Abana bakina Karate muri The Champions Sports Academy bazamuwe mu ntera

  • Imvaho Nshya
  • Kanama 31, 2022
  • Hashize imyaka 2
Image

Buri mwaka  ishuri “The Champions Sports Academy” ritegura igikorwa cyo kuzamura mu ntera abana bakina umukino wa Karate.

Taliki 27 na 28 Kanama 2022 habaye iki gikorwa ubwo hasozwaga gahunda ya siporo y’abana mu biruhuko “Best Holidays Sports for Children”. Yabereye  ahahoze ari muri Sports View Hotel i  Remera.

Iyi gahunda y’ibiruhuko muri rusange yitabiriwe n’abana bagera ku 125 gusa abana bagera kuri 95 ni bo bitabiriye gahunda yo kuzamurwamu ntera mu mukino wa karate aho bahawe imikandara inyuranye.

 Umuyobozi wa The champions Sports Academy, Nkuranyabahizi Noel yatangarije Imvaho Nshya ko iyi gahunda bayitegura mu rwego rwo kuzamura mu ntera abana bujuje ibisabwa kuko bakora ikizamini.

Akomeza avuga ko batangiriye ku bafite umukandara w’umweru  bagahabwa  uw’umuhondo cyangwa Oranje. Ikindi cyiciro ni abafite umukandara w’umuhondo kugera kuri Malo.

Nkuranyabahizi atangaza ko bahisemo gukora iyi gahunda vuba kugira ngo abana bari  bamaze iminsi mu myitozo  y’ibiruhuko bazasubire ku ishuri babisoze.

Ati : “ Twari tumaranye hafi ameze abiri, twagira ngo rero ibya Karate birangire  hakurikireho n’indi mikino.”

Avuga ko igikorwa nk’iki  kiba kigamije gukorera abana isuzuma ku bijyanye n’ibyo bize ,ibi bikaba bifasha abana kubona umusaruro w’ibyo bakoreye bo ubwabo no kwishira kuva ku rwego ujya ku rundi. Anavuga ko kandi  uba ari n’umwanya mwiza  wo kuvumbura impano nshya muri Karate kugira ngo zizakurikiranwe muri gahunda  bafite y’iterambere ry’igihe kirekire ku mukinnyi  “Long Term Athlete Development”.

Nkuranyabahizi usanzwe ari n’umutoza mukuru w’ikipe y’igihugu ya Karate  avuga ko ashaka no gukurikirana n’abandi bana mu rwego rwo guteza imbere uyu mukino muri rusange.

Ibikorwa nk’ibi byo guhuriza abana hamwe mu biruhuko bagatozwa imikino inyuranye harimo na Karate, umutoza Nkuranyabahizi Noel  avuga ko  ari byiza kuko byerekanye ko siporo muri rusange  igomba gutera imbere bihereye  mu bakiri bato.

Agaruka ku mukino wa Karate, Nkuranyabahizi yavuze ko  abatoza benshi muri uyu mukino bafunguye amakipe azamura  abana kandi bitanga icyizere ko mu minsi iri imbere hazaba hari amakipe akomeye mu byiciro byose kuva mu bana kugera ku bakuru.

Kuva muri 2017, Nkuranyabahizi Noel usanzwe ari umutoza mukuru   w’ikipe y’igihugu ya Karate ni bwo  yatangije iri shuri “The champions Sports  Academy”  aho abana bafite hagati y’imyaka 4 na 17  bigishwa imikino itandukanye irimo Karate, Badminton, kwirwanaho “Self defence”, imikino ngoromubiri “Gymnastics”. Aba bana kandi bigishwa kubyina bya Kinyarwanda ndetse n’indangagaciro za Siporo.

Ibi bikaba bifasha abana kwiga ibintu bishya  aho bahura n’abandi  bana bakamenyana ndetse  bakaniga indagagaciro za siporo zirimo  gukorera hamwe, Ubucuti, ikinyabupfura no kuba indashyikirwa.

Iri shuri “The champions Sports  Academy” rifite amashami muri Club House La Palisse i Nyandungu, i Nyanza mu Ntara y’Amajyepfo ndetse n’i Ntaramara muri Rwanda Christian Children School, hakaba hari gahunda yo gufungura n’andi mashami mu bice bitandukanye by’igihugu.

Amafoto

  • Imvaho Nshya
  • Kanama 31, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE