Antoine Griezmann yasezeye gukinira ikipe y’Igihugu y’u Bufaransa

Antoine Griezmann ukinira Atlético Madrid yo muri Espagne yatangaje ko yasezeye gukinira ikipe y’Igihugu y’u Bufaransa ”Les Bleus”ku myaka 33.

Mu gitondo cyo kuri uyu wa Mbere tariki 30 Nzeri 2024, ni bwo uyu mukinnyi yasezeye gukinira ikipe y’igihugu abinyujije ku mbuga nkoranyambaga ze.

Yagize ati: “N’umutima wuzuye urwibutso ni bwo ndangije iki gice cy’ubuzima bwanjye Ndabashimira kuri aya mahirwe meza ya kandi tuzakubona vuba.”

Griezmann yayikiniye imikino 137 mu ikipe y’igihugu, ayitsindira ibitego 44, atanga imipira 38 yavuyemo ibitego, yatwaranye nayo igikombe cy’Isi cya 2018 na UEFA Nations League mu 2021.

Griezmann kandi yabaye umukinnyi watsinze ibitego byinshi (6) ndetse n’umukinnyi mwiza w’igikombe cy’u Burayi cya 2016 Abafaransa watsindiwe ku mukino wa nyuma na Portugal.