Abarerewe mu Baskuti biyemeje kunganira imyigire y’abana b’abakene

  • Imvaho Nshya
  • Gashyantare 29, 2024
  • Hashize amezi 2
Image

Bamwe mu barerewe mu Muryango w’Abaskuti bibumbiye mu muryango wa RASAL (Rwanda Ancient Scout Alliance) batangije umushinga wo gufasha abana bakomoka mu miryango ikennye kurusha indi bise “Na we yige neza”.

Bavuga ko bajya gutekereza iyi gahunda bari bagamije gukemura ikibazo cy’abana bata ishuri, abiga nabo kubera kutabona ibikoresho n’ibindi bikenerwa kugira ngo bige neza.

Abana bahereweho ni abiga ku Rwunge rw’Amashuri (GS) rwa Gasabo, ruherereye mu Murenge wa Rutunga, Akarere ka Gasabo.

Aloysie Nyiransabimana, Umuyobozi wungirije wa RASAL akaba yaranarerewe mu Muryango w’Abaskuti, yavuze ko bumvise ko bagomba gutanga umusanzu wabo bagafasha abana baturuka mu miryango itishoboye, buri mwana akagira Umuskuti umufasha mu myigire ye.

Yagize ati: “Twumvise ikinyotera cy’urukundo dufitiye umuryango twarerewemo, twumva tugomba kugira uruhare tugafasha abana bakomoka mu miryango ikennye kurusha iyindi ariko tugomba kubafasha.”

Yakomeje avuga ko hashize igihe bakora ibikorwa bitandukanye ariko igihe kigeze ngo abarerewe mu muryango batange umisanzu mu gufasha abana batabasha guhabwa ibyo bakeneye n’imiryango yabo.

Abana baturuka mu miryango ikennye bahawe ibikoresho by’ishuri

Nzayisenga Albert wagize uruhare mu guhuza abaskuti bakuru bahuriye mu muryango RASAL, avuga ko hashize igihe kinini bakora ibikorwa bito ariko basanze bagomba gukora ibikorwa binini bahuriyeho bibanda ku ban abo mu miryango ikennye.

Yagize ati: “Twabyizeho tubona tugomba ko tugomba gukomeza gukora ibikorwa byagutse uwabaye umuskuti ategetswe, kugira ngo ihame ryo gukora inshingano ku bandi agamije kubahindurira ubuzima rigerweho.”

Makuta Robert wakuriye mu muryango w’Abaskuti akaba n’umwe mubagize RASAL, na we yibutsa ababyeyi ko badakwiye gusibya abana babo kugira ngo babakorere imirimo yo mu rugo.

Ati: “Ikindi twifuza ni ko ubuyobozi bw’ishuri ndetse n’ubw’Umurenge bwakwita kuri aba bana no kubaba hafi mu myigire yabo ya buri munsi, no kubibutsa inshingano bafite.”

Umwana wavuze mu mwanya w’Abandi, yashimiye uyu muryango ugiye kubafasha agaragaza icyizere ko ibintu bigiye kurushaho byiza bakiga neza nta yandi mananiza.

Yagize ati: “Ndishimye cyane kandi amarangamutima yacu aduha icyizere ko ibintu bigiye kugenda neza kurushaho kuko batwirukanaga uko bishakiye kubera ko tutabaga dufite ibikoresho bihagije no kwishyura ariko nimudusura muzadusanga twiga neza mu kigo cyacu cya GS Gasabo.”

Komiseri w’Umuryango w’Abaskuti mu Rwanda, Uzabumugabo Virgile, avuga ko buri wese wanyuze mu Muryango w’Abaskuti agize icyo akora ibibazo byo guta ishuri byakemuka.

Yavuze ko Umuryango w’Abaskuti wareze abantu benshi ku buryo mu bantu 10 bari kumwe hataburamo batandatu wareze, bityo bafite inshingano zo gufasha abandi no kubitaho.

Ubwo hasozwaga icyumweru cyahariwe ibikorwa bya Baden Power, abana basaga 48 biga muri GS Gasabo bahawe inkunga igamije gufasha abana kwiga, harimo 36 biga mu mashuri abanza na 12 biga amashuri yisumbuye.

Iyo nkunga igizwe n’ibikoresho by’ishuri, impuzankano no kwishyurirwa amafaranga yo gufatira ifunguro ku ishuri ku biga mu mashuri abanza.

Hari n’abishyuriwe impapuro bazakoresha mu bizamini.

Umuryango RASAL ugizwe n’abanyamuryango 60 kugeza ubu, ariko n’abandi baskuti bakuze bakomeje gushishikarizwa kubiyungaho.

  • Imvaho Nshya
  • Gashyantare 29, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE