Abanyarwanda 8 bahawe imyanya ikomeye ku rwego mpuzamahanga muri 2023

  • ZIGAMA THEONESTE
  • Ukuboza 30, 2023
  • Hashize amezi 2
Image

Mu gihe u Rwanda n’Isi barimo gusoza umwaka wa 2023, iterambere rirakomeza kwiyongera harimo kuba Abanyarwanda bagenda bagirirwa icyizere bagahabwa imyanya ikomeye yo kuyobora ibigo n’imiryango bikomye ku rwego mpuzamahanga.

Iyi nkuru igiye kugaruka ku Banyarwanda 8 bahawe akazi mu bigo bikomeye ku rwego mpuzamahanga mu bigo n’imiryango mu mwaka wa 2023.

Akamanzi Clare

Ni umunyarwandakazi uherutse guhabwa kuyobora ishyirahamwe ry’umukino w’intoki wa Basket, aba Umuyobozi Mukuru ishami ryayo muri Afurika, NBA Africa.

NBA ni ishyirahamwe ry’umukino wa Basket rikomeye muri Leta Zunze Ubumwe z’Amerika no mu gihugu cya Canada ndetse rizwi ku ruhando mpuzamahanga.

Akamanzi Clare yagizwe umuyobozi wa NBA Africa tariki ya 27 Ukuboza 2023, bimugira umugore wa mbere w’Umunyafurika uyoboye NBA Africa.

Akamanzi ni impuguke mu mategeko y’ubucuruzi  n’ishoramari mpuzamahanga, yanabaye Umuyobozi Mukuru w’Urwego rw’Igihugu rw’Iterambere RDB kuva 2017 kugeza muri Nzeri 2023.

Akamanzi ashimirwa ubutwari yagize ubwo yayoboraga  Urwego rw’Igihugu  rw’Iterambere RDB kuko yazamuye urwego rw’ubukungu bw’u Rwanda binyuze mu kuzamura urwego rw’abikorera n’ishoramari muri rusange.

Ku buyobozi bwe ni bwo u Rwanda rwatangiye kwagura ibikorwa by’ishoramari mpuzamahanga mu ngeri zitandukanye ndetse n’amavugurura agamije iterambere mu bucuruzi no guhanga udushya.

Mu kwihutisha iterembere mu bucuruzi mpuzamahanga, Akamazi yayoboye ibikorwa by’ishoramari mu iterambere aho u Rwanda rwatangije ubukangurambaga bwo gushishakariza amahanga gusura u Rwanda muri gahunda ya (Visit Rwanda) binyuze mu marushanwa y’imikino ya Basket muri Afurika (BAL), gukorana n’amakipe atandukanye akomeye ku Isi, harimo Arsenal FC yo mu Bwongereza, Paris Saint Germain FC yo mu Bufaransa, FC Bayern Munich yo mu Budage no gukorana n’ikinyamakuru TIME Magazine n’ibindi.

Clare Akamanzi afite impamyabumenyi y’icyiciro cya gatatu cya Kaminuza (Masters) mu bijyanye n’imiyoborere yakuye muri Kaminuza ya Harvard University’s Kennedy School of Government in Cambridge muri Leta ya Massachusetts muri Leta Zunze Ubumwe z’Amerika.

Akaba kandi afite Masters mu mategeko y’ubucuruzi Mpuzamahanga n’ishoramari yakuye muri Kaminuza ya Pretoria muri Afurika y’Epfo n’impamyabumenyi y’icyiciro cya mbere cya Kaminuza mu mategeko yakuye muri Kaminuza ya Makerere mu gihugu cya Uganda.

Dr Ngamije Daniel

Dr Ndamije Daniel yahoze ari Minisitiri w’Ubuzima mu Rwanda, yaje guhabwa umwanya wo kuyobora Poragarumu yo kurwanya Malaria ku Isi mu Ishami ry’Umuryango w’Abibumbye ryita ku buzima OMS.

Dr Ndamije yahawe inshingano zo kuba umuhuzabikorwa wa gahunda yo kurwanya no kurandura Malaria ku Isi.

Ngamije yabaye Minisitiri w’Ubuzima mu Rwanda kuva muri Gashyantare 2020 kugeza mu Ugushyingo 2022.

Muri icyo gihe, Dr Ngamije yayoboye gahunda zirimo kuzamura urwego rw’ubuvuzi by’umwihariko ibyo kurwanya icyorezo cya COVID 19 cyari cyugarije u Rwanda n’Isi muri ibyo bihe nk’uko na OMS yabimushimiye.

Mu yindi mirimo yakoze, kuva mu 2018 kugera muri 2019 Dr. Ngamije yari ashinzwe gahunda y’igihugu yo kurwanya malariya n’indwara zititabwaho mu Ishami ry’Umuryango w’Abibumbye ryita ku buzima (OMS) mu Rwanda.

Dr Ngamije ni inzobere mu gusuzuma indwara n’ubuzima rusange (physician and public health specialist).

Afite uburambe bw’imyaka irenga 25 mu rwego rw’ubuzima aho yakoze mu mavuriro atandukanye, mu bitaro n’imishinga yerekeye ubuzima mu Rwanda no mu Karere.

Mbere yo gukora muri OMS, Dr Ngamije yakoze imyaka 10 mu rwego rwo gushaka inkunga zitandukanye zo gushyira muri gahunda z’ubuzima muri Minisiteri y’Ubuzima(MINISANTE) n’Ikigo cy’Igihugu gishinzwe Ubuzima(RBC).

Dr Ngamije kandi yabaye Umuhuzabikorwa wa Global Fund muri gahunda yo kurwanya Virusi Itera Sida, Igituntu na Malaria. Yabaye kandi Umuyobozi ushinzwe gukurikirana imishinga muri Ministeri y’Ubuzima.

Dr Mukeshimana Gerardine

Dr Mukeshimana Gerardine yabaye Minisitiri w’Ubuhinzi n’Ubworozi mu Rwanda, tariki ya 31 Nyakanga 2023 ni bwo yagizwe Visi Perezida w’Ikigega Mpuzamahanga cy’Iterambere ry’Ubuhinzi (IFAD).

Nyuma y’aho hari hashize imyaka umunani Mukeshimana ari Minisitiri w’Ubuhinzi n’Ubworozi mu Rwanda, kuva muri Nyakanga 2014 kugeza muri Werurwe 2023.

Ubwo yayoboraga iyi Minisiteri, yazamuye urwego rw’ubuhinzi ku rwego rw’Umugabane w’Afurika nk’uko IFAD yabitangaje.

Dr Mukeshimana kandi yakunze gushishikariza urubyiruko kugana ubuhinzi  ndetse no kureshya abikorera mu gushora imari muri uru rwego, abereka amahirwe abyara inyungu ari mu ishoramari ry’ubuhinzi bw’u Rwanda no gushyiraho ingamba zo guhangana n’imihindagurikire y’ibihe.

Dr Mukeshimana afite impamyabumenyi y’icyiciro cya mbere (A0) cya Kaminuza mu buhinzi bw’imboga yakuye muri Kaminiza y’u Rwanda, iy’icyiciro cya gatatu n’ihanitse mu bijyanye n’ubuhinzi n’ubumenyi bw’ibihingwa n’ubutaka yakuye muri Kaminuza ya Leta ya Michigan muri Leta Zunze Ubumwe z’Amerika(USA).

Ambasaderi Gatete Claver

Tariki ya 6 Ukwakira, Umunyamabanga Mukuru w’Umuryango w’Abibumbye, Loni António Guterres, yatangaje Ambasaderi Gatete Claver nk’Umunyamabanga Nshingwabikorwa wa Komisiyo y’Ubukungu ya Loni ishinzwe Afurika (UNECA).

Icyo gihe, Gatete yari Ambasaderi akaba n’uhagarariye u Rwanda mu Muryango w’Abibumbye i New York muri Leta Zunze Ubumwe z’Amerika.

Gatete Claver ni inzobere mu bukungu akaba yitezweho iterambere muri iryo shami rya Loni kubera ubuhanga buhanitse asanzwe afite bwo kuyobora, hamwe n’uburambe mu bijyanye na politiki n’imari mpuzamahanga by’umwihariko ku mugabane w’Afurika.

Mu mirimo itandukanye yakoze mu Rwanda, Ambasaderi Gatete yabaye Minisitiri w’Ibikorwa Remezo (2018-2022) na Minisitiri w’Imari n’Igenamigambi (2013-2018).

Yabaye kandi Umuyobozi Mukuru ushinzwe ubukungu n’imibereho myiza mu biro bya Perezida (2000-2003.

Gatete afite impamyabumenyi y’icyiciro cya gatatu cya kaminuza mu bijyanye n’ubukungu bushingiye ku buhinzi yakuye muri Kaminuza ya British Columbia yo muri Canada.

Rwanyindo Kayirangwa Fanfan

Ku ya 1 Ukwakira, Fanfan Rwanyindo Kayirangwa yatangiye imirimo ye mu Muryango Mpuzamahanga wita ku murimo (ILO) nyuma yo kugirwa Umuyobozi mushya ushinzwe Umugabane w’Afurika akaba n’umuyobozi Mukuru Wungirije muri uwo muryango.

Mbere yaho, Rwanyindo yari Minisitiri w’Abakozi ba Leta n’Umurimo mu Rwanda, agira uruhare mu kuzamura urwego rw’imirimo y’igihugu na politiki y’umurimo.

Yagize uruhare runini mu guteza imbere umurimo unoze n’ubutabera mbonezamubano, nk’uko byatangajwe n’ibitangazamakuru mpuzamahanga na ILO ku ya 4 Ukwakira.

Afite impamyabumenyi y’icyiciro cya kabiri cya kaminuza (A0) mu by’amategeko, yakuye muri kaminuza y’u Rwanda, n’impamyabumenyi ya Masters mu by’amategeko yakuye muri kaminuza ya Witwatersrand yo muri Afurika y’Epfo.

Mu mwaka wa 2004, yagizwe umucamanza mu Rukiko Rukuru mu Rwanda, ndetse mu mwaka wa 2013 yari Visi Perezida w’Urukiko Rukuru rw’Ubucuruzi.

Umutoni Christine

Umutoni Christine yagizwe Umuhuzabikorwa w’Umuryango w’Abibumbye muri Liberiya, n’Umunyamabanga Mukuru w’Umuryango w’Abibumbye Antonio Guterres, aho yatangiye imirimo ye ku ya 1 Gashyantare 2023.

Mbere yaho, Umutoni yari Umuhuzabikorwa w’Umuryango w’Abibumbye Loni, mu birwa bya Maurice na Seychelles.

Umutoni kandi yakoreye u Rwanda mu nzego zitandukanye, harimo kuba Ambasaderi warwo mu Bubiligi, mu Buholandi, Luxembourg, Umuryango w’Ubumwe bw’Ibihugu by’I Burayi, no muri Leta ya  Vatikani, ifite icyicaro i Buruseli mu Bubiligi, aba na Ambasaderi w’u Rwanda muri Uganda.

Ubalijoro Eliane

Tariki ya 17 Mutarama 2023, Inama y’Ubutegetsi mu Kigo cy’Ubushakashatsi Mpuzamahanga bw’Amashyamba n’Ubuhinzi ku Isi (CIFOR-ICRAF) yatangaje ko Ubalijoro Eliane yagizwe Umuyobozi Mukuru wayo.

Ni we mugore w’Umunyafurika wa mbere uyoboye icyo kigo mu myaka 52 kimaze.

Kugeza igihe yashyiriweho, Ubalijoro, yakoraga nk’Umuyobozi Mukuru w’ubufatanye bw’inzego za Leta n’abikorera mu kigo cya kaminuza ya McGill cyo muri Canada gishinzwe ubushakashatsi ku iterambere mpuzamahanga.

Ubalijoro azwi cyane mu gukora ubushakashatsi ku guhanga udushya, uburinganire, n’iterambere rirambye.

Karangwa Charles

Muri Gicurasi, Charles Karangwa yagizwe umuyobozi Mukuru w’Ishami rishinzwe ibidukikije mu Ishami ry’Umuryango Mpuzamahanga uharanira kubungabunga ibidukikije (IUCN) rifite icyicaro mu Busuwisi.

IUCN ni Umuryango Mpuzamahanga ukora mu rwego rwo kubungabunga ibidukikije no gukoresha neza umutungo kamere.

Mbere y’izo nshingano nshya, Karangwa yabaye umuyobozi w’urwego rwa Sisitemu y’ubutaka, amashyamba, ubutaka, no gushaka ibisubizo mu kubungabunga ibidukikije n’ubuhinzi burambye muri IUCN, ku Mugabane w’Afurika by’umwihariko muri  Kenya.

Yabaye kandi uhagarariye IUCN mu Rwanda kuva muri Mutarama 2016, nyuma agirwa uhagarariye igihugu cya Kenya akaba n’umuyobozi w’akarere ushinzwe imiterere y’ubutaka kuva muri Kamena 2021 kugeza muri Mata 2023.

Afite uburambe bw’imyaka 20 mu bijyanye n’iterambere no kubungabunga ibidukikije muri Afurika na Aziya.

  • ZIGAMA THEONESTE
  • Ukuboza 30, 2023
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE