Abakobwa ba Jay Polly bemerewe Miliyoni 16 mu gitaramo ‘Baba Experience’

  • MUTETERAZINA SHIFAH
  • Werurwe 31, 2024
  • Hashize ibyumweru 3
Image

Ku mugoroba wa tariki 30 Werurwe 2024, abakobwa b’umuhanzi Jay Polly witabye Imana mu myaka ikabakaba ine ishize baremewe amafaranga y’u Rwanda agera kuri miliyoni 16 . 

Byabereye mu gitaramo cy’amateka cyabereye i Kigali, umuhanzi Nemeye Platini uzwi Platini P cyangwa Baba, yahurijemo abahanzi batandukanye batari baherutse gutaramira Abanyarwanda.

Ni igitaramo cyari cyitabiriwe n’abahanzi ndetse n’ibindi byamamare bitandukanye mu ruhando rw’imyidagaduro mu Rwanda no hanze yarwo. 

Nkuko yari yabitangarije abanyamakuru mbere y’igitaramo avuga ko nyakwigendera Jay Polly azazirikanwa agahabwa icyubahiro akwiye, Platini yafashe umwanya yihereyeho yemerera abana ba Jay Polly amafaranga y’u Rwanda miliyoni imwe, asaba n’abandi kugira icyo babafasha.

Ni igikorwa cyakoze benshi ku mutima, maze buri wese wari ufite icyo yumva yabasha agahabwa umwanya wo kugira icyo avuga no gutanga.

Bamwe mu bagize icyo bemerera abakobwa ba Jay Pally, barimo Ishimwe Clement wa Kina Music wari waherekeje umugore we Knowless wagaragaye ku rubyiniro mu bafashije Platini P.

Ishimwe Clement yemereye abakobwa ba Jay Polly amafaranga y’u Rwanda angana na miliyoni ebyiri.

Bamenya na we ari mu bemereye abo bana ubufasha bwa miliyoni imwe y’amafaranga y’u Rwanda.

Ubufasha bwakomeje gutangwa kugera kuri miliyoni 16 z’amafaranga y’u Rwanda, ndetse hanaboneka n’abiyemeza kuzabishyurira amashuri.

Uretse kuba Jay Polly yazirikanywe muri icyo gitaramo hakaboneka n’ubwo bufasha bwagenewe abana be, hanaririmbyr itsinda Urban Boyz. 

Ubwo Itsinda Urban Boyz ryageraga ku rubyiniro, Nizzo Kabosi umwe mu barigize yanyereye agatembagara hasi ariko ntibyamubuza  gukomeza gususurutsa abitabiriye igitaramo. 

Nyuma yo kweguka yavuze ko yahagaze ku ndangururamajwi iranyerera na we ahita agwa gutyo.

Uyu muhanzi nubwo yagize ikibazo akagwa, yashimishije benshi bagaragaje ko bakinyotewe indirimbo z’itsinda ’Urban Boys’.

Uretse umuhanzi wo mu gihugu cy’u Burundi Big Fizzo utabashije kugera ahabereye igitaramo kandi byari byanavuzwe mbere ko ashobora kutacyitabira kubera umwuka mubi uri hagati y’Ibihugu byombi, abandi bose bari batumiwe bahageze kandi bashimisha abitabiriye. 

Guhera kuri Zeotrap, Mr Kagame, Nel Ngabo, Butera Knowless, Riderman, Urban Boys na Eddy Kenzo bose bashimishije abitabiriye igitaramo.

Eddy Kenzo yagerageje kubyina mu buryo bwa Kinyarwanda mu rwego rwo kwishimira ko afite inkomoko mu Rwanda.

Ubwo yari ku rubyiniro Eddy Kenzo yagize ati: “Nkunda u Rwanda, rwambyariye umubyeyi wanjye. Ntabwo mubizi ariko Imana yahaye umugisha umubyeyi w’Umunyarwandakazi.”

Uko kugerageza kwisanisha n’u Rwanda abyina Kinyarwanda, byongereye ibyishimo abari bitabiriye icyo gitaramo.

Nyuma y’igitaramo cyarangiye saa sita zirenga, abitabiriye babishakaga bakomereje ibirori muri imwe muri hoteli zo muri Kigali.

Bamenya mu yemeye miliyoni imwe y’amafaranga y’u Rwanda azafasha abana ba Jay Polly
Platini ari kumwe na Fifi wabyaranye na Jay Polly yatangije igikorwa cyo kwitanga
Ishimwe Clement n’umufasha we bitanze miliyoni 2 z’amafaranga y’u Rwanda
  • MUTETERAZINA SHIFAH
  • Werurwe 31, 2024
  • Hashize ibyumweru 3
TANGA IGITEKEREZO
B George says:
Werurwe 31, 2024 at 2:50 pm

Imana ibahe umugisha kubwitange mwagize mushigikira umuryango mugenzi wanyu yasize namwe Imana ikomeze ibashigikire mubyanyu mukora byose.

Andika igitekerezo

AMATEGEKO AGENGA IYANDIKA RY'IGITEKEREZO CYAWE