Amb. Omar Daair yanyomoje abamushinja kunegura u Rwanda

  • NTAWITONDA JEAN CLAUDE
  • Nyakanga 20, 2022
  • Hashize imyaka 2
Image

Amwe mu makuru yiriwe acicikana mu bitangazamakuru mpuzamahanga arebana na gahunda yo kohereza mu Rwanda abimukira binjiye mu Bwongereza banyuze mu nzira zinyuranyije n’amategeko, aho bivugwa ko Urukiko rwashyikirijwe raporo y’Ambasaderi w’u Bwongereza mu Rwanda aburira Igihugu cye kutagira amasezerano n’amwe gisinyana n’u Rwanda.

Ibitangazamakuru bitandukanye byagaragaje uburyo uwo Ambasaderi [utatangarijwe amazina] yanenze uburyo u Rwanda rwitwara mu bijyanye n’uburenganzira bwa muntu, “inzego zishinzwe umutekano zikaba zikoresha imbaraga z’umurengera mu gukurikirana iyubahirizwa ry’amategeko.

Kimwe mu byatumye abenshi mu babonye ubwo butumwa babwibazaho byinshi ni uko uwo Ambasaderi watanze ubutumwa yihanukiriye akavuga ko abo bimukira baramutse bageze mu Rwanda “baba bafite ibyago byo guhatirwa kwinjira mu Ngabo z’u Rwanda bakajyanwa mu ntambara mu bihugu by’abaturanyi ku gahato.”

Ibyo byateye benshi mu Banyarwanda n’abasesenguzi mu bya Politiki kwibaza kuri ubwo butumwa bugaragaza budaciye ku ruhande igisa n’ubukangurambaga bugamije kwangisha abimukira Igihugu bataranakandagiramo.

Ambasaderi w’u Bwongereza mu Rwanda Omar Daair, yanyomoje abakeka ko ari we waba waratanze ayo makuru, ndetse anashimangira ko Guverinoma y’u Bwongereza ikorana neza na Leta y’u Rwanda kuko iyifitiye icyizere gisesuye ku bushobozi bwo kwakira abimukira mu buryo bubahesheje icyubahiro.

Mbere na mbere, yabanje gutanga umucyo ku birimo kuvugwa kuri ubwo butumwa bw’akazi bwanditswe hagati y’ukwezi kwa Gashyantare na Gicurasi 2021, kandi icyo gihe akaba yari ataragirwa Ambasaderi w’u Bwongereza mu Rwanda.

Yavuze ko nubwo ari ibisanzwe kuba abadipolomate ba UK batanga ubutumwa bukebura abagize Guverinoma mu bijyanye no gushyiraho Politiki runaka, we yabaye Ambasaderi guhera muri Nyakanga 2021.

Yakomeje agira ati: “Abaminisitiri b’u Bwongereza bavuze inshuro nyinshi ko u Rwanda ari igihugu kwiyemeza ishyirwa mu bikorwa ry’iyi Politiki yo guca ukubiri n’ubucuruzi bw’agatsiko k’abagizi ba nabi iharanira kurokora ubuzima.”

Leta y’u Bwongereza yasinyanye amasezerano n’u Rwanda muri Mata 2022, nyuma y’aho umubare w’abinjira mu gihugu mu buryo bunyuranyije n’amategeko wakomezaga kwiyongera ku muvuduko ukabije, aho bivugwa ko abenshi baturuka mu Bufaransa baciye mu mazi y’ahitwa Channel bakiyongeraho abambutswa bahishwe mu makamyo.

Imibare itangazwa na Minisiteri y’Ubutegetsi bw’Igihugu y’u Bwongereza, igaragaza ko abamaze gufatwa bambutse mu buryo bunyuranyije n’amategeko kuva uyu mwaka watangira barasaga 14,000. Imibare y’agateganyo yerekana ko uyu mwaka ushobora kurangira u bwongereza bugezemo abantu barenga 60,000.

Uko abo bantu biyongera ni na ko barushaho gutiza umurindi ubucuruzi bwa magendu bwashinzwe n’ababafasha kwambuka, aho ababona amahirwe yo kugera mu Bwongereza ahanini ari abafite ubushobozi bwo kwishyura ababambutsa mu mazi cyangwa mu makamyo. 

Mu kiganiro Perezida wa Repubulika y’u Rwanda Paul Kagame aherutse kugirana na France 24,  yagaragaje ko u Rwanda rwemeye kwakira abimukira baturutse mu Bwongereza kubera ko rwabisabwe kandi rukaba rusanzwe rwakira n’abandi baturuka mu bihugu bitandukanye. Yashimangiye ko abarebwa n’iyo gahunda itaravuzweho rumwe n’abantu benshi ari abinjiye mu bwongereza mu buryo bunyuranyije n’amategeko, cyane ko no gushaka ubuhungiro bikwiye kugira inzira binyuramo.

  • NTAWITONDA JEAN CLAUDE
  • Nyakanga 20, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE