Ikipe ya US Monastir yegukanye igikombe ku nshuro  ya mbere itsinze Petro de Luanda amanota 83 kuri 72 naho Zamalek yari ifite  igikombe giheruka yegukana umwanya wa 3 itsinze FAP  ku manota 97 kuri 74.

Ibihembo byatanzwe

 Michael Dixon ni we wabaye umukinnyi witwaye neza muri BAL 2022 “Hakeem Olajuwon BAL Most Valuable Player Award”. Umutoza witwaye neza  “BAL Coach of the Year  2022” yabaye José Neto (Petro de Luanda).

Umukinnyi Ater James Majok (US Monastir) yegukanye igihembo cy’umukinnyi warushije abandi kuzibira “2022 Dikembe Mutombo BAL Defensive Player of the Year”.

Anas Mahmoud (Zamalek) yahawe ighembo “Manute Bol BAL Sportsmanship Award”  naho Terrel Stoglin (AS Salé) ahabwa igihembo nk’uwatsinze kurusha abandi “2022 BAL Scoring Champion”.

Hatowe ikipe y’umwaka

Iyi kipe igizwe na Edgar Sosa (Zamalek ),  Carlos Morais (Petro de Luanda), Terrel Stoglin (AS Salé), Radhouane Slimane (US Monastir ) na Ater James Majok (US Monastir ).

Iri rushanwa ryatangiye gukinwa muri 2021 ku bufatanye bwa Basketball Africa League (BAL) n’ishyirahamwe mpuzamahanga  ry’umukino wa Baskba “FIBA” ndete na NBA. Irushanwa rya BAL rifite abaterankunga n’abafatanyabikorwa batandukanye barimo New Fortress Energy (NFE), Rwanda Development Board (RDB), Nike, Jordan Brand & Wilson, Air Senegal, Attorney General Alliance (AGA) – Africa, Destination Senegal, Envol City, Hennessy, ESP na RwandAir.

Foto: Shema Innocent





  • Imvaho Nshya
  • Gicurasi 29, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE