APR FC yanganyije na Muhazi United itinda gukora ku gikombe

  • SHEMA IVAN
  • Werurwe 31, 2024
  • Hashize ibyumweru 3
Image

APR FC yanganyije na Muhazi United igitego 1-1 mu mukino w’umunsi wa 25 wa shampiyona, inanirwa gukoza imitwe y’intoki ku gikombe aho ishobora gutegereza imikino ibiri ngo ihabwe igikombe cya gatanu yikurikiranya.

Uyu mukino wabaye kuri iki Cyumweru tariki 31 Werurwe 2024 kuri Kigali Pele Stadium, witwabirwa n’abafana batarenga 300.

APR FC yatangiye umukino yıharira cyane umupira harimo uburyo Omborenga Fitina yahinduye imbere y’izamu, ariko Muhanzi United yirwanaho.

Ku munota wa 23 APR FC yabonye uburyo bwo gufungura amazamu ku mupira Kwitonda Bacca yahaye Ruboneka Bosco wahise uwucomekera Victor Mbaoma, uwuteye yihuse, ufatwa n’umunyezamu Nzana Ebini.

Iminota 30 ibanza yihariwe na APR FC ariko na yo nta buryo bugaragara yabonye bugana mu izamu.

Igice cya mbere cyarangiye amakipe yombi anganyije ubusa ku busa ntakipe n’imwe irabona uburyo bwiza bwo gutsinda igitego.

Mu gice cya kabiri ku munota 50 APR FC yahushije uburyo bwiza bw’igitego ku mupira Nshimirimana Ismael Pitchou yinjiranye mu rubuga rw’amahina, ateye ishoti rikora kuri Dushimumugenzi Jean, umupira ujya muri koruneri itagize icyo itanga.

Ku munota wa 54, Muhazi United yafunguye amazamu  ku igitego cyatsinzwe na Uwumukiza Obed acenze ba myugariro ba APR FC bari bahagaze nabi, ahita aroba  umunyezamu Pavelh Ndzila.

Ku munota wa 57 APR FC yahushije ubundi buryo bwo gutsinda igitego ku mupira Taddeo Lwanga yahaye Bacca, awuhinduye usanga Victor Mbaoma akinisha umutwe, umupira ukurwamo na Ebini, uyu rutahizamu wa APR FC ashatse gutsindisha ukuguru na byo biranga, abakinnyi ba Muhazi United bahita batabara.

Ku munota 64, umutoza wa APR FC Thierry Forger yakoze impinduka akuramo Nshimirimana Ismael Pitchou asimburwa na Niyibizi Ramadhan.

İzi mpinduka zahise zitanga umusaruro maze ku munota 69, ku mupira Ruboneka Bosco yinjiranye mu ruhande iburyo, yawuhinduye usanga Victor Mbaoma wari wazamutse atsindisha umutwe.

Cyari igitego cya 13 kuri uyu rutahizamu w’Umunya-Nigeria muri Shampiyona.

Muhazi United yongeye kugera Imbere y’izamu rya APR FC ku munota 74’ ku mupira Twizerimana Onesime yateranye Niyigena Clement, ku bw’amahirwe make ukurwamo na Pavelh Ndzila wawushyize muri koruneri.

Iminota 10 ya nyuma y’umukino yihariwe na APR FC yashakaga igitego cya kabiri,mugihe Muhazi United yifuzaga kuba ikipe ya mbere itsinze iyi kipe yi’ngabo z’igihugu muri uyu mwaka w’imikino.

Ku munota 84, Muhazi United yabonye ikarita itukura yahawe Ndayishimiye Richard wari uhawe ikarita ya kabiri y’umuhondo, yavuyemo itukura, ku ikosa yakoreye kuri Ruboneka Bosco wari umaze kwambuka umurongo ugabanyamo ikibuga kabiri yiruka.

Mbere y’uko umukino urangira umusifuzi wa kane yongeyeho iminota İtanu yinyongera.

Ku munota wa 90+2′ APR FC yabuze amahirwe yo gutsinda igitego cyitsinzi ku mupira umunyezamu Nzana Ebini Iniace akuyemo ukomeye watewe na Ruboneka, usanze Mbaoma wari ugiye gushyiraho umutwe, uyu munyezamu yongera gutabara mbere yo kuryama ngo yitabweho n’abaganga.

Umukino warangiye amakipe yombi yanganyije igitego kimwe kuri kimwe.

Ikipe y’Ingabo yagumye ku mwanya wa mbere igira amanota 59, irusha Rayon Sports ya kabiri amanota 11 mu gihe hasigaye imikino itanu.

Indi mikino yabaye kuri iki Cyumweru Bugesera FC yanganyije na Etincelles ibitego 2-2 naho Sunrise FC yatsinzwe na AS Kigali ibitego 2-0.

  • SHEMA IVAN
  • Werurwe 31, 2024
  • Hashize ibyumweru 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE