Abanyamuryango ba Muganga Sacco barayivuga imyato  

  • KAYITARE JEAN PAUL
  • Werurwe 30, 2024
  • Hashize ibyumweru 2
Image

Abanyamuryango b’Ikigo cy’imari, Muganga Sacco, baravuga ko kibafasha mu gukemura utubazo tumwe na tumwe bahura natwo. Bavuga ko ukeneye inguzanyo ayihabwa nta nzitizi kandi ku nyungu nto ugereranyije n’ibindi bigo by’imari.

Babigarutswe ejo ku wa Kane mu Nama y’Inteko Rusange ya 6 isanzwe y’abanyamuryango ba Muganga Sacco yabereye mu Mujyi wa Kigali.

Muganga Sacco ni Koperative y’abakozi bakora mu rwego rw’ubuzima.

Nsengiyaremye Jean Paul uhagarariye abakozi bo mu bitaro bya Masaka, avuga ko Muganga Sacco yaje ikenewe mu rwego rw’ubuzima kuko imaze kubageza kuri byinshi.

Agira ati: “Icya mbere ugereranyije n’andi mabanki, iyo baguhaye inguzanyo inyungu iba iri hasi bigafasha abanyamuryango”.

Avuga ko mu bindi bigo by’imari usanga inyungu iri kuri 18% mu gihe Muganga Sacco inyungu ari 14%.

Muganga Sacco ifasha abanyamuryango bayo ngo kuko iyo basabye inguzanyo bayibona mu buryo bwihuse.

Urwego rwose umunyamuryango ashakiyeho inguzanyo ahita ayibona mu buryo bwihuse.

Ati: “Njyewe narayatse n’ubu ndayifite kandi hari ibintu byinshi byamfashije. Nayifashe mbere ariko ubungubu harabura amezi 5 kugira ngo nyirangize”.

Nsengiyumva Athanase, uhagarariye abakozi bo mu bitaro bya Rwinkwavu mu Karere ka Kayonza, na we ahamya ko Muganga Sacco ari Koperative itanga inguzanyo mu buryo bwihuse.

Mu kiganiro gito yahaye Imvaho Nshya, yagize ati: “Iyo ngize akabazo kantunguye wenda ngiye kohereza umwana ku ishuri, hari inguzanyo yihuse nsaba kandi imfasha gukemura ibibazo bya hato na hato.

Ndateganya no kuzasaba inguzanyo ya Gira Iwawe.”

Iyakaremye Zachée, Umunyamabanga Uhoraho muri Minisiteri y’Ubuzima, avuga ko kuba hari abanyamuryango ba Muganga Sacco basaba inguzanyo zifite inyungu ntoya bibafasha kandi bitabasabye ubwizigame cyangwa ingwate zihambaye.

Hazakorwa ubuvugizi kugira ngo abanyamuryango biyongere hagamijwe guteza imbere imibereho myiza y’abakozi bo mu rwego rw’ubuzima.

Akomeza agira ati: “Minisiteri y’Ubuzima irakora ubuvugizi kandi abo tubwira barumva, hari ikirimo gukorwa kugira ngo ubushobozi bwa Muganga Sacco bukomeze kwiyongera.”

Maj (Rtd) Jean Damascène Gasherebuka, Chairman wa Muganga Sacco, avuga ko Muganga Sacco imaze imyaka 3.

Yatangiye ari ikimina bivuze ko ngo abantu bari basanzwe mu yandi ma banki.

Ntabwo iragira ubushobozi bwo kugura inguzanyo z’abantu bari bafite mu yandi ma banki.

Agira ati: “Ubungubu hari urwego tugezeho, nidushobora kugura inguzanyo abantu bafite mu yandi ma banki, bagahemberwa muri Muganga Sacco, kuko inguzanyo turayitangira kuri makeya ugereranyije n’andi mabanki, turibaza ko n’abataraza bazazamo.”

Muganga Sacco yungutse hafi inshuro 3

Ubuyobozi bwa Muganga Sacco, butangaza ko bwungutse 80,558,214 Frw hatarakurwamo umusoro mu mwaka ushize wa 2023, mu gihe umwaka wabanje wa 2022 bwungutse 33,049,680 Frw habariwemo n’umusoro. Inyungu Muganga Sacco yungutse, iri ku gipimo cya 144%.

Mu mwaka ushize Muganga Sacco yatanze inguzanyo mu banyamuryango bayo ingana na 3,387,747,552 Frw umwaka wanje hatanzwe inguzanyo ya 2,841,00,949. Inguzanyo itangwa yazamutse ku gipimo cya 19%

Umutungo rusange wa Muganga Sacco wazamutse ku gipimo cya 14%.

Mu 2022 umutungo wa Muganga Sacco wari ufite agaciro ka 6,054,389,266 Frw mu gihe umwaka ushize wazamutse ukagera kuri 6,881,602,706 Frw.

Kugeza ubu abanyamuryango ba Muganga Sacco babarirwa mu 9,400.

Amafoto: Uwamaliya Cécile

  • KAYITARE JEAN PAUL
  • Werurwe 30, 2024
  • Hashize ibyumweru 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE