Abakinnyi 123 bo mu bihugu 16 bitezwe muri Rwandan Epic 2023

  • Imvaho Nshya
  • Ukwakira 30, 2023
  • Hashize amezi 7
Image

Kuva kuri uyu wa Kabiri tariki ya 31 Ukwakira kugeza ku ya 4 Ugushyingo 2023, mu Rwanda haratangira irushanwa ry’amagare ryo mu misozi ryiswe “Rwandan Epic 2023” rizaba rigizwe n’uduce dutanu, rikaba ryitezwemo abakinnyi 123 baturutse mu bihugu 16 byo hirya no hino ku Isi. 

Rwandan Epic 2023 igiye kuba ku nshuro yayo ya kane, itegurwa na Rwanda Alternative Riding Events (RAR Events) ku bufatanye n’Ishyirahamwe ry’Umukino w’Amagare mu Rwanda (FERWACY).

Muri uyu mwaka, izaba igizwe n’uduce dutanu dutandukanye, tuzakinirwa i Kigali, mu Ntara y’Amajyaruguru no mu Burengerazuba.

Agace ka mbere kazakinirwa i Kigali kuri uyu wa Kabiri tariki ya 31 Ukwakira, ahazwi nko kuri Fazenda Sengha, kazaba kareshya n’ibilometero 15 ndetse buri mukinnyi azaba asiganwa n’ibihe ku giti cye.

Ku wa Gatatu, tariki ya 1 Ugushyingp, buteganyijwe ko hazakinwa agace ka kabiri, Rusiga – Musanze, gafite intera y’ibilometero 85, bukeye bwaho tariki 2 ugushyingo 2023 hakinwe agace ka gatatu bavuye Kinigi-Burera-Kinigi ku ntera y’ibilometero 73.

Agace ka kane kazakinwa tariki 3 Ugushyingo 2023 mu Kinigi ahitegeye Ibirunga, kazaba kareshya n’ibilometero 32.

Rwandan Epic 2023 izasozwa ku wa Gatandatu, tariki ya 4 Ugushyingo, hakinwa agace ka gatanu kazaba kareshya n’ibilometero 62, aho abazakitabira bazahagurukira i Nyabihu berekeza mu Karere Rubavu.

Mu kiganiro n’abanyamakuru cyabaye kuri uyu wa Mbere tariki 30 Ukwakira, Simon De Schutter uri mu bategura “Rwandan Epic”, yavuze ko impamvu bahisemo ko utu duce dukinwa muri ubu buryo ari “ukugira ngo hagaragazwe ibyiza bitatse u Rwanda.”

U Bubiligi ni cyo gihugu kizaba gifite abakinnyi benshi (39). Abandi bazitabira ni abo mu Repubulika ya Tchèque, u Budage, Espagne, u Bufaransa, u Bwongereza, u Butaliyani, Kenya, Nigeria, u Buholandi, Suède, Slovenia, Sierra Leone, Leta Zunze Ubumwe z’Amerika, Zambia n’u Rwanda ruzaba rufite abakinnyi 19. 

Ubwo Rwandan Epic yaherukaga kuba mu Ugushyingo 2022, yegukanywe n’Ababiligi Flans Claes na Jens Schuermans mu gihe Habimana Jean Eric na Tumalo Makai basoreje ku mwanya wa gatatu.

SHEMA IVAN

  • Imvaho Nshya
  • Ukwakira 30, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE