Bahavu na Fleury bagiye mu kwezi kwa buki muri Zanzibar

  • MUTETERAZINA SHIFAH
  • Gashyantare 28, 2024
  • Hashize amezi 2
Image

Umukinnyi wamenyekanye muri Sinema nyarwanda Usanase Bahavu Jeanette n’umugabo we Ndayirukiye Fleury, bagiye kwizihiriza isabukuru y’imyaka itatu bamaze babana nk’umugabo n’umugore mu gihugu cya Zanzibar.

Uyu muryango usanzwe usangiza ubuzima bwabo abawukirikira ku mbuga nkoranyambaga za bo, cyane cyane urwa Youtube, bavuga ko nubwo bamaranye imyaka itatu babana nk’umugabo n’umugore, ariko muri Zanzibar bagiye mu kwezi kwa buki (honey moon), kuko kuva babana batigeze bakora icyo gikorwa.

Ati: “Twagiye kwizihiza umwaka wa gatatu tumaze tubana, ariko mbibutse y’uko iyi ari na yo ‘honey moon’ tugiyemo, birangiye tuyijyanyemo n’imfura yacu Amora. Umwaka wa mbere ntibyakuze, uwa kabiri ntitwari tunarikumwe, nari ndi mu ruzinduko rw’akazi, ubwo ntibyagenze neza kuko tutari kumwe.”

Buhavu avuga ko zimwe mu mpamvu zatumye batajya mu kwa buki nyuma y’ubukwe bwabo, harimo na COVID-19.

Ati: “Uretse na COVID nta n’amafaranga yari ahari, umugabo wanjye yarambwiye ngo nitumara gukora ubukwe azanjyana muri honey moon muri Zanzibar, ariko nkabireba nkavuga nti uyu umuntu izi si injuga ra? Ariko nkavuga nti ubwo abitekereza ntacyo bizaba, Imana imuhe umugisha.”

Yongeraho ati: “Ahangaha ndashaka kubabwira nti yewe mugore bitarakunda ko ujya muri honey moon (mu kwa buki), n’iyo waba umaze imyaka 10 wubatse, komeza uyitegereze, ubisengere uvuge uti Mana nanjye ndashaka kujya muri honey moon, ubundi hari icyiciro gicaho ariko ukaguma ugishaka, ni yo umutima waba utabyitayeho cyane. Ariko iyo wibutse ko icyo cyiciro utagikoze wumva bishoboka wagikora, niba hari ahantu mwasezeranye kujya wibabara, wipanika amaherezo y’inzira ni mu nzu, kandi imigambi y’uwiteka ihora ari myiza kuri twe, dupfa kuba tutavuye mu byizerwa, komeza usenge.”

Bahavu avuga ko nubwo muri Tanzania hari ikirere cyiza, ariko kandi ko wabaye mu Rwanda nta handi wakwifuza kuba.

Yagize ati: “Harashyushye kandi imihanda yaho, keretse niba hari ahantu barikuncisha hari isuku nk’iya Kigali, ntabwo waba uvuye mu isuku nk’iy’iwacu ngo ushyikire ahantu nk’aha hari amazi y’umukara mu miferege kandi ari mu Mujyi, ntabwo uko nari niteze Dar es Salaam, ariko hari gusa, bari babitubwiye ko ahantu heza muri Tanzania ari Zanzibar.”

Asoza ikiganiro yasangizaga ababakurukira ku rubuga rwa Youtube, Bahavu yashimiye umugabo we Ndayirukiye Fleury kuba yujuje isezerano yamuhaye.

Yagize ati: “Wakoze cyane kubwo kuzuza amasezerano, ugerageza gukora ibishoboka ngo unezeze, Imana iguhe umugisha, ibyo wansezeranyije n’ukuri ugenda ubikora umunsi ku wundi. Ibi byo nasaga n’umaze kubyibagirwaho, kubera kwita cyane ku kazi, urumva wamaze kubyara rimwe na rimwe hari ubwo uba utangiye kubarira iby’abandi bana bazaza.

Rero unyereka ticket ukambwira ngo ntabwo nabashije kukujyana muri honey moon mu mwaka wa mbere, ariko ubu birashyitse, ni ukuri byankoze ku mutima. Imana yo mu ijuru iguhe umugisha, ijye ihora ikunezeza, izaguhe ubugingo, ndagukunda. Rero mukobwa mudamu, umukunzi wawe niba agukunda ukabona urukundo ruhari, wowe musengere ibintu byose bizacamo.”

Fleury na we yashimiye umugore we ko yirinze kumushyiraho igitutu akihangana kugeza igihe aboneye uburyo bwo kuzuza isezerano.

Aba bombi bakoze ubukwe ku itaraiki 27 Gashyantare 2021, bakaba bafitanye umwana w’umukobwa witwa Amora, banajyanye mu kwezi bise ukwa buki muri Zanzibar.

  • MUTETERAZINA SHIFAH
  • Gashyantare 28, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE