Amagare:  Abakinnyi 5 baserukiye u Rwanda muri shampiyona y’Isi ntibasoje

  • Imvaho Nshya
  • Nzeri 28, 2022
  • Hashize imyaka 2
Image

Kuva taliki 18 kugeza 25 Nzeri 2022 i Wollongong muri Australia  habereye shampiyona y’Isi  y’umukino wo gusiganwa ku magare mu muhanda  “UCI Road World Championships 2022”.

Abakinnyi 5 ni bo baserukiye u Rwanda gusa ntababashije gusoza isiganwa.

Mu bagabo bakuru “Men Elite” Manizabayo Eric  na Mugisha Moise ni bo bahatanye aho mu gusiganwa mu muhanda “Road race” intera ya kilometero 266.9 batabashije gusoza.

Muri iki cyiciro abakinnyi 169 ni bo  basiganwe hasoza 103. Muri aba basoje, Remco Evenepoel ukomoka mu Bubiligi ni we wabaye uwa mbere aho yakoresheje amasaha 6, iminota 16 n’amasegonda 8. Yakurikiwe na Christophe Laporte (France) wakoresheje amasaha 6, iminota 18 n’amasegonda 29 naho ku mwanya wa 3 haza Michael Matthews (Australia) na we wakoresheje amasaha 6, iminota 18 n’amasegonda 29.    

Mu bakobwa bakuru “Women Elite”, Nzayisenga Valentine ni we waserukiye u Rwanda  gusa nta bwo yashoboye gusoza isiganwa ryo mu muhanda “Road race”.

Muri iki cyiciro  abakinnyi 126 ni bo batangiye isiganwa hasoza 78.  Mu ntera ya kilometero 164.3,  Annemiek van Vleuten (Netherlands) ni we wegukanye umwanya wa mbere aho yakoresheje amasaha 4, iminota 24 n’amasegonda 25. Yakurikiwe na Lotte Kopecky (Belgium) na Silvia Persico (Italy) bombi bakoresheje amasaha 4, iminota 24 n’amasegonda 26.

Ikindi cyiciro cyagaragayemo abakinnyi b’u Rwanda ni mu batarengeje imyaka 23 “Men U-23” aho Iradukunda Emmanuel na Uhiriwe Byiza Renus na bo batashoboye gusoza isiganwa ryo mu muhanda “U-23 Men Road race”.

Muri iki cyiciro abasiganwe bari 132 hasoza 70.  Ku ntera ya kilometero 169.8,  Yevgeniy Fedorov ( Kazakhstan) yegukanye umwanya wa mbere aho yakoresheje amasaha 3, iminota 57 n’amasegonda 08. Ku mwanya wa kabiri haje Mathias Vacek (Czech Republic) wakoresheje amasaha 3, iminota 57 n’amasegonda 09 naho ku mwanya wa 3 haza  Søren Wærenskjold (Norway) wakoresheje amasaha 3, iminota 57 n’amasegonda 11.

Kuva muri 2014 ubwo u Rwanda rwitabiraga ku nshuro ya mbere shampiyona y’Isi  nta bwo rurabasha kwegukana umudali.

Shampiyona y’Isi umwaka utaha wa 2023 izabera i Glasgow muri Scotland taliki 3 kugeza 13 Kanama 2023. Muri 2024 izabera i Zurich mu Busuwisi naho muri 2025 ibere i Kigali mu Rwanda.

  • Imvaho Nshya
  • Nzeri 28, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE