ACP Rutikanga yasabye abashoferi kwirinda gutwara banyoye ibisindisha

  • NTAWITONDA JEAN CLAUDE
  • Ukuboza 31, 2023
  • Hashize amezi 5
Image

Polisi y’u Rwanda yongeye gukebura Abanyarwanda by’umwihariko abayobozi b’ibinyabiziga, ko ibibutsa ko mu bihe byo gusoza umwaka wa 2023 no kwinjira mu mwaka wa 2024, ari igihe cyo kwizihirwa ariko kidakuraho gukomeza gukaza ingamba z’umutekano wo mu muhanda.

Bityo, abatwara ibinyabiziga basabwe kwirinda, uburangare no gutwara ibinyabiziga banyoye ibisindisha, kuko bishyira ubuzima bw’Abanyarwanda mu kaga, muri iki gihe abantu bizihirwa, bagasabana n’inshuti n’abavandimwe.

Ni mu bukangurambaga bw’Umutekano wo mu muhanda ‘Gerayo Amahoro’ bwakomeje ku wa Gatandatu tariki ya 30 Ukuboza, ku bufatanye na Société Pétrolière-SP Rwanda icuruza ibikomoka kuri Peteroli, bwabereye ahazwi nko ku Gishushu mu Murenge wa Remera mu Karere ka Gasabo.

Ni nyuma y’uko ku wa Gatandatu w’icyumweru gishize, ubukangurambaga nk’ubu bwari bwabereye Nyabugogo, mu Karere ka Nyarugenge, aho abakoresha umuhanda basabwe kurushaho kwirinda ikintu cyose cyateza impanuka zo mu muhanda cyane cyane mu bihe by’Iminsi Mikuru.

Umuvugizi wa Polisi y’u Rwanda, ACP Boniface Rutikanga, yasabye ibyiciro bitandukanye by’abakoresha umuhanda bari biganjemo abatwara abagenzi kuri moto bitabiriye ubu bukangurambaga, kwibuka gushyira imbere umutekano wo mu muhanda mu gihe bizihiza iminsi mikuru.

Yagize ati: “Icyo tubibutsa ni kimwe, mwizihirwe ariko muzirikana umutekano, by’umwihariko abatwara ibinyabiziga birinde kunywa ibisindisha, mu gihe babona ko banyoye be gutwara ibinyabiziga ahubwo bahamagare ababatwara.”

Yashishikarije abatwara ibinyabiziga kwirinda kugendera ku muvuduko ukabije, kuvugira kuri telefone mu gihe batwaye, abasaba no kurangwa no kubahana igihe cyose bakoresha umuhanda, ari abatwara ibinyabiziga binini ndetse n’ibinyabiziga bitoya.

Yabasabye kandi kwirinda amakosa yo mu muhanda, bacunga umutekano wa bo bwite, uw’abo batwaye n’uw’abo bahurira mu muhanda.

ACP Rutikanga yashimiye SP-Rwanda, ku bufatanye n’ubushake igira mu kuzirikana umutekano w’abakoresha umuhanda by’umwihariko abatwara ibinyabiziga mu kubibutsa ibyo basabwa ngo basigasire umutekano wo mu muhanda.

Yaboneyeho kwifuriza buri wese kuzagira umwaka mushya muhire wa 2024.

Impanuka zo mu muhanda ziza mu bintu 10 bihitana ubuzima bw’abantu benshi mu Rwanda, aho kuva muri Nyakanga kugeza mu kwezi k’Ugushyingo uyu mwaka, habaruwe impanuka 4368, inyinshi muri zo zagiye ziterwa n’uburangare bw’abatwara ibinyabiziga.

Polisi ivuga ko buri wese ukoresha umuhanda by’umwihariko abatwara ibinyabiziga; aramutse yitwararitse akubahiriza neza amategeko n’amabwiriza agenga imihanda n’uburyo bwo kuyigendamo, inyinshi mu mpanuka zakwirindwa, bikagabanya cyane umubare w’abo zivutsa ubuzima n’abazikomerekeramo buri mwaka.

  • NTAWITONDA JEAN CLAUDE
  • Ukuboza 31, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE