Amashyaka yo mu Rwanda yagaragaje impungenge za Jenoside muri RDC

  • NTAWITONDA JEAN CLAUDE
  • Gicurasi 31, 2022
  • Hashize imyaka 2
Image

Hashize iminsi ingabo za Repubulika Iharanira Demokarasi ya Congo (FARDC) zihanganye n’umutwe wa M23 mu bice bya Kivu y’Amajyaruguru. Ibyari intambara biragenda bifata indi ntera aho abayobozi bumvikanye bashishikariza abaturage “kwifashisha intwaro gakondo mu kwirwanaho”, nk’uko byagenze mu Rwanda mu myaka ikabakaba 30 ishize.

Mu cyumweru gishize ubusugire bw’u Rwanda bwasagariwe na FARDC ifatanyije n’umutwe w’iterabwoba wa FDLR, ugizwe n’abasize bakoze Jenoside yakorewe Abatutsi mu 1994.

Taliki 23 Gicurasi 2022 hagati ya saa tatu n’iminota 59 (09: 59AM) na saa yine na 20 (10:20AM), ibisasu byarashwe ku butaka bw’u Rwanda mu mirenge ya Kinigi na Nyange mu Karere ka Musanze bikomeretsa abaturage ndetse binangiza inzu z’abaturage.

Taliki 28 Gicurasi 2022 abasirikare babiri b’u Rwanda Cpl Nkundabagenzi Elysée na Pte Ntwari Gad bashimuswe n’ingabo za FARDC.

Hashingiwe ku ngaruka z’ubushotoranyi bw’ingabo za FARDC na FDLR, Ishyaka riharanira ubumwe bw’Abanyarwanda na Demokarasi (UDPR) n’Ishyaka rya Gisosiyalisiti Rirengera Abakozi mu Rwanda (PSR) bagaragaza ko ibi bikorwa birimo no gushimuta abasirikare b’u Rwanda ari ibikorwa by’ubushotoranyi, ngo binagaragaza imikoranire ya FARDC na FDLR.

Aya mashyaka yombi yabigarutseho mu itangazo rigenewe abanyamakuru ryashyizwe hanze kuri uyu wa Kabiri taliki 31 Gicurasi 2022.

UDPR na PSR bemeza ko amakuru y’ibinyoma yakwirakwijwe n’inzego za RDC afatwa nk’uburozi mu kubeshyera u Rwanda kugira uruhare mu ntambara zo muri Kivu y’Amajyaruguru.

Iryo tangazo rigira riti: “Ibyo bigaragaza intege nke z’inzego za Leta RDC, kutubaha amasezerano ya Nairobi, kudasobanuka kwa MONUSCO, amoko yivanze muri politiki y’imitwe ihanganye, ibi ni ibigaragaza ikibazo kiri muri Kivu y’Amajyaruguru”.

Aha ni ho UDPR na PSR bahera baburira Umuryango Mpuzamahanga ko virusi y’amoko yashyizwe imbere muri iki kibazo ishobora guteza indi Jenoside yo kurwanya Abatutsi ku butaka bwa Repubulika Iharanira Demokarasi ya Congo.

Aya mashyaka avuga ko ibi atari impanuka, kuko ngo umutwe w’iterabwoba wa FDLR ugizwe n’abakoze Jenoside yakorewe Abatutsi ndetse na Sosiyete sivile babaye intangarugero mu gukongeza amakimbirane mu Karere.

UDPR na PSR barahamagarira abanyamashyaka n’abakongomani bakunda igihugu cyabo gushyigikira batizigamye mu kwirinda akajagari.

Yerekana kandi ko u Rwanda rukomeje kwihanganira ubushotoranyi burimo gukorwa na FARDC na FDLR. UDPR na PSR barasaba ko itsinda ryashyizweho ryakwihutisha iperereza ritabogamye kugira ngo hashyirwe umucyo ku bushotoranyi bwakozwe n’ingabo za FARDC ifatanyije na FDLR ku Rwanda.

Aya mashyaka asanga mu myaka 30 ishize hari bamwe mu banyapolitiki ba RDC bakora politiki mbi bakorana na FDLR mu kubiba inzangano nko kwangisha u Rwanda abakongomanai kandi ari igihugu gifatwa nk’intangarugero ku mugabane w’Afurika.

  • NTAWITONDA JEAN CLAUDE
  • Gicurasi 31, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE