Abanyarwanda barakangurirwa kwipima Virusi itera SIDA bakoresheje “OraQuick”

  • NTAWITONDA JEAN CLAUDE
  • Ukwakira 5, 2021
  • Hashize imyaka 2
Image

Abanyarwanda barakangurirwa kwitabira uburyo bwihuse bwo kwipima Virusi itera SIDA (HIV/VIH) bwitwa “OraQuick” bakamenya uko ubuzima bwabo buhagaze. Ni uburyo butandukanye n’ubwari bumenyerewe bwo gupima amaraso kuko hakoreshwa amatembabuzi yo mu kanwa.

Ubu buryo bushya bukomeje kwegerezwa Abanyarwanda binyuze mu mushinga uterwa inkunga n’Ishami ry’Umuryango w’Abibumbye rishinzwe kurwanya SIDA(UNAIDS) ushyirwa mu bikorwa n’Umuryango Nyarwanda ushinzwe kwita ku bantu babana na Virusi itera SIDA (ANSP+) ku bufatanye n’Ikigo cy’Igihugu gishinzwe Ubuzima (RBC).

Nziringirimana Joseph umukozi uhagarariye uyu mushinga, yasobanuye ko “OraQuick” ari uburyo bwaje bugamije gushyigikira gahunda y’Igihugu yo kurwanya SIDA yiswe “90 inshuro 3” (90,90,90) uyu akaba ari umuhigo Leta yari yihaye wagombaga kugeza muri 2020.

Ni ukuvuga ngo muri miliyoni zisaga 12 z’Abanyarwanda, nyibura 90% by’abantu banduye barimo babashe kwipimisha ubwandu bwa virusi itera SIDA, 90% by’abo bipimishije bagasanga baranduye bafate imiti igabanya ubukana bwa virusi itera SIDA, noneho 90% by’abo bafata imiti igabanya ubukana babashe kugira ubudahangarwa bw’umubiri ku rwego rwo hejuru ku buryo uyu muntu agira ubwirinzi bujya gusa neza n’ubw’umuntu utabana n’ubwandu, ibi bikaba bigabanya ibyago by’uko uwanduye yakwanduza mugenzi we mu gihe baba bakoze imibonano mpuzabitsina idakingiye.

Iyi gahunda yo kugeza muri 2020, yakurikiwe n’iya “95 inshuro 3” irimo gushyirwa mu bikorwa ikaba izageza muri 2030.

Ubu buryo bwa “OraQuick” kandi bwaje buje gufasha Abanyarwanda muri rusange, cyane cyane amatsinda yihariye aba afite ibyago byo hejuru byo kwandura; nk’abagore n’abakobwa bakora umwuga w’uburaya, abaryamana bahuje igitsina, abitera inshinge z’ibiyobyabwenge, abantu bambukiranya imipaka ku mpamvu zitandukanye.

Bwaje kandi no gufasha abantu batajya kwipimisha kubera gutinya ko urushinge rwabababaza mu gihe hakoreshejwe uburyo busanzwe bumenyerewe, ndetse n’abandi batinya kujya kwa muganga ku mpamvu zitandukanye harimo no kubura umwanya.

Mu kiganiro n’Imvaho Nshya, Nziringirimana yagize ati: “Muri sosiyete harimo abantu benshi bafite ubwandu ariko batabizi, bikaba byiza rero iyo bahawe amahirwe yo kumenya uko bahagaze bidasabye ko bapimwa na muganga ahubwo bipimye ubwabo”.

Uko wakwipima HIV

Kwipima bikorwa hifashishijwe agakoresho ukoza ku ishinya, ukazengurutsa uhereye hejuru ukageza no ku yo hasi, warangiza ukagashyira mu gacupa kabugenewe karimo umuti, ugategereza ko kamaramo iminota 20 mbere yo kukavanamo ngo usome ibisubizo.

Ubu buryo bwo kwipima buba buherekejwe n’amabwiriza ajyanye na bwo ari mu ndimi eshatu (Ikinyarwanda, Igifaransa n’Icyongereza), usabwa kuyakurikiza neza kugira ngo ubone igisubizo nyacyo.

Muri yo harimo ko utagomba kugira icyo unywa cyangwa urya nibura mu minota 15 ibanziriza kwipima, wirinda no koza mu kanwa ukoresheje imiti y’amenyo mu minota 30 ibanziriza kwipima. Niba ufata imiti igabanya ubukana bwa Virusi itera SIDA ushobora kubona igisubizo kitari cyo.

Kureba ibisubizo

Nyuma yo kwipima, uwipimye ategereza iminota 20 kugira ngo asome igisubizo kuko aka gakoresho kaba kagaragaza ku buryo busadubirwaho ibisubizo; iyo kagaragaje umurongo umwe bivuga ko utanduye, iyo ari ibiri bigaragaza ko ushobora kuba wanduye Virusi itera SIDA.

Iyo nta kintu kagaragaje biba bisobanuye ko ibisubizo ubonye bidasobanutse ku mpamvu zitandukanye harimo n’uko uwipimye ashobora kuba atakurikije amabwiriza yo kwipima neza, aha akaba ategetswe kongera gusubiramo akoresheje akandi katakoreshejwe ariko agakurikiza neza amabwiriza.

Iyo uwipima abonye ikimenyetso kigaragaza ko ashobora kuba yaranduye, yihutira kujya ku ivuriro muri serivisi ipima ikanatanga ubujyanama ku bwandu bwa virusi itera SIDA, kugira ngo hakoreshwe ubundi buryo bwo kwemeza neza bidasubirwaho igisubizo cya nyuma, akanahabwa ubujyanama n’abakozi babishinzwe bakanamutangiza imiti.

Ikindi kandi ni uko kuba uwipimye asabwa kujya kwa muganga bitavuze ko ubu buryo butizewe, ahubwo ni uko ari ko n’ubundi bisanzwe bikorwa no ku muntu wipimishirije ku kigo nderabuzima.

Nziringirimana ati: “N’ubundi buryo busanzwe bukoreshwa kwa muganga bapima ubwandu bwa virusi itera SIDA ni uko bigenda; kwa muganga haba uburyo buri mu byiciro bitandukanye. Ku rwego rwa mbere iyo umuntu bamupimye bagasanga yaranduye hari urundi rwego rwa kabiri buhita bukoreshwa kugira ngo hemezwe neza igisubizo cyabonetse, kuko hari ibintu bishobora gutuma uwipima abona igisubizo kitari cyo; habayemo kwibeshya cyangwa yipimye nabi, biba ari byiza ko muganga ashyiraho ake akamenya ko cya gisubizo ari cyo, uwanduye bakamufasha no kwinjira mu zindi serivisi zimufasha kugira ngo abane n’ubwo bwandu kandi afate imiti mu buryo bumunogeye”.

“OraQuick” ni uburyo bumaze imyaka igera kuri 3 bugeze mu Rwanda, gusa benshi mu Banyarwanda ntibaramenya ubu buryo, gahunda ihari ni iy’uko bukomeza kongerwa bukagera ku bantu benshi muri sosiyete bakabukoresha bipima bakamenya uko bahagaze.

Aho wasanga “OraQuick”

Nziringirimana Joseph avuga ko ibikoresho byo kwipima (OraQuick) bigenda bikwirakwizwa mu nzu zicuruza imiti (Pharmacies). Ku ikubitiro iyi gahunda yatangijwe mu Mujyi wa Kigali, mu bihe biri imbere izagenda yaguka igere no mu ntara. Ibi bikoresho kandi biboneka ku giciro kidakanganye; amakuru yakusanyijwe ajyanye n’igiciro kiri ku isoko agaragaza ko kiri hagati y’amafaranga y’u Rwanda 1500 na 4500.

Arakangurira buri Munyarwanda kubukoresha akabaho azi uko ubuzima bwe buhagaze kuko hari ahantu henshi umuntu ashobora kwandurira Virusi itera SIDA; hari uwakwandura biturutse ku gukora imibonano mpuzabitsina idakingiye, mu bikoresho bikomeretsa, umubyeyi ashobora kuyanduza umwana we mu bihe bitandukanye harimo igihe amutwite, amubyara cyangwa amwonsa, uwakwanduzwa n’uwo bashakanye, hari n’abayandurira mu mpanuka n’ahandi hatandukanye, uwayanduye akaba ari aho yiyicariye atazi ko abana n’ubwandu bwa virusi itera SIDA.

Ati: “…bajya bavuga bati nta zahabu ibaho mu buzima nk’amagara, iyo umuntu yipimishije akamenya uko ahagaze bimufasha kwikurikirana, agatangira kwiyitaho, akagana serivisi zo kwa muganga, agafata imiti hakiri kare, agakurikiza amabwiriza ahabwa na muganga kuko byagaragaye ko iyo ubikurikije, byongera amahirwe menshi yo guhangana n’iyi virusi akaramba, akabasha gukora akiteza imbere agateza imbere n’Igihugu cye”.

Uwanduye agahita afata imiti igabanya ubukana kandi akayifata neza ubwandu buragabanuka cyane mu mubiri hafi yo gushiramo.

Ukeneye ibindi ibisobanuro bijyanye na “OraQuick” wahamagara cyangwa ukohereza ubutumwa kuri 0788353891 /0788761985 /0788443140  cyangwa ukanyuza ubutumwa kuri Email: ansprwa1@yahoo.fr cyangwa info@rbc.gov.rw .Wanasura urubuga rwa ANSP+ www.ansp.org.rw

  • NTAWITONDA JEAN CLAUDE
  • Ukwakira 5, 2021
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE