Amavomo 56 mu Rwanda aratanga amazi akoresheje internet

  • NSHIMIYIMANA FAUSTIN
  • Ukuboza 29, 2023
  • Hashize amezi 2
Image

Mu bice bimwe na bimwe by’Umujyi wa Kigali no mu Turere dutandukanye tw’Intara y’Iburasirazuba, abaturage batangiye gukoresha amavomo babona amazi bakojeje ikarita kuri mubazi y’ikoranabuhanga ikoresha amashanyarazi n’ihuzanzira rya internet.

Umuturage ashobora kubonera amazi isaha yose abishakiye adategereje ko hari uwaza kumufungurira amazi. Icyo asabwa gusa ni ugukoza ikarita kuri mubazi, igahita imurekurira litiro 20 z’amazi yishyura igiceri cya 20 cy’amafaranga y’u Rwanda.

Ubuyobozi bw’Ikigo cy’Igihugu gishinzwe gukwirakwiza Amazi, Isuku n’Isukura (WASAC), buvuga ko ubu buryo bwatangiriye ku mavomo rusange 56 aherereye mu bice bitandukanye by’i Kigali no mu Turere twa Kayonza, Rwamagana, Gatsibo na Nyagatare.

Bamwe mu baturage batuye mu Mujyi wa Kayonza bakoresha ayo mavomo rusange, bavuga ko kuvoma bakoresheje ikoranabuhanga byabakuriyeho inzitizi zirimo kuzinduka bakabura uvomesha n’umubyigano.

Aba baturage bavuga ko iri koranabuhanga ritarabageraho bari bafite imbogamizi n’ibibazo byo kutabonera amazi meza igihe cyose bayashakiye bitewe n’uko ushinzwe kuvomesha adahari gusa.

Gisubizo Jean Claude ukoresha ivomo rusange riri mu Kagari ka Nyagatovu mu Murenge wa Mukarange, avuga ko iryo koranabuhanga ryabakijije inkomati ndetse n’amazi yarabahendukiye kuko ntayo bagipfusha ubusa.

Yagize ati: “Izi mubazi zitaraza byadusabaga gutegereza uvomesha ugasanga tubaye benshi bityo ugasanga habayeho kubyigana tuyarwanira. Ariko ubu aho ubu buryo bw’ikoranabuhanga buziye iyo watinze mu kazi ugataha bugorobye ntutegereza ushinzwe kuvoma ngo agufungurire cyangwa mu gitondo uzindutse. Imirongo yaragabanyutse ntabwo uza ngo utegereze kuko dufite amakarita dukoresha tuvoma batiriwe baza kukuvomera.”

Mahatane Theoneste nawe yagize ati: “Njye hari igihe mva mu kazi saa yine z’ijoro nkaza kuvoma hano. Nkubu mvomye amajerekani atanu, ubu hagiye igiceri cy’ijana. Uvomesha iyo yabaga adahari byadusabaga kumurindira ariko ubu aho nshakira kugaruka ndaza ntikandagira nta kibazo.”

Abaturage bishimiye ikoranabuhanga ryabegerejwe mu kuvoma amazi

Kantarama Viviane ashinzwe rimwe muri ayo mavomo rusange riri mu Mujyi wa Kayonza mu Kagari ka Bwiza, asobanura ko mbere batarakoresha ikoranabuhanga ryo kuvoma yasigaga imirimo mu rugo akajya kuvomesha ndetse agahura n’igihombo cyaterwaga n’amazi yangirikaga.

Yagize ati: “Iyo nabaga naje kuvomesha nasigaga imirimo mu rugo ugasanga mu rugo hari imirimo yangirika kuko umwanya wose nabaga ndi ku ivomero mvomesha, ariko ubu baraza bakavoma batantegereje nanjye nkajya mu mirimo yanjye ntawunzinduye cyangwa ngo ambyutse nageze mu buriri.”

Yakomeje avuga ko mbere yahuraga n’ibihombo by’amazi yamenekaga ariko ngo ubu ntibigishoboka kuko umuntu avoma amazi asabye.

Ati: “Uburyo bwo kuvoma busanzwe bwatumaga mpura n’igihombo kuko amazi yamenekaga, ni njye wayishyuraga aho iyo bambariraga wasangaga ngeza nko mu mafaranga 5,000 by’amazi yamenetse, ariko kuko ikarita iba iregeye bijyanye na buri jerekani ntibigikunda.”

Mukiza Anaclet, Umukozi w’Ishami rya WASAC rya Kayonza, yavuze ko ubu buryo bwo gukoresha mubazi bumaze imyaka ibiri, bukaba bukiri mu igeregeza aho bwatangirijwe kandi bukomeje gutanga umusaruro.

Yavuze ko kugira ngo buri vomo rikoresha ikoranabuhanga rigezweho ryubakwe ritwara ingengo y’imari ya miliyoni imwe y’amafaranga y’u Rwanda kandi rikajyana n’ibindi bikorwa remezo birimo umuriro w’amashanyarazi n’ihuzanzira rya internet.

Mukiza yavuze ko mu gihe Guverinoma y’u Rwanda yihaye intego yo kwegereza amazi meza abaturage bose, hari na gahunda yo kurushaho kwagura iryo koranabuhanga mu tundi Turere.

Yagize ati: “Igerageza ryatweretse ko ari ryiza yaba mu Ntara no mu Mujyi wa Kigali kandi tuzagenda twongera uko ubushobozi buzajya buboneka kuko twasanze bifasha abaturage benshi mu buryo bwihuse kandi bunoze. Gusa ariko ubu buryo burahenze kuko busaba kuba ibikorwa remezo by’umuriro na ‘network’ biba bikenewe ariko tugenda buhororo buhoro.”

Mu gihe cy’imyaka ibiri, umushinga wo gukoresha ikoranabuhanga rya mubazi ku mavomo rusange umaze ugeragezwa, mu Karere ka Kayonza umaze kugezwa ku mavomo umunani.

Mubazi ikoreshwa na WASAC, ni ikoranabuhanga ryatumye gahunda yo kuvoma amasaha 24/24 ishoboka.

Abaturage bavuga ko imbogamizi ikiri aho ayo mavomo yashyizwe ari iyo kuba amakarita yifashishwa afitwe n’abantu bakeya, dore ko ikarita nta kiguzi isaba uretse kuba ufite irangamuntu na telefoni.

Udafite ikarita ategereza uyifite akamukorezaho na we akabona kuvoma.

  • NSHIMIYIMANA FAUSTIN
  • Ukuboza 29, 2023
  • Hashize amezi 2
TANGA IGITEKEREZO
Nsanzimana Eric says:
Ukuboza 29, 2023 at 1:41 pm

ndabakunda kunkuru nziza mutugezaho gusa natwe bugesera bazatuzanire iryo Jordana buhanga kubona amazi birye byoroha

Andika igitekerezo

AMATEGEKO AGENGA IYANDIKA RY'IGITEKEREZO CYAWE