Abakozi ba NCHR bagaragarijwe uko ikoranabuhanga ryahungabanya uburenganzira bwa muntu

  • KAYITARE JEAN PAUL
  • Ugushyingo 30, 2023
  • Hashize amezi 3
Image

Komisiyo y’Uburenganzira bwa Muntu (NCHR) imaze iminsi mu mahugurwa asanzwe ahabwa abakozi n’abakomiseri mu rwego rwo kubongerera ubumenyi ku ngingo zirimo iyubahirizwa ry’uburenganzira bwa muntu.

Ni amahugurwa by’umwihariko arebana n’uburyo bw’umutekano mu ikoranabuhanga (Cyber Security).

Umurungi Providence, Perezida wa NCHR, avuga ko amahugurwa agenerwa abakozi n’abakomiseri ba Komisiyo, cyane cyane yihariye uko bakongera ubumenyi.

Aherutse kubigarukaho ubwo hatangizwaga amahugurwa y’abakozi n’abakomiseri muri Komisiyo.

Yabwiye Imvaho Nshya ko mu nshingano za Komisiyo harimo kurengera uburenganzira bwa muntu no kureba niba bwubahirizwa.

Ku rundi ruhande, mu kurengera uburenganzira bwa muntu ngo bisaba ko Komisiyo ikorana n’inzego zitandukanye.

Umurungi asobanura ko ibikorerwa ku ikoranabuhanga bifite aho bihurira n’uburenganzira bwa muntu, ari yo mpamvu abakozi ba Komisiyo bongererwa ubumenyi.

Agira ati “Uko dukenera ikoranabuhanga mu buzima bwacu bwa buri munsi, hari aho muri ubwa burenganzira bwa muntu ikoranabuhanga rishobora kudufasha mu kubuteza imbere.

Ikoranabuhanga hari abarikoresha mu buryo butari bwiza gusa, hari n’abarengera bakarikoresha mu buryo bubi buhungabanya uburenganzira bwa muntu.

Abakomiseri babikora gute, abakozi babikora gute, bakurikirana bate iryo hungabanywa ryakozwe mu buryo bukoresheje ikoranabuhanga.

Mu gihe habayeho ko uburenganzira bwa muntu buhutajwe bukoresheje ikoranabuhanga, umukozi wagiye mu kazi ko kugenzura, yamenya ahera he akora iperereza rye no gusubiza ibibazo byatewe n’ikoranabuhanga?”.

Akomeza avuga ko Komisiyo idashinzwe guhana ariko ikorana n’inzego z’ibishinzwe.

Iyo Komisiyo imenye ikibazo cyabaye ku ihungabana ry’uburenganzira bwa muntu, ari igikozwe mu buzima busanzwe, ikorana n’inzego ikamenyesha ikibazo cyabaye kugira ngo zishobore gukemura icyo kibazo.

Komisiyo y’Uburenganzira bwa Muntu igira inama abakoresha imbuga nkoranyambaga gutekereza kabiri mbere yo kugira icyo bandika.

Perezida wa NCHR, Umurungi, agira ati “Ikintu cyose ugiye kwandika ku mbuga nkoranyambaga ubanza gutekereza kabiri, ukibaza uti icyo ngiye kwandika hari aho gishobora kubangamira uburenganzira bwa muntu.

Ni ukwitondera ibyo twandika, ibyo tuvuga ku mbuga nkoranyambaga”.

Umubyeyi Marie Christine, umukozi muri NCHR, avuga ko amahugurwa bahabwa atuma bamenya uko barinda amakuru bafite ndetse n’uko bagomba kurinda amakuru y’abandi.

Ati “Hari igihe umuntu akoresha amakuru uko yishakiye atamenya ikibujijwe cyangwa icyemewe ugasanga ibyo byose ni ikibazo.

Tugira amakuru tumenya aturutse mu baturage, ayo makuru tugomba kumenya uko tuyarinda n’igihe runaka tugomba kuyarindira”.

Kazubwenge Emilien utuye mu Mujyi wa Kigali akaba akoresha imbuga nkoranyamba, yabwiye Imvaho Nshya ko hari abantu bashobora kwitwikira mu mutaka w’ikoranabuhanga bakaba bahungabanya uburenganzira bwa muntu.

Avuga ko we byamubayeho akitabaza inzego z’ubugenzacyaha kandi ziramufasha.

Ati “Hari abantu bahimba amazina ku mbuga nkoranyambaga bakibasira abantu bigatuma uburenganzira bwawe buhahungabanira.

Njye byambayeho nibasirwa n’umuntu ntazi ariko Urwego rw’Ubugenzacyaha ruramfasha, rufata wa muntu kandi arakurikiranwa.

Kuba Komisiyo y’Uburenganzira bwa muntu yihugura kuri ibi, ku giti cyanjye ndabona ari ikintu cyiza cyane kuko uburenganzira bwa muntu buzakomeza kubumbatirwa no ku mbuga nkoranyambaga”.

Agira inama urubyiruko rugenzi rwe guharanira icyatuma rwiyungura ubumenyi no gukora ubushakashatsi ku mbuga nkoranyambaga kuruta uko rwazikoresha ruhungabanya uburenganzira bw’abandi.

  • KAYITARE JEAN PAUL
  • Ugushyingo 30, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE