Afungiwe kubeshya Perezida Kagame yasuye abaturage

  • NTAWITONDA JEAN CLAUDE
  • Kanama 31, 2022
  • Hashize imyaka 2
Image

Urwego rw’Igihugu rw’Ubugenzacyaha (RIB) rwataye muri yombi Muhizi Anatole, ukekwaho kubeshya Perezida wa Repubulika y’u Rwanda Paul Kagame ubwo yari mu ruzinduko mu Karere ka Nyamasheke, avuga ko yariganyijwe inzu ye.

Muhizi akurikiranyweho icyaha cyo gutesha agaciro icyemezo cy’inzego z’ubutabera no gukekwaho gukoresha inyandiko mpimbano, ibyaha biteganywa kandi bihanwa n’ingingo za 262 na 276 z’itegeko riteganya ibyaha n’ibihano muri rusange.

Muhizi Anatole, yavuze ko yimwe ibyangombwa by’ubutaka birimo inzu iherereye mu Murenge wa Runda, Akarere ka Kamonyi kandi ahubwo ari we wanze kuva mu nzu nk’uko byemejwe n’Urukiko.

RIB ibuga ko kuri ibu Muhizi afungiye kuri Sitasiyo ya RIB ya Remera mu Karere ka Gasabo mu gihe iperereza rikomeje.

Ku ya 27 Kanama 2022, ni bwo Muhizi yaregeye Perezida wa Repubulika Paul Kagame, avuga ko Banki Nkuru y’u Rwanda (BNR) yamwambuye inzu ye.

Perezida Kagame yari akomeje uruzinduko mu gikorwa cyo gusura abaturage mu Karere ka Nyamasheke. Muhizi yamubwiye ko umutungo yariganyijwe ugizwe n’inzu yari yaraguze n’uwahoze ari umukozi wa BNR witwa Rutagengwa Jean Leon mu 2015.

Yavugaga ko yabikoze nyuma yo kubaza muri RDB bakamubwira ko iyo nzu itari ingwate ya Banki.

Umuvugizi wa RIB, Dr Thierry B. Murangira agira ati: “Iperereza ry’ibanze rigaragaza ko Muhizi yabeshye, ahubwo yanze kuva mu nzu nyuma yo gutsindwa urubanza agategekwa n’Urukiko kuva muri iyo nzu. Iperereza rigaragaza nanone ko iyo nzu yari yaratanzwe nk’ingwate y’umwenda wa miliyoni 31Frw, Rutagengwa Jean Leon yari yarafashe muri BNR”.

RIB yaje no kubona ibimenyetso bigaragaza ko BNR yandikiye Ikigo cy’Igihugu gishinzwe Imicungire y’Ubutaka isaba gufatira uwo mutungo, nyuma yo gutsinda Rutagengwa ari na we wagurishije Muhizi nyuma.

Muhizi avuga ko yamenye ko iyo nzu ari ingwate ubwo yajyaga gusaba icyangombwa cy’ubutaka. Nyuma yaje gutsindwa mu kirego yagejeje mu Rukiko Rukuru rwa Nyanza.

  • NTAWITONDA JEAN CLAUDE
  • Kanama 31, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE